Read dhopadhola Isaya 62 Bible Online

Isaya 62 - dhopadhola bible

Isaya 62

¹Ro Zayon, akilaliŋ, akilaywomere ro Yerusalem; cuka tiro pere oliel paka ŋamba, aka both pere paka tala m'ocwiny maliel.

²Nonin jolaneno tiro perin, aka Kerin je jolaneno dwoŋ perin. Ilalwoŋin gi nyingin manyen, ma Rwoth lacwoko gi dhoke.

³Ilabedo sangaria ma ŋono i cingi Rwoth, gi sangaria ma keri i cingi Were perin.

⁴Kilalwoŋin kendo ni m'ojwangi, kosa lowo perin ni Gunda. To ilalwoŋin ni Kisangala paran ni go, gi lowo perin ni m'onywomere. Kole Rwoth sangala kodin, aka lowo perin lanywomo.

⁵Kole paka jayac nywomo dhako mambula, ameno apaka yac perin lanywomin. Aka paka jamweha fore gi mweha pere, ameno apaka Were perin lafore kodin.

⁶Awi Yerusalem, aketho jokur, i kor udi perin, odieceŋ gipi gi wor gipi; jokilaliŋ. Jono ma jopoyo Rwoth, jokiywomere.

⁷Jokilaywomere, cuka go ogeti Yerusalem, to loko pak i piny.

⁸Rwoth otieko kwoŋere gi cinge maracuc, gi bade ma meni ni, “Ak'omiy kendo ŋano mewin, wobedi cemo ri jokwor mewin, aka jokicar jokilamadho vini mewin, ma witieko oyo rigo kwok.

⁹To jono ma jopidho to jokeco jolacamo, to jopako Rwoth. Jono ma jopidho to jofono vini jolamedho, i diedipo ma ot paran.”

¹⁰Donji win, donji win gi waŋkace, yik win yo ri ji; geti win, geti win ngudo madwoŋ, kwany win woko telin manitie i iye, tiŋi win ranyuth ri ji.

¹¹Neni win, Rwoth otieko tito ri witum ma piny. Waci win ri nyar Zayon ni, “Neni, both perin bino, kemba pere nitie gi go, kodi cul pere ruwaŋe.”

¹²Aka ilalwoŋo jo ni ji maleŋ mapa Were, ji ma Rwoth obotho, aka ilalwoŋin ni m'odwar, tindi madwoŋ ma k'ojwangi.