Read dhopadhola Isaya 60 Bible Online

Isaya 60 - dhopadhola bible

Isaya 60

¹Ay, liel; Yerusalem, kole lero perin otieko bino, aka dwoŋ pa Rwoth otieko liel kwoŋin.

²Kole mudho laumo piny, aka mudho m'opoto laumo ji, to Rwoth layweyo ŋamba kwoŋin, aka dwoŋ pere laneno kwoŋin.

³Nonin jolabino i lero perin, aka kerin jolabino i lero ma ŋamba perin.

⁴Tiŋi waŋin malo iŋiy korin gi korin, jo je jocokere kanyacel, jobino bongin, wotin jolabino wok bor, ilakideda nyikin i cingin.

⁵Kenyo ilaneno t'ipoŋ gi kisangala, cunyin lapoŋ mo to fore, rupiri lim ma nam je ladwoko bongin, lim pa nonin je ladwoko bongin.

⁶Ŋamin kweth ma kikwanere jolaumin, ŋamin ma nyaka joay ma Midian gi Efa, gi ma jowok i Seba je jolabino. Jolakelo zahabu kodi buban, aka jolatuco pak pa Rwoth.

⁷Ilacoko rin mwendi je ma Kedar, wot rombo ma Nebayoth je ilamiyin paka cowirok, alajolo jo i wi migam paran, aka Rwoth lamiyo ot pere wobedi gi dwoŋ loyo.

⁸Me jokune, ma joay paka pondeponde, paka akurin ma jodok i od gin?

⁹Kole piny ma yuthengi nam jolakuran, mele ma Tarsis marapena, ma lakelo wotin wok bor, jolabedo gi feza gi zahabu pajo, ma miyo nyingi Rwoth Were perin dwoŋ, ri Ŋataleŋ pa Isiraili, rupiri go otieko miyin dwoŋ.

¹⁰Rwoth waco ri Yerusalem ni, “Jopath jolageto cel perin kendo, aka kerin pajo jolatic rin. Amiyo win gir'acula i keme paran, to i mar paran, atieko timo gi win ŋono.

¹¹Waŋkace perin layawere noknok, kilacego odieceŋ gi wor, ŋey piny jowokeli rin lim pajo, ka kerin pajo jotelo jo i woth.

¹²Kole piny gi ker, ma k'otiy rin jolakisika, ilareyo woko kicutho.”

¹³Dwoŋ pa Lebanon labino rin, mbawin ma yen mabeyo, ma geto Yerusalem kendo, loko Kabedo Maleŋ paran maŋon, aka alamiyo kabedo ma keth'iye tiendan dwoŋ.

¹⁴Nyikway jono ma cango jodiyin jolabino bwonirok ruwaŋin, aka jono ma jocayin, jolaguro rin congi gin. Jolalwoŋin Tindi madwoŋ pa Rwoth, Zayon, tindi madwoŋ pa Were ma Leŋ pa Isiraili.

¹⁵Makada nende oyido ajwangin aka adakin, m'oyido ongoye moro je ma luwo kenyo, alalokin madwoŋ aka maŋon cil gi cil, gi kisangala wok i luse tundo i luse.

¹⁶Iladhotho cak pa nonin, iladhotho thundho pa kerin, aka ibino ŋeyo ni An, Rwoth abedo Jaboth perin, aka Jagony perin, Jameni pa Yakobo.

¹⁷Alakelo rin zahabu i kabedo pa ywel, alakelo rin feza i kabedo pa nyweny, ywel, i kabedo pa mbawo, nyweny i kabedo pa telin. Jodhum mewin jokiladiyo win kendo; alamiyo jo dhumo gi tiro kodi siem.

¹⁸Akaka k'obedi kendo i lowo perin, rerok gi kisika gigipiny langoye. Wilalwoŋo kor udi mewin ni both, waŋkace mewin ni pak.

¹⁹Ceŋ kilabedo lero perin odieceŋ, kosa dwe wor; to Rwoth, ama labedo lero perin ma cil gi cil; aka Were perin labedo dwoŋ perin.

²⁰Ceŋ perin kilapodho, aka dwe perin kilapodho; kole Rwoth labedo lero perin cil gi cil, aka ndelo perin ma ywak latundo i gike.

²¹Ji perin je jolabedo jom'otire, aka jolabedo gi lowo cil gi cil. Jobedo kolo m'apidho, tic ma cingan, ŋey anyal limo dwoŋ.

²²Ma sisiri kwoŋ jo, lalokere nono, aka mathin loyo lalokere madwoŋ paka piny matek, An abedo Rwoth, i hongo mere, alamiyo gime wotimere piyo.