Read dhopadhola Isaya 63 Bible Online

Isaya 63 - dhopadhola bible

Isaya 63

¹Me ŋa ma bino wok i Edom, wok i tindi madwoŋ Bozra gi nanga m'ocido m'obokere? Ŋa me m'orukere swa, ŋanjo gi meni ma teko pere? Obedo an, ma langa loyo pere, aka nigi meni ma botho.

²Raŋo kanzu perin obokere, aka nangin perin cal nanga pa jadhiŋ vini?

³“Atieko nyono piny nonin paka nyingi vini, aka ongoye ŋat'obino konyan. Apor kwoŋ jo i nge paran, aka anyono jo i keme paran, remo pajo okire i nangin paran, aka ocido kanzin paran.

⁴Kole ndelo ma culo kwor oyido nitie iy'adundo paran, aka oro paran ma both otieko bino.

⁵Aŋiyo, to oyido ongoye ŋat'okonyan, adhier, to ngoye moro m'othielan, ameno cingan won am'okelo ran loyo, aka keme paran othielan.

⁶Anyono ji piny i nge paran, amero jo i keme paran, aka akonjo remo ma kwo pajo piny.

⁷Alaluwo kwoŋ tim ma mar pa Rwoth makiwire, pak pa Rwoth, cungo kwoŋ gimoro je ma Rwoth otieko miyo wan, gi bero pere madwoŋ ri ot pa Isiraili m'otieko miyo jo ro ŋono pere, cungo kwoŋ mar pere mathoth makiwire.

⁸Kole go owaco ni, adieri jobedo ji paran, nyithindho ma jokinyal wondan, to go lokere jaboth pajo.

⁹I litho pajo je, go olimo litho, to malaika pere botho jo. I mar pere gi wor pere, go obotho jo, otiŋo jo malo to rendo joje i hongo macene.

¹⁰To jogwenyere kwoŋ Rwoth, aka jomiyo cuny maleŋ pere nge. Riameno go olokere jakwor pajo, aka go won gipi olwenyo gi jo.

¹¹Nyaka to poyo hongo macon, hongo pa Musa ŋeca pere. Aka jopenjo ni, nikune Rwoth m'owodho, jokwath rombo pere woko i nam? Nikune go m'oketho i dier jo cuny maleŋ pere?

¹²Nikune Rwoth m'omiyo meni pere madwoŋ, kidho i cingi Musa maracuc, poko pi i diere ruwaŋ jo, ma timo rigo nyinge ma cil gi cil?

¹³Ŋa m'otelo jo i lutho? Paka kayina iy'opalipat, jok'ocer.

¹⁴Cuny pa Rwoth omiyo jo ywomirok, paka dhok ma jodonjo i milelo. Ameno apaka itelo ji perin, ma miyo nyingin dwoŋ.

¹⁵Ŋiy piny wok i polo, ineni, wok i kabedo perin maleŋ aka didwoŋ. Nikune kinen perin gi meni perin? Mito mar'adundo perin gi wor perin opanere kwoŋan.

¹⁶Kole in a Bawan, makada nende Abraham okuya wan, aka Isiraili kiyey wan, in, Awi Rwoth, ibedo Bawan, jaboth mawan wok cango obedo nyingin.”

¹⁷Awi Rwoth, raŋo imiyo warwenyo gi yo perin, aka iridho adundin mawan matek, ma wakinyali lworin? Dwoki, ro ŋecin perin, nonin ma jobedo alunja perin.

¹⁸Ji perin maleŋ jobedo i Kabedo Maleŋ perin ma hongo macek, jokwor mawan jotieko nyono piny.

¹⁹Watieko lokere jono ma fodi ikidhumo, paka jono ma jokilwoŋere gi nyingin.