Read dhopadhola Jolevi 2 Bible Online

Jolevi 2 - dhopadhola bible

Jolevi 2

¹Ka nyatoro miyo Rwoth mic ma cemo manyinge, mic no ripo bedo moko m'oregi m'onuŋere, go ripo nywowo gi mo oliv kodi buban.

²Go lakelo bongi jocway ri Were i wi migam, wot Aron. Jacway ri Were i wi migam lajowo moko masi cinge acel, gi mo oliv kodi buban mere je, to waŋo paka mic i mac i wi migam, mic m'owaŋ gi mac maŋwe kur mamit ri Rwoth.

³Aka mic ma cemo manyinge m'odoŋ labedo apa Aron kodi wote, obedo adec maleŋ loyo ma mic m'owaŋ gi mac ri Rwoth.

⁴Ka nyatoro mito miyo mic ma mugat m'otedi i kendo m'ocwey gi lowo, ripo bedo ma moko m'onuŋere. Ripo bedo mugat mayom ma buthow m'onywow gi mo oliv, kosa mugat manwaŋ ma buthow m'owir'iye mo.

⁵Ka mic perin obedo mugat m'otedi i sapik i kendo, ripo bedo ma moko m'onuŋere m'onywow gi mo oliv, ma buthow.

⁶Iripo ŋinyo mathindho thindho, konj'iye mo, meno obedo mic ma cemo manyinge.

⁷Ka mic perin obedo mugat m'otedi i sapik, ripo bedo m'otimi gi moko m'onuŋere m'onywow gi mo oliv.

⁸Ilakelo ri Rwoth mic ma cemo manyinge m'otimi i nger moro je kwoŋ meno, aka jacway ri Were i wi migam latero i wi migam.

⁹Jacway ri Were i wi migam lakwanyo adec to waŋo i wi migam, paka mic m'owaŋ gi mac maŋwe kur mamit ri Rwoth.

¹⁰Adec ma mic ma cemo manyinge m'odoŋ labedo apa Aron kodi wote, obedo adec maleŋ loyo ma mic m'owaŋ ri Rwoth.

¹¹Ongoye kelo ri Rwoth mic ma cemo manyinge m'onywow gi thow, kole wikiripi waŋo thow kosa mo kic gi mac paka mic ri Rwoth.

¹²Winyalo kelo jo paka mic ma ranyak marapena ri Rwoth, to wikiripi miyo i wi migam ri kur mamit ri Rwoth.

¹³Wikiripi weyo ma wikiketho i mic mewin ma cemo manyinge, cumbi ma cikirok gi Were mewin. Wiripo ketho i mic mewin je.

¹⁴K'ikelo mic perin ma cemo ma ranyak marapena ri Rwoth, iripo kelo ŋano m'obul gi mac, m'oodi m'onuŋere.

¹⁵Iripo nywowo gi mo kodi buban; meno obedo mic ma cemo manyinge.

¹⁶Aka jacway ri Were i wi migam lawaŋo adec ma ŋano m'oodi m'onuŋere kodi mo gi buban mere je; obedo mic m'owaŋ gi mac ri Rwoth.