Read dhopadhola Isaya 57 Bible Online

Isaya 57 - dhopadhola bible

Isaya 57

¹Ji ma jotimo gim'otire jotho, aka ongoye ŋata dewo; ji ma jomiyere irwenyo gi jo, kucel ongoye ŋata niaŋ kwoŋe. Kole ibotho ŋat'otire i teko,

²Go donjo i siem, joywomere i siem, rupiri jotimo gim'otire.

³To win, core win ka, win nyithindho pa jothieth, nyithindho pajo jacot gi jakidakana.

⁴Witimo gi nyero gi ŋa? Wiŋamo dhok win malac kwoŋ ŋa? Wijwiyo ŋa? Wikibedo nyithindho mareco, nyikway jotwodo.

⁵Win ma wiwaŋ g'awanya i tiendi podo, i kisi tiendi yen moro je. Win ma withumo nyithindho mewin i milelin, i kisi ŋungu telin?

⁶I kisi telin mafoth ma milelo winwaŋ'iye werin mewin; jobedo adec mewin. Wikonjo rijo mic ma vini gi mic ma cemo. Gino osangala an?

⁷Wipedho kanindo mewin, malo wi gote mabor, aka kenyo ama wimiyo cowirok.

⁸Yucen ma thigo gi dhiot mewin, wiketho ranyuth mewin, onyo ma weyan, witieko yawo kanindo mewin, aka w'idho kanindo mewin malac gi jomitirok mewin ma winyewo nindo gi jo, witieko maro kanindo pajo, witieko neno kinyoro pajo.

⁹Wikidho bongi were Molek, kareno wiwiro mo mewin maŋwe kur nger gi nger, widhiro jomikwenda mewin bor swa, widhiro jo kiri i piny pa jom'otho.

¹⁰I thotho ma woth mewin, oyido wilacere to wikiwaco ni “Obedo gim'ongoye kony.” Winwaŋo kwo manyen ri meni mewin, aka ameno wikinyapere.

¹¹Ŋa m'oyido wikirin to wilworo, m'omiyo witwodo, wikipoyan kosa wikiparo kwoŋan? Wikwero lworan, kwoŋbedo aliŋ ma hongo mabor?

¹²Alakedho kamaler tiro mewin gi tic mewin, to jok'okony win.

¹³Ka winogoy koko, weyi cal makicar mewin ma wicoko jowobothi win! Koyo latiŋo woko, luya won lakudho jo. To ŋata pondo i an, lalimo lowo, to lunjo got paran maleŋ.

¹⁴Aka ilawaco ni, “Geti win, geti win, yik win yo, kwany win woko rageŋ mogo je i royo pa ji paran.”

¹⁵Kole Jamalo swa, ŋataleŋ waco, go makwo cil gi cil, ma nyinge Leŋ. Abedo kam'oŋawere, kamaleŋ, gi jono bende ma joŋuto aka jobwonere i cuny, dwoko cuny jomamwol, gi dwoko cuny joma ŋuto reco.

¹⁶Kole akilamedo kisegeya ji paran, kosa mako nge noknok. Kole bongan ama cuny wok'iye, aka atieko timo luya ma kwo.

¹⁷Amako nge gi jo ro awanya gi reco pajo, amiyo jo gir'acula, apondo rijo aka oyido amako nge; to jomedo gik cen i yo ma cuny jo wegi.

¹⁸Atieko neno yo pajo, to alacango jo; alatelo jo, aka alayomo cuny joma ywak miyo ji pere ma ywak nyero.

¹⁹Rwoth waco, siem, siem, ri joma nitie bor gi cegin, aka alacango jo.

²⁰To jokidakana jocale nam ma dewadewa, ato kinyal kwe, pi mere ma dewadewa ulo koco gi cwodho.

²¹Were paran waco ni, “Siem ongoye ri jokidakana.”