Read dhopadhola Jolevi 19 Bible Online

Jolevi 19 - dhopadhola bible

Jolevi 19

¹Rwoth oluwo gi Musa ka waco ama:

²Luw gi lwak pa Joisiraili aka iwaci rijo ni: Bedi win maleŋ rupiri An Rwoth Were mewin aleŋ.

³Kisi dhano wolwor min kodi bamere, aka wikuri sabato: An abedo Rwoth Were mewin.

⁴Wikiri wiwire lamo werin ma bukony, aka wikiri witim cal ma nyweny m'oleny: An abedo Rwoth Were mewin.

⁵K'itimo cowirok ma mic ma siem ri Rwoth, iripo timo i nger ma miyo go nyalo jolo.

⁶Iripo camo i ndelo no won ma imiy'iye kosa yawere mere; aka m'odoŋ je tundo i ndelo mar'adek wowaŋ gi mac.

⁷Ka ocam adieri i ndelo mar'adek, obedo mienirok, aka k'ojol.

⁸Aka joma jocam je, jolatiŋo reco kwoŋ jo, kwoŋbedo jotieko koco gimaleŋ ri Rwoth, aka nger ŋato iripo poko woko kwoŋ ji pere.

⁹K'ikeco ranyak ma ndelo perin, Ikir'ikeci kiri i thengi ndelo, aka ikir'igiki i ndelo keco m'obudhi.

¹⁰Ikir'ifoni olemo ma ndelo vini perin je, kosa icoki olemo m'ooy i ndelo vini perin; weyi ri jocandi kodi jopath: An abedo Rwoth Were mewin.

¹¹Ikir'ikwal; ikir'ibedi jabanirok, kosa iwondi nyawotin.

¹²Ikir'ikwoŋere nono gi nyingan, koco nyingi Were mewin: An abedo Rwoth.

¹³Ikir'idiy jager perin, Ikir'ikwal; aka ikir'ikan cul pa jatic tundo odikin.

¹⁴Ikir'ilam ŋata ithe otho kosa ikethi gimoro yuwaŋ ŋata waŋ'otho; Iripo lworo Were mewin: An abedo Rwoth.

¹⁵Ikir'ithum banja ma k'otire; Ikir'itim nyakucel ri jacandi kosa Ikir'ilwor joŋaŋo: Thum banja ri japiny perin gi tiro.

¹⁶Ikir'iwothi ariwa luwo pokopoko i dier ji perin, aka Ikir'ilim kwoŋ remo pa nyawoti win: An abedo Rwoth.

¹⁷Ikir'idaki dhano moro je i cunyin; pusa go adieri, ŋey Ikir'itim reco kwoŋ go.

¹⁸Ikir'iculi kwor kosa imaki ŋonge kwoŋ nyithindho pa joger perin, to mar nyawotin paka in won imare. An abedo Rwoth.

¹⁹Wiripo kuro cik paran. Wikiri wiwey ogwaŋe mewin wonywol gi man m'opokere; wikiri wicwoy kodhi ario i ndelo mewin; aka Ikir'iruki nanga m'okwoy kanyacel m'opokere.

²⁰Ka jacwo moro onindo gi dhako ma ŋeca, m'oyido oyikere poro gi ŋatiman, to fodi k'omiy cul rigo kosa ogony go, worangi tiende. Wokiri woneki jo, rupiri oyido fodi k'ogony go.

²¹Jacwo no ripo kelo mic ma cul ri Rwoth, i dhiot ma Wema ma romo, wod rombo paka mic ma cul.

²²Aka jacway ri Were i wi migam latimo cowirok ma cwako reco rigo gi wod rombo ma mic ma cul ruwaŋ Rwoth ri reco pere m'otimo; aka ilacwako rigo.

²³Ka winotundi i piny ma Kanan to wifuro yen ma cemo m'opokere, witer olemo pajo paka gima kicam. Ma oro adek, labedo gima kicam riwin, kiripi camo.

²⁴I oro mar'aŋwen ranyak pajo je wokethi gicen ma forok i Rwoth.

²⁵To i oro mar'abic, winyalo camo olemo pajo, ŋey ranyak pa womedere ri rin: An abedo Rwoth Were mewin.

²⁶Wikiri wicam gimoro je gi remo mere. Wikiri wifonjere yido kosa jwok.

²⁷Wikiri wiliel yer ma thengi wiwin kosa withum ye tik win.

²⁸Wikiri wigwer delkwoŋ win ka wiywako jom'otho kosa wikethi cal moro je kwoŋ win: An abedo Rwoth.

²⁹Ikir'ikoci nyarin gi loko go malaya, kosa piny lapoŋ malayin kodi kidakana.

³⁰Wikuri sabato paran to wiworo Kabedo Maleŋ: An abedo Rwoth.

³¹Wikiri wiwire cako dwaro rieko pa joma luwo gi tipo pa jom'otho kosa jojwok, wikiri wirangi jo, to jokoco win: An abedo Rwoth Were mewin.

³²Iripo cungo ruwaŋ ŋat'otwi lwar, iripo woro ŋat'otegino. Iripo lworo Were perin: An abedo Rwoth.

³³Ka jakicar obedi gi win i piny mewin, wikiri widiy go.

³⁴Jakicar ma bedo gi win wobedi rin pa japiny i dier win; wimar jakicar paka wiwegi wimare, rupiri oyido wibende wibedo jokicar i piny ma Misir; An abedo Rwoth Were mewin.

³⁵Wikiri wikwal gi rapim kosa latir.

³⁶Wiripo bedo gi kilo m'otire, latir m'otire, gi rapim m'otire: An abedo Rwoth Were mewin m'owodho win wok i piny ma Misir.

³⁷Wikuri cik paran kodi or paran je, aka witim jo: An abedo Rwoth.