Read dhopadhola Isaya 55 Bible Online

Isaya 55 - dhopadhola bible

Isaya 55

¹Rwoth waco ni, Biye, ŋata riyo neko je, biye i pi! Biye, ŋat'ongoye gi pesa, biye nyewere t'icemo! Biye, nyew vini gi cak, m'ongoye pesa kosa cul.

²Raŋo wioro pesa ri gima k'obedo cemo, gi meni mewin ri gima kiyeŋ win? Winjan win maber, aka wicam gimaber, to wiyodere gi cemo ma dicwe.

³Ciki ithi win, aka wibin bongan, winji win, ŋey cuny win wonyali kwo. Alatimo gi win cikirok ma cil gi cil, mar paran makiwire, mar'adieri ri Daudi.

⁴Neni, aketho go mijulisi ri ji, jatel aka jamituka pa ji.

⁵Neni, ilalwoŋo nonin ma fodi ikiŋeyo, aka piny m'oyido k'oŋeyin laringo bino bongin, kwoŋbedo An abedo Rwoth, Were Maleŋ pa Isiraili, rupiri go otieko miyin dwoŋ.

⁶Rangi Rwoth, ka go fodi nyalo nwaŋere, lwoŋ Rwoth, ka go fodi nicegin.

⁷Weyi jokidakana jowojwangi yo pajo, jowowey paro pajo marac; weyi jowogiki bongi Rwoth, ŋey wonyali timo gi jo ŋono kodi bongi Were mawan, kole go lacwako i thotho.

⁸Kole paro paran k'obedo paro mewin, aka yo paran opokere kwoŋ mewin, Rwoth waco.

⁹Kole paka polo bor yombo piny, apaka yo paran nitie malo kalo mewin, aka paro paran kalo paro mewin.

¹⁰Paka koth gi fumbi jobino piny wok i polo, aka jokigiki malo cuka jotieko dhieko piny, to jomiyo gim'opidhi twi gi dongo, miyo jacwoyo kodhi gi cemo ma camo.

¹¹Ameno apaka wac ma wok i dhokan labedo, k'ogiki bongan nono, to lamiyo atoŋa mere wotundi i kare, latimo kisi gim'adhiro ni wotim.

¹²Kole wilaweyo Babilon gi kisangala, aka ilatelo win ka widok i siem. Gote gi tendere jolamwoc gi wer, aka yen madudi jolagoyo adhoŋ.

¹³Yen lwiyo latwi kama pama kudhin nitie i iye, aka yen ma lile malo latwi kama pama kayongo nitie i iye. Me labedo rapoy ri Rwoth, ri ranyuth ma cil gi cil ma k'orumi.