Read dhopadhola Isaya 59 Bible Online

Isaya 59 - dhopadhola bible

Isaya 59

¹Neni, cingi Rwoth kicek ma kinyal botho, kosa ithe k'ocule ma kinyal winjo.

²To, obedo reco mewin, ama poko win gi Were mewin, aka omiyo go pano waŋe kwoŋ win, aka kiwinji kwayo mewin.

³Cingi win oduwere gi remo, lwet win opoŋ reco, dhok win luwo twodo, aka lew win tuco kidakana.

⁴Ongoye ŋata donjo i kapido g'adieri, aka wiluwo twodo i kapido; wigoŋere kwoŋ ywakirok ma twodo, joluwo twodo, witimo can mewin ma miyo joman litho.

⁵Jotoŋo tongi malasaŋ, jowiyo od bumbu; ŋata camo tongi jo je tho, aka tongi jo m'oŋidhi toŋo malasaŋ.

⁶To, od bumbu kinyal bedo rijo paka nanga; ji jok'onyal um kodi gima jotimo. Tim pajo obedo tim mareco, aka tim mar'akaka ama ni cingi jo.

⁷Tiendi jo yot timo gimarac, aka joredo oyo remo pa ji ma bubanja; paro pajo obedo paro mareco, joreyo ji aka joweyo gundin i ngudin pajo madongo.

⁸Jokuya yo ma siem, aka tiro ongoye i yo pajo. Royin pajo ma jotimo okom, aka ongoye ŋata woth i jo m'oŋeyo siem.

⁹Riameno, tiro nitie bor gi wan, aka tiro kitundi riwan, wakuro lero, to neni, mudho ama nitie. Wakuro piny wocoti, to wawotho i mudho.

¹⁰Wamudamuda pa joma waŋ jo otho, wacer odieceŋ par, paŋini i hongo ma nyaka waŋceŋ podho, aka i dier jomwamba wacale jom'otho.

¹¹Waŋur paka arara, warembo paka akurin. Wakuro tiro, to ongoye; wakuro both, to nitie bor gi wan.

¹²Kole reco mawan thoth ruwaŋin, aka josegeya wan ruwaŋin. Wapoŋ gi reco, aka waŋeyo reco mawan.

¹³Wagwenyere to wakwedere kwoŋ Rwoth, aka wakwero luwo Were mawan. Waluwo wac mar'adica gi ma gwenyirok, waere gi wac ma twodo aka watuco jo wok iy'adundin mawan.

¹⁴Tiro odwoki yucen, aka ongoye gim'otire m'itimo. Kole adieri ongoye i kapido, aka genirok ongoye.

¹⁵Adieri ongoye, aka ŋata temo weyo gimarac lokere jabanja. Munyo Rwoth oneno ni tiro ongoye, go k'osangala.

¹⁶Rwoth odhier munyo ongoye ŋat'okony ji m'idiyo, ameno cingi go ma meni, okelo rigo loyo aka obotho jo.

¹⁷Oruko tiro paka kwot ma lweny, gi both paka junga i wiye, to ruko nangin ma culo kwor, to boyere i nge paŋini del m'itwere gine.

¹⁸Cungo kwoŋ tim pajo go laculo jo; keme pere ri jokwor pere, culo kwor ri jokwor pere, go laculo kwor ri piny ma yuthengi nam.

¹⁹Ameno ji ma yupodho ceŋ jolalworo nyingi Rwoth, aka ji ma yuwok ceŋ jolamiyo go dwoŋ, kole go labino paka malawa ma ule, ma koyo pa Rwoth ama gweyo.

²⁰Aka go labino i Zayon paka Jaboth, kodi ri nyikway Yakobo, ma joŋuto reco pajo, Rwoth waco.

²¹Aka ri an, Rwoth waco, me cikirok paran gi jo. Cuny paran nitie kwoŋ win, aka wac paran m'atieko ketho i dhok win kilaeye i dhok win, kosa i dhok nyithindho mewin, kosa dhok nyikway win, wok pama kadho yuwaŋe gi cil gi cil.