Read dhopadhola Isaya 9 Bible Online

Isaya 9 - dhopadhola bible

Isaya 9

¹To langoye kumo ri ŋat'oyido nitie i litho. I hongo macon okelo wickwot i piny pa Zebulun gi piny pa Nafital, to rumacen lamiyo royo ma nam dwoŋ, piny ma yombo Yordan, Galili pa nonin.

²Ji m'oyido jowotho i mudho, jotieko neno lero madwoŋ, oyido jobedo i piny ma mudho, to lero omenyo jo.

³Itieko medo piny me, itieko medo kisangala mere, jofore ruwaŋin, paka josangala i ndir ma keco, paka cwo ka jopoko lim ma jonyaga.

⁴Kole okol ma bieto pere, gi luth ma goke, luth ma nyweny pa ŋata diyo go, itieko turo paka i ndelo pa Midian.

⁵Kole kisi war pa jalweny ŋanjo gi yengirok, aka kisi law m'ocido gi remo, ilawaŋo paka mo ri mac.

⁶Kole riwan, nyathi onywole! Omiy wan nyathi majayac! Dhum nitie i goke, aka ilalwoŋo go ni jadiy cuny ji ma Gir'aura, Were Majameni, bawan ma cil gi cil, Kere ma siem.

⁷Dhum pere k'orumi, aka siem labedo cil gi cil, i wi kom ma dhum pa Daudi gi ker pere, cako gi mako matek, gi tiro kodi timo gim'otire, wok i hongo me kadho yuwaŋe aka cil gi cil. Rwoth pa lwak jolweny omiyere timo gime.

⁸Rwoth odhiro wac kwoŋ Yakobo, aka opodho kwoŋ Isiraili.

⁹Ji je jolaŋeyo kwoŋe. Efrayim gi ji ma jobedo i Samaria ma i noro gi gero ma cuny gin jowaco ni,

¹⁰“Matafal jopodho, to walageto gi telin, otoŋ piny yen musikamol, to walakisoya gi yen sida i kabedo pajo.”

¹¹Ameno Rwoth sigila jokwor jokwor pa Rezin monjo jo, aka miyo jokwor pere nge.

¹²Siria yuwok ceŋ, Filistia yupodho ceŋ, aka jocamo Isiraili gi dhok gin m'oŋamere. Kucel nge pa Rwoth fodi k'orumo, aka fodi orieyo cinge miyo gir'acula.

¹³Ji jok'ogik bongi go m'ogoyo jo, kosa jok'orango Rwoth pa lwak jolweny.

¹⁴Ameno Rwoth otoŋo woko kwoŋ Isiraili wic gi yiwe, jangi thith gi kedi i ndelo acel.

¹⁵Ato jodongo gi ji m'iworo jo ama jobedo wic, aka jotuci wac Were ma jofonjo twodo jobedo yiwe.

¹⁶Kole jono m'oyido jotelo jome jorwenyo jo, aka jono m'oyido itelo jo owey jo i nywowirok.

¹⁷Am'omiyo Rwoth kisangala gi nyithindho pajo, kosa maki wor gi nyithindho kic gi mon tho. Ato kisi dhano oyido bu Were aka jotimi gimarac, aka kisi dhok dhano luwo miŋo. Kucel nge pa Rwoth fodi k'orumo, aka go fodi orieyo cinge miyo gir'acula.

¹⁸Kole kidakana liel paka mac, aka waŋo okure gi kudhin, paka lul m'otwere maliel, aka dunyo malo siro yiro.

¹⁹Gi keme pa Rwoth pa lwak jolweny piny waŋ, ji jocale paka mo ri mac, aka ongoye ŋata botho nyawote.

²⁰Dhano ocamo cinge maracuc, to kec omedo neko, ocamo cinge maracam, to k'oyeŋ, kisi dhano ocamo riŋo ma cinge.

²¹Manase omonjo Efrayim aka Efrayim omonjo Manase, aka kanyacel jomonjo Yuda. Kucel nge pa Rwoth fodi k'orumo; aka go fodi orieyo cinge miyo gir'acula.