Read dhopadhola Jolevi 12 Bible Online

Jolevi 12 - dhopadhola bible

Jolevi 12

¹Rwoth oluwo gi Musa ka waco ama:

²Luw gi Joisiraili iwaci rijo ni, “Ka dhako ogamo iye to nywolo nyathi majayac, go labedo makoc manyakwer ma ndelo abirio, paka ka go ruko dwe bedo makoc.

³I ndelo mar'aboro iripo thumo pien ma yiw nyathi.

⁴Ndelo pere ma lonyirok kwoŋ remo labedo piero adek g'adek, go kiripi mako gimaleŋ, kosa donjo i Kabedo Maleŋ, cuka ndelo pere ma lonyirok rumo.

⁵Ka go onywolo nyathi manyako, go labedo makoc ma ndelo apar g'aŋwen, paka ka go ruko dwe. Ndelo pere ma lonyirok kwoŋ remo labedo ndelo piero aucel g'aucel.”

⁶“Ka ndelo pere ma lonyirok orumo, obedi nike go onywolo jayac kosa nyako, go lakelo nyathi rombo ma jaoro acel ri mic awaŋa, kodi njiwa kosa akuru bongi jacway ri Were i wi migam ri mic ma cwako reco i dhiot ma Wema ma romo.

⁷Jacway ri Were i wi migam lamiyo ruwaŋ Rwoth to timo cowirok ma cwako reco rigo. Go labedo m'olony kwoŋ cwer remo. Me kwer ri ŋat'onywol nyathi manyako kosa majayac.

⁸K'inen go kinyal kelo rombo, go lakelo akuru ario kosa njiwin ario, acel ma mic awaŋa kodi man ma mic ma cwako reco. Jacway ri Were i wi migam latimo cowirok ma cwako reco rigo, aka go labedo m'olony.”