Read dhopadhola Isaya 64 Bible Online

Isaya 64 - dhopadhola bible

Isaya 64

¹Kabed'iyec polo t'iloro piny, ŋey gote jowonyal yengirok ruwaŋin,

²paka mac cwinyo dudi, gi paka mac miyo pi walo, ma miyo nyingin ŋeyirok ri jokwor perin, gi nonin kirin ruwaŋin.

³Munyo itimo tim ma kelo lworo m'oyido wakigeno, iloro piny, gote joyengere ruwaŋin.

⁴Wok cene ongoye ŋat'otieko winjo, kosa m'otieko niaŋ gi ithe, ongoye waŋ m'otieko neno Were man kwanyowoko in, ma timo nger tim no ri jono ma jokuro go.

⁵Ikonyo jono ma jotimo gim'otire gi kisangala, jono ma jopoyin i yo perin je. Neni, nge oyido omakin, to watimo reco; watieko timo reco ma hongo malac, aka wanobothi?

⁶Wajoje watieko lokere ŋata koc, aka tim mawan maber je cal okuto. Wathwo paka boke, aka reco mawan kudho wan, paka koyo.

⁷Ongoye ŋata lwoŋo nyingin, kosa ma temo goŋirok kwoŋin; kole ipano riwan waŋin, aka iolo wan i cingi reco mawan.

⁸Kucel, Awi Rwoth, ibedo Bawan, wabedo lowo nyamasiga, aka ibedo jacwec degi, wajoje wabedo tic ma cingin.

⁹Awi Rwoth, ikir'imaki nge tektek, aka ikir'ipoy reco cil gi cil. Neni, dew ni wajoje wabedo ji perin.

¹⁰Tindin perin madongo maleŋ jotieko lokere thim, Zayon olokere thim, Yerusalem olokere gunda.

¹¹Ot mawan maleŋ aka ŋon, kama kwarere mawan jopakin'iye, owaŋ gi mac, aka kabedo mawan je ma josiemo wan jolokere gundin.

¹²Awi Rwoth, ka gigipiny me je timere, ik'opar kwoŋe? Inoliŋaliŋa, t'imiyo wan gir'acula malith?