Read dhopadhola Isaya 65 Bible Online

Isaya 65 - dhopadhola bible

Isaya 65

¹Rwoth waco ni, Oyido ayikere dwoko kwayo pa ji paran, to jok'okwayan. Oyido ayikere jowonwaŋan, to jok'orangan. Awaco ni an e, an e, ri piny ma k'olwoŋo kada nyingan.

²Arieyo cingan ndelo gipi, ri ji ma jogwenyere, ma jowotho i yo ma kiber, joluwo rieko pajo wegi.

³Ji ma jomiyan nge, ruwaŋan radhik, jomiyo cowirok manyakafir i ndelin, aka jowaŋo buban i wi matafalere.

⁴Jobedo i dier kaliele, aka jotero wor gipi i kabedo m'opondo; jocamo riŋo mbiji, aka jomadho kado dek ma riŋo makoc iy'ayigin pajo.

⁵Jowaco ri joman ni, “Wikiri wicore cegin gi wan! Kole waleŋ swa ma kiber oyido wimul wan.” Nger jono jocale yiro i uman, mac maliel ndelo gipi.

⁶Neni, gir'acula pajo ondiki i ruwaŋan, akilaliŋ to alaculo jo, gima rom gi reco pajo.

⁷Reco pajo gi reco pa kwarere pajo. Rwoth waco. Jowaŋo buban ri cal makicar wi gote, joluwo marac kwoŋan, ameno alamiyo jo, gir'acula je ri tim pajo.

⁸Me apaka Rwoth waco, paka vini inwaŋo i kayego, aka jowaco ni, “Ikir'irey woko, kole nitie silwany i iye.” Ameno apaka alatimo ro ŋecin paran, ak'orey woko joje.

⁹Alayero nyikway Yakobo, aka nyikway Yuda jolalunjo gote paran. Ji paran m'ayero jolalunjo, aka ŋecin paran jolabedo kenyo.

¹⁰Saron labedo kakwath mwendi, aka milelin ma Akor kaywomirok ri dhok, ri ji paran ma jorangan.

¹¹To win, ma wijwango Rwoth, ma wiy win wil gi got paran maleŋ, aka wijengo meza ri Gad gi Meni, werin ma silwany gi lifol, to wipoŋo kikopere ma vini m'oruw.

¹²Silwany maber mewin labedo, tho malith g'abor, kwoŋbedo munyo alwoŋo, wikidwoko, munyo aluwo, wikiwinjo, to witimo gimarac ruwaŋan, wiyero gima kisangala an.

¹³Riameno me apaka Rwoth Were waco, ŋecin paran jolacemo, to kec laneko win, ŋecin paran jolabedo gi gir'amadha, to riyo laneko win, ŋecin paran jolafore, to wilabedo giwickwot.

¹⁴Ŋecin paran jolawero ri kisangala ma cuny jo, to wilaywak ro arama cuny, aka wilaywak gi cuny win m'otur.

¹⁵Ŋecin paran jolaoro nyingi win ma kwoŋo, aka an, Rwoth Were alaneko win, t'amiyo ŋecin paran nyingi jo man.

¹⁶Kenyo kisi ŋata kwayo silwany i lowo, lakwayo gi Were ma timo adieri, aka kisi ŋata timo cikirok i lowo, latimo gi Were ma timo adieri, kwoŋbedo teko macon larumo aka kilapoyo.

¹⁷Kole acweyo polo manyen, gi piny manyen, k'opoy gigipiny macon, kosa k'opar kwoŋe.

¹⁸To sangala win aka fore win cil gi cil, i gim'acweyo; kole neni, acweyo Yerusalem lapoŋ forok, aka ji mere jolabedo kisangala.

¹⁹Alafore i Yerusalem, t'asangala i ji paran; derino ma ywak k'owinjere kendo i iye, kosa ywak ma litho.

²⁰Ongoye nyathi ma latho ma fodi ŋic, kisi dhano lakwo kiri i tiyo. Ŋat'otho munyo jaoro miya acel ilawaco ni oyido fodi soye, aka ŋat'otho mafodi k'otundo oro miya acel ilawaco ni olam go.

²¹Ji jolageto udi to wegi jobed'iye, jolapidho ndelo vini to jocamo olemo mere.

²²Jokilageto udi to joman ama jonind'iye, jokilapidho ndelo vini to joman ama jocamo. Ji paran jolakwo to joti paka yen, aka ayera paran jolawinjo cwe ma hongo malac ma tic ma cingi jo.

²³Jokilatiyo manono, kosa nywol nyithindho to jolimo teko, Rwoth lamiyo nyithindho pajo, kodi nyikway jo silwany.

²⁴Kiri mafodi jok'olwoŋan, aladwoko jo, mafodi jok'ocowo luwo alawinjo.

²⁵Arara gi nyathi rombo jolacemo kanyacel, simbwor lacamo kanja paka dhok, to cemo pa thwol labedo fukefuke! Jok'omiy litho kosa reyo, wi got paran maleŋ je, Rwoth waco.