Read dhopadhola Isaya 51 Bible Online

Isaya 51 - dhopadhola bible

Isaya 51

¹Winjan win, win ma widwaro both, win ma wirango Rwoth. Ŋiy win tele kama wiwok'iye, kam'iŋiny'iye telin m'okuny'iye win.

²Ŋiy win Abraham kwari win, gi Sara m'onywolo win. Kole Abraham oyido ongoye gi nyathi munyo alwoŋo go, to, amiyo go silwany gi nyithindho, aloko nyikway go kweth.

³Kole Rwoth layomo cuny Zayon; gi jono je ma jobedo i gundin mere. Go laloko thim mere paka Eden, aka opalipat mere paka ndelo pa Rwoth. Forok gi kisangala lanwaŋere i go, foyo kodi dwondi ma wer.

⁴Winjan win, ji paran, winji win gim'awaco, nono paran. Amiyo piny fonji paran, aka tiro paran kelo lero ri ji.

⁵Alabino piyo botho jo, both paran nitie cegin. An won aladhumo ji. Piny ma thengi nam jokuran, jokuran adhum jo.

⁶Tiŋi waŋ win malo i polo, aka wiŋiy pendi piny. Kole polo larere paka yiro, piny lati paka nanga, aka jono ma jobed'iye jolatho paka lwaŋino. To both paran bedo cil gi cil aka loyo paran langoye gi gike.

⁷Winjan win, win ma wiŋeyo tiro, win ma winigi fonji paran i cuny win, wikiri wilwor yet pa ji man, aka wikiri wilwor ka jowaco riwin gima ŋedho cuny win.

⁸Kole masirigi lacamo jo paka nanga, aka kudin lacamo jo paka famba; to loyo paran labedo ma cil gi cil, kodi both paran ri luse je.

⁹Cew, cew, ruk meni, Awi cingi Rwoth, cew paka ndelo macene, ri luse ji ma cango con! Iŋati cango ikitoŋo Rahab mathindho thindho, iŋat'ikicwowo bulir?

¹⁰Iŋat'ikithwo woko nam, pi maluth swa, t'itimo royo ri ji perin i nam, ŋey ji m'ibotho jowonyal ŋado?

¹¹Ameno ji ma Rwoth obotho joladwoko, to jobino i Zayon gi wer, forok ma bu gike bino bedo rijo. Jobino nwaŋo forok gi kisangala, aka kumo gi hamo bino ngoye woko.

¹²An, Rwoth, aŋat'ayomo cuny win, onyo in ŋa m'ilworo nyaka dhano ma tho, wod dhano ma cal lum.

¹³Wiwin owil gi Rwoth, jacwec mewin, m'oyaro polo, to geto misingi ma piny. Wimedo bedo gi lworo ndelo gipi, ro nge pa jono ma jodiyo win, jono ma joyikere reyo win woko? Nikune keme pa joma jodiyo win?

¹⁴Jono m'idiyo ilagonyo jo piyo, jokilatho to jokadho piny i bur, kosa jok'ocandi cemo.

¹⁵Kole Abedo Rwoth, Were mewin, ma tugila nam to koyo mere hola, Rwoth pa lwak jolweny a nyinge.

¹⁶Atieko ketho wac paran i dhok win, t'akano win i tipo ma cingan, arieyo polo, t'ageto kindi piny, k'awaco ri Zayon ni, “Wibedo ji paran.”

¹⁷Cew, cew! Ay malo, awi Yerusalem, witieko madho i cingi Rwoth, kikopo ma keme pere, witieko madho to wiloko thiŋ, acero m'omiyo win kitangatanga.

¹⁸Ongoye ŋat'otel go, i dier yac je ma go onywolo, ongoye ŋat'omaki cinge, kwoŋ yac je ma go opidho.

¹⁹Teko ario opodho kwoŋin, ŋa m'oywaki kodin? Kisika gi rerok, kec gi lweny, ŋa m'oyom cuny win?

²⁰Ji mewin jolocere, joriere i sonda ma kisi royo, paka amudhe m'omoko i bwo, jopoŋ gi keme pa Rwoth, bwok pa Were mewin.

²¹Riameno winji win gime, win ma wilimo litho, ma wimer, to makiweno gi vini.

²²Rwoth mewin waco ama, Rwoth, Were mewin ma osa ri mito pa ji pere. Neni, akwanyo woko kikopo ma kitangatanga i cingi win, wik'omedhi kendo, wok i bakul ma keme paran.

²³Aka alaketho i cingi joma pilo win, jono ma jotieko waco riwin ni, “Kule win piny, ŋey wanyal kadho.” Witieko loko dieŋey win ka nyono, paka royo rijo aluwa.