Read dhopadhola Isaya 5 Bible Online

Isaya 5 - dhopadhola bible

Isaya 5

¹Weyi awer ri agwera paran, wer paran ma mar ma mako kwoŋ ndelo vini pere. Agwera paran oyido nigi ndelo vini, i wi tendere ma lowo ma diwa.

²Ofuro to dimo woko telin, to pidho yen vini maber loyo. Ogeto acurcur ma kuro i dier ndelo, aka okunyo bur ma biyo nyinge, ogeno ni lanyak olemo, to, onyak olemo makec ayino.

³Aka onyo pama, Awi ji ma jobedo i Yerusalem, kodi ji ma Yuda, thum win banja i dier an, gi ndelo vini paran.

⁴Aŋo man ma mitere atima ri ndelo vini paran, m'akitimo rigo? Munyo oyido akuro wonyak olemo, raŋo onyak olemo makec?

⁵Aka onyo pama alawaco rin, gim'alatimo ri ndelo vini paran. Alakwanyo woko cel mere, aka ilanyeko; alaturo woko tielo mere, aka ilanyono piny.

⁶Alaweyo wodongi gi doy, akilakikolesa kosa doyo, alaweyo okure gi kudhin jowodong'iye, alageŋo kiri pondeponde cwe koth i iye.

⁷Kole ndelo vini pa Rwoth pa lwak jolweny, obedo ot pa Isiraili, aka ji ma Yuda, jobedo yen vini ma go pidho gi kisangala. Go oyido mito tiro, to oneno jooyo remo! Go oyido mito jowotimi gim'otire, to owinjo ywak pa ji!

⁸Kidamba riwin, ma wiriwo ot gi ot, wimedo ndelo i wi ndelo, tundo kam'ongoye thwolo ri joman kwanyo woko win, aka widoŋ bedo kendi win i lowo.

⁹Rwoth pa lwak jolweny otieko kwoŋere munyo awinjo. Adieri udi kweth ladoŋ nono, udi madongo maŋon ladoŋ m'ongoye i iye ji.

¹⁰Ndelo eka apar ma vini lacwero vini lita aboro, aka mugowa apar ma kodhi lanyak mugowa acel ma ŋano.

¹¹Kidamba riwin, ma wimondo cew odikin, cako rango medho makec, ma wigalo tundo othieno, cuka vini mero jo!

¹²Kalima mewin bedo tongol gi sasi, milowe gi vini, to wikidew kwoŋ tim pa Rwoth, kosa neno tic ma cingi go!

¹³Riameno ji paran jokadho bedo jopath ro ngoye gi niaŋ; cwo pajo m'iworo jotho kec, aka ji ma kisi ndelo jolatho ro riyo pi.

¹⁴Riameno piny pa jom'otho kec neko rijo, aka oyawo dhoke malac, mwonyo jodhum ma Yerusalem, kanyacel gi ji ma kisi ndelo, lwak ji pere gi jono je ma yodere gine.

¹⁵Ji jokule piny, kisi dhano idwoko piny, aka ilamwolo jodelok.

¹⁶To Rwoth pa lwak jolweny, nyutho dwoŋ pere gi timo gim'otire, aka Were Maleŋ nyutho leŋo pere gi tiro.

¹⁷Nyithindhi rombo jolacemo i kakwath pajo, jopath jolacamo bor mere i gundin.

¹⁸Kidamba ri jono, ma joywayo reco g'adasa ma twodo, jono ma joywayo reco paka gi thondhe ma magal.

¹⁹Jono ma jowaco ni, “Weyi Rwoth wokwakere, weyi woredi timo tic pere, ŋey wanyal neno. Weyi atoŋa pa Were Maleŋ pa Isiraili worikere, weyi wobin, ŋey wanyal ŋeyo!”

²⁰Kidamba ri jono, ma jolwoŋo raco ni bero, aka bero ni raco, wiketho mudho ri lero, aka lero ri mudho, wiketho keco ri mito, aka mito ri keco!

²¹Kidamba riwin, ma wiriek ruwaŋ win wegi, aka wijorieko kweth!

²²Kidamba ri waseni, ma joloyo i math, jombaka i ruwo math!

²³Win ma wiweyo jokomo kadho ro cami nyew, aka wimono ji ma bubanja tiro!

²⁴Riameno, paka lew mac reyo woko kanja, aka paka lum m'othwo munyere piny i mac maliel, ameno apaka fuc pajo latop, aka thiw joladuny paka fukefuke. Ato jokwero cik pa Rwoth pa lwak jolweny, aka jotieko cayo wac pa Were Maleŋ pa Isiraili.

²⁵Riameno nge pa Rwoth oliel kwoŋ ji pere, aka orieyo cinge kwoŋ jo to rwadho jo, gote joyengere, delkwoŋ jom'otho odoŋ i royo paka yuk. Kucel kiri gi gime je, Rwoth fodi nigi nge, aka fodi orieyo cinge ma miyo gir'acula.

²⁶Rwoth lamiyo ranyuth ri nono mabor, lamwoŋo ri ji i gike ma piny. E jobino, mayil yil, ma piyo piyo!

²⁷Ongoye kwoŋ jo ŋat'olacere, ongoye ŋata ceri, ongoye ŋata nur kosa nindo. Ongoye kisiwiro m'olwogere, kosa thol war m'ocot.

²⁸Aserin pajo bith, atum bor pajo ogondere, tiendi kayina pajo tek paka tele ma cot mac, tiendi cawilin pajo wire paka asur.

²⁹Joŋur paka simbwor, joŋur paka nyithindhi simbwor; joŋur aka jomako cemo pajo, jotiŋo woko, to ngoye ŋat'onyali botho.

³⁰Jolaŋur kwoŋ Isiraili i ndelo no, paka nam ma ŋur. Aka ka nyatoro oŋiy lowo, neni, mudho gi litho kende, aka lero umere gi colo ma pondeponde.