Read dhopadhola Jolevi 14 Bible Online

Jolevi 14 - dhopadhola bible

Jolevi 14

² “Me bino bedo cik ri jadhowo i ndelo ma lonyo pere.” “Ibino kelo go bongi jacway ri Were i wi migam;

³jacway ri Were i wi migam bino wok woko ma kambi, to kaŋasa. Gikenyo k'ocangi two dhowo,

⁴jacway ri Were i wi migam bino oro jo tero ri ŋat'ilonyo winyin ario m'olony makwo kodi yen sida, adasa m'obokere kodi gikiro remo.

⁵Aka jacway ri Were i wi migam laoro jo neko acel kwoŋ winyin no iy'atawo wi pi ma mol.

⁶Go bino kwanyo winyo makwo kodi yen sida g'adasa m'obokere kodi gikiro remo, to lutho jo gi winyo makwo i remo pa winyo m'oneki wi pi ma mol.

⁷Jacway ri Were i wi migam bino kiro remo kwoŋ ŋat'ilonyo ma dhowo dibirio; kenyo to tuco ni go olony, to weyo winyo makwo kadho i koyo.

⁸Aka ŋat'ilonyo bino lwoko nangin pere, to lielo wiye, to lwokere i pi, to lony; aka ka meno orumo to bino i kambi, to bedo woko ma wema pere ma ndelo abirio.

⁹I ndelo mar'abirio go lalielo yer pere je; ma wiye, ye tike, biendi waŋe; go bino lielo yer pere je. Kenyo to lwoko nangin pere, to lwoko delkwoŋe i pi, to lony.”

¹⁰“Aka i ndelo mar'aboro go bino kwanyo wot rombo ario ma bu ŋolo, gi rombo acel madhako ma jaoro acel ma bu ŋolo, mic ma moko kilo adek m'oruw gi mo kodi lita acel ma mo oliv.

¹¹Aka jacway ri Were i wi migam ma loko go m'olony bino jengo jal m'ilalonyo kodi gigipiny me ruwaŋ Rwoth, i dhiot ma Wema ma romo.

¹²Jacway ri Were i migam bino kwanyo acel kwoŋ rombo ma cwo, to miyo paka mic ma banja, kanyacel gi lita mo acel wiy adek ma go lamiyo paka mic ma banja ruwaŋ Rwoth;

¹³to neko rombo i kabedo kama jolanek'iye mic mareco kodi cowirok awaŋa, kamaleŋ; ri mic ma banja, paka mic mareco, obedo apa jacway ri Were i wi migam; Leŋ swa maloyo.

¹⁴Jacway ri Were i wi migam bino kwanyo remo moro ma mic ma banja to ketho kam'owidhere ma ithi ŋat'ilonyo maracuc, kodi i lwet cinge ma thwon maracuc, kodi i lwet tiende ma thwon maracuc.

¹⁵Kenyo jacway ri Were i wi migam bino kwanyo mo moro ma oliv to konjo i par cinge won maracam,

¹⁶to lutho lwet cinge acel ma cinge maracuc i mo manitie i cinge maracam to kiro mo moro gi lwet cinge dibirio ruwaŋ Rwoth.

¹⁷Mo moro m'odoŋ i cinge jacway ri Were i wi migam bino ketho kam'owidhere ma ithi ŋat'ilonyo maracuc, kodi i lwet cinge ma thwon ma cinge maracuc, kodi i lwet tiende ma thwon ma tiende maracuc, medo kwoŋ remo ma mic ma banja.

¹⁸Aka mo m'odoŋ manitie i cingi go bino ketho i wiy ŋat'ilonyo. Kenyo to jacway ri Were i wi migam to timo tim ma cul mareco pere ruwaŋ Rwoth.

¹⁹Jacway ri Were i wi migam bino miyo mic mareco, ma timo tim ma cul mareco ri ŋat'ilonyo kwoŋ koco pere. Rumacen go bino neko mic awaŋa;

²⁰to jacway ri Were i wi migam bino miyo mic awaŋa kodi mic ma kodhi i wi migam. Ameno apaka jacway ri Were i wi migam bino timo rigo tim ma cul mareco, aka go bino lony.”

²¹“To ka go jacandi aka kinyal nyalo mathoth, kenyo go lakwanyo wod rombo acel ri mic ma banja t'iweyo kadho, ma timo tim ma cul mareco rigo. Go lakelo kilo acel ma moko m'oruw gi mo oliv ri mic ma kodhi kodi acel wiy adek ma lita mo oliv.

²²Bende gi akurin ario kosa njiwin ario, paka go nyalo, acel ri mic mareco kodi man mere ma mic awaŋa.

²³Aka i ndelo mar'aboro go bino kelo jo bongi jacway ri Were i wi migam ma lonyirok pere, i dhiot ma Wema ma romo, ruwaŋ Rwoth,

²⁴aka jacway ri Were i wi migam bino kwanyo rombo ma mic ma banja, kodi mo oliv to miyo jo paka mic manyakare ri Rwoth.

²⁵Go bino neko rombo ma mic ma banja; to jacway ri Were i wi migam bino kwanyo remo moro ma mic awaŋa to ketho i kam'owidhere ma ithi ŋat'ilonyo, kodi i cinge ma thwon ma cinge maracuc, kodi i lwet tiende ma thwon ma tiende maracuc.

²⁶Aka jacway ri Were i wi migam bino konjo mo moro i par cinge won maracam;

²⁷to kiro gi lwet cinge maracuc mo moro manitie i cinge maracam dibirio ruwaŋ Rwoth;

²⁸aka jacway ri Were i wi migam bino ketho mo moro manitie i cinge i kam'owidhere ma ithi ŋat'ilonyo maracuc, kodi i cinge ma thwon ma cinge maracuc, kodi i lwet tiende ma thwon ma tiende maracuc, i kabedo kama remo ma mic ma banja oyido oketh'iye;

²⁹aka mo man manitie i cingi jacway ri Were i wi migam ibino ketho i wiy ŋat'ilonyo, ma timo rigo tim ma cul mareco ruwaŋ Rwoth.

³⁰Aka go lamiyo, kwoŋ akurin kosa njiwin ma nyaka ay paka go nyalo,

³¹acel ri mic mareco kodi acel man ri mic awaŋa, kanyacel gi mic ma kodhi; aka jacway ri Were i wi migam bino timo tim ma cul mareco ruwaŋ Rwoth ri ŋat'ilonyo.

³²Me obedo cik ri ŋato ma two dhowo nitie kwoŋe, ŋati ma kinyal nwaŋo mic ma lonyo pere.”

³³Rwoth owaco ri Musa kodi Aron ni,

³⁴“Ka witundo i piny ma Kanan ma miyo win paka gimewin, t'aketho two dhowo i ot i piny m'obedo mewin,

³⁵onyo ŋata dhumo ot no labino to waco ri jacway ri Were i wi migam ni, ‘Nitie gima cale ran two moro i ot paran.’

³⁶Jacway ri Were i wi migam bino wodho or ni jowowodhi woko kisi gimoro ma ot mafodi k'odonjo kikaŋasa two, ka k'obedo ameno kisi gimoro je manitie i ot lalokere makoc; aka rumacen jacway ri Were i migam ladonjo kikaŋasa ot.

³⁷Go bino kikaŋasa two; ka two nitie i kor gi kam'otawa othon manyaboke pendi kosa m'obokere, aka ka neno pa thuth loyo wiye,

³⁸kenyo jacway ri Were i wi migam bino wok woko kiri i thigo ma ot to cego ot ma ndelo abirio.

³⁹Jacway ri Were i wi migam bino dwoko kendo i ndelo mar'abirio to kikaŋasa; ka two otiek nyay i kor ot,

⁴⁰kenyo jacway ri Were i wi migam bino wodho or ni telin ma two nener'iye wowodhi woko t'ibolo kama koc woko ma tindi madwoŋ.

⁴¹Go bino neno ni iy ot ocidi maber swa, aka kam'ofuy m'ocidi woko bino konjo kama koc woko ma tindi madwoŋ.

⁴²Jobino kwanyo telin man to joketho jo i kabedo pa telin no, to jokwanyo gifuyo man to jofuyo gine ot.”

⁴³“Ka two otur kendo i ot, ka go otieko wodho woko telin to gweno ot to fuyo,

⁴⁴nyaka to jacway ri Were i wi migam bino kidho to neno; aka ka two onyay i ot, meno obedo dhowo makicangi i ot, obedo gimakoc.

⁴⁵Go bino turo piny ot, telin mere kodi mbawin mere kodi fuy ma ot je, go bino tiŋo jo to wodho jo woko ma tindi madwoŋ to tero kama koc.

⁴⁶Medo kwoŋ meno, ŋatimoro je m'odonji i ot munyo ocegi bino bedo makoc tundo othieno;

⁴⁷aka jono je ma jonindi kosa jocem i ot jolalwoko nangin pajo.”

⁴⁸“To ka jacway ri Were i wi migam obino kikaŋasa, to two fodi k'onyay i ot munyo otiek fuyo ot, jacway ri Were i wi migam bino tuco ni ot olony; ocangi two.

⁴⁹Aka ri lonyo ot go bino tero winyin ario mathindho, gi yen sida, adasa m'obokere kodi gikiro remo,

⁵⁰to neko acel kwoŋ winyin iy'atawo wi pi ma mol,

⁵¹aka bino kwanyo yen sida, gikiro remo kodi adasa m'obokere, kanyacel gi winyo makwo, to lutho jo i remo pa winyo m'oneki kodi wi pi ma mol, to kiro remo i ot dibirio.

⁵²Ameno apaka lalonyo ot gi remo pa winyo, pi ma mol, winyo makwo, yen sida, gikiro remo kodi adasa m'obokere;

⁵³go bino weyo winyo makwo to kadho woko ma tindi madwoŋ kam'othangere; onyo go bino timo tim ma ŋuto reco ri ot, to lokere m'olony.”

⁵⁴“Me obedo cik kwoŋ two dhowo moro je;

⁵⁵ri dhowo ma nanga, kosa i ot,

⁵⁶kodi ri gima kwot kosa kam'otawa,

⁵⁷ma nyutho ka koc kodi ka olony. Me obedo cik ri dhowo.”