Read dhopadhola Isaya 53 Bible Online

Isaya 53 - dhopadhola bible

Isaya 53

¹Ŋa m'oyeyo gima watieko winjo? Aka ri ŋa ma cingi Rwoth otieko menyirok?

²Ŋeca pa Rwoth odongo paka dudi ma nyaka rwako fuc i lowo m'othwo. Go oyido ongoye gi dwoŋ kosa ŋono, m'omiy waŋiy go, kosa cal moro kwoŋe ma d'oyway cuny wan, kosa ŋono ma d'omiy wawanya go.

³Ji jocayo go, aka jokwedere kwoŋe, dhano ma jarem, gi candirok madit. Ongoye ŋat'obolo kada waŋe ŋiyo go, wacayo go, aka wakidewo kwoŋe paka ŋata dikony.

⁴Adieri go ociro kumo m'oyido d'obedi mawan, to tiŋo rem mawan; kucel waparo ni ber ogoy go, aka ni Were won am'ogoyo go to miyo go litho.

⁵To olimo adhola ro reco mawan, oyure ro raco mawan. Gir'acula pere miyo wan kwo gibe, aka luth m'ogoy go cango two mawan.

⁶Wajoje oyido wacal rombo m'orwenyo, kisi moro ocomo yo pere, to, Rwoth miyo gir'acula podho kwoŋ go, gir'acula m'oyido waŋati waripo limo.

⁷Olimo adica, to limo litho, kucel go k'oyawo dhoke; paka rombo m'itero yaŋo, paka rombo m'icegin lielo, ameno go k'oyawo dhoke.

⁸G'adica kodi thumo banja, oter go neko; paka ri luse pere, watero ni go oyido ripo gi tho, wogoy go ro kibenga pa ji paran?

⁹Oyiki go i kaliel paka jokidakana, oyiki go paka joŋaŋo, makada nende go oyido bubanja, kosa k'oluwo twodo gi dhoke.

¹⁰Kucel obedo mito pa Rwoth ni go wolimi litho; to miyo go kumo, munyo olokere cowirok ma cwako reco, go laneno nyikwaye, go lamedo ndelo pere; aka luwo i go atoŋa pa Rwoth latundo i kare.

¹¹Rumacen ma kwo ma candirok, go laneno kisangala; go laŋeyo ni k'ocandere ma nono. Ŋeca paran m'omiyere, aka ma sangala an, latiŋo gir'acula pa ji kweth, aka ro go alacwako rijo.

¹²Riameno alapoko go migew gi jomadongo, go lapoko lim m'onyaga gi jom'ocwiny; rupiri okonjo woko kwo pere i tho, t'ikwano go gi joreco; kucel otiŋo reco pa ji kweth, to kwayo ri joreco.