Read dhopadhola Isaya 66 Bible Online

Isaya 66 - dhopadhola bible

Isaya 66

¹Me apaka Rwoth waco, polo obedo kom ma dhum paran, aka piny obedo kama aketh'iye tiendan. Nger ot aŋo ma winyalo geto ran, aka kune m'anyalo ywomirok'iye?

²An, aŋat'acweyo gigipiny me gi cingan, aka je jobedo aparan, Rwoth waco. To me a ŋat'aladwaro, ŋata mwole aka bwonere i cuny ma kirin i wac paran.

³Ŋata thumo mirikwa cale gi ŋata neko dhano, ŋata ma miyo cowirok ma rombo, cale gi ŋata turo ŋuti gwok, ŋata miyo mic ma cemo manyinge, cale gi ŋata miyo cowirok ma remo mbiji; ŋata timo mic ma rapoy ma buban, cale ŋata miyo cal makicar silwany. Jome joyero yo pajo wegi, aka cuny gin siemere i mienirok pajo.

⁴An bende ayero miyo jo litho, gi kelo kwoŋ jo gima jolworo; kwoŋbedo munyo alwoŋo, ongoye ŋat'odwoko, munyo aluwo, ongoye ŋat'owinjo; to jotimo gimarac ruwaŋan to joyero gima kisangala an.

⁵Winji win wac pa Rwoth, win ma wikirin i wac pere. Wutmin win ma jodak win, aka jobolo win woko ro nyingan, jowaco ni, “Weyi Rwoth omiy dwoŋ, ŋey wanyal neno kisangala perin” To jo am'ila ketho jo i wickwot.

⁶Winji, koko nitie i tindi madwoŋ, derino wok i Ot pa Were! Dwondi Rwoth, miyo jokwor pere gir'acula!

⁷Mafodi ŋedi k'oramo go, to go nywol; ma fodi litho ma nywol k'obino kwoŋe, ocol go to nywolo wode.

⁸Ŋa m'otieko winjo nger gino? Ŋa m'otieko neno nger gino? Piny bende nywole i ndelo acel? Nono bende nywole i hongo manok? Kole tekin ŋedi cako ramo Zayon, to nywolo wote.

⁹Anyalo kelo ji paran dhu nywol, t'akwero colo jowonywolere? Rwoth waco; an ma miyo jo nywol, anocegi ici? Were waco.

¹⁰Fore win gi Yerusalem, sangala win gi go, wijoje ma wimaro go, Fore win gi go pama, wijoje m'oyido wiywak rigo.

¹¹Go lapido win to yomo cuny win, paka yok win, cuka wiyeŋ. Wilakisangala gi dwoŋ pere.

¹²Kole me apaka Rwoth waco, Alacoro ri Yerusalem silwany paka malawa, gi lim ma piny man paka jwom ma mol. Zayon lapido win, larendo win i tiende.

¹³Paka yok nyathi yomo cuny nyathi pere, ameno apaka alayomo cuny win i Yerusalem.

¹⁴Wilaneno gime timere, aka cuny win lafore; lamiyo win bedo matek gi kwo maber. Aka wilaŋeyo ni Rwoth, konyo jono ma jowinjo go, aka nyutho jokwor pere nge.

¹⁵Kole Rwoth labino gi mac, gi cawilin pere ma cal asur, go lamiyo jokwor pere, gir'acula gi mac.

¹⁶Kole Rwoth lakelo tiro g'abor pere, go laneko ji kweth ma jonwaŋere ni jobanja aka ji kweth jolatho.

¹⁷Rwoth waco, gike cegin ri jono ma jolonyo kwo pajo ri lamo cal makicar i ndelin, jocamo riŋo mbiji g'oyeyo kodi cemo man ma kicam.

¹⁸Kole aŋeyo tim pajo gi paro pajo, aka abino coko ji ma joluwo dhodhok m'opokere opokere gi nonin nyutho jo dwoŋ paran.

¹⁹Alaketho ranyuth i dier jo. Wok kwoŋ jo alaoro ji ma joboth i piny kweth, Tarsis, Libia, gi Lidia ma jo oro asere gi kwote, Tubal, Javan gi piny ma yuthengi nam, mafodi jok'owinjo ŋeyirok kosa neno dwoŋ paran; aka jolatuco kamaler dwoŋ paran i dier nonin.

²⁰Jolakelo wade perin je wok i piny man paka mic ri Rwoth, i wi kayinin gi cawilin, i ywel kodi i nyithindhi kayina, i wi ŋamia, to jotero wi got paran i Yerusalem, paka Joisiraili jokelo mic ma cemo manyinge iy'atawo m'olony i Ot pa Rwoth.

²¹Megi kwoŋ jo alatero loko jocway ri Were i wi migam aka joman loko Jolevi, Rwoth waco.

²²Rwoth waco ni, Paka polo manyen, gi piny manyen, m'abino timo, joladoŋ ruwaŋan, ameno apaka nyikway win gi nyingi win ladoŋ.

²³I kisi kalima ma dwe manyen, gi kisi ndelo ma Sabato, ji ma kisi piny, jolabino lamo ruwaŋan ka i Yerusalem, Rwoth waco.

²⁴Aka ka jowok dok, jolaneno delkwoŋ ji ma jogwenyere kwoŋan. Kudin ma jocamo jo jokilatho, aka mac ma waŋo jokilaneko. Ji jokilamito kiri neno jo.