Read dhopadhola Jolevi 20 Bible Online

Jolevi 20 - dhopadhola bible

Jolevi 20

¹Rwoth oluwo gi Musa ka waco ama:

²Waci ri Joisiraili je ni dhano moro je kwoŋ Joisiraili, kosa kwoŋ jokicar ma jobedo i Isiraili m'omiy acel kwoŋ nyithindho pere ri were Molek iripo neko adieri. Jopiny jowocadhi go gi telin.

³An won gipi alacomo waŋan kwoŋ ŋato, t'apoko go woko kwoŋ ji pere, kwoŋbedo go omiyo acel kwoŋ nyithindho pere ri were Molek, koco kabedo paran kodi nyingan maleŋ.

⁴Aka ka jopiny joumo waŋ gin kwoŋ ŋato adieri, ma go omiyo acel kwoŋ nyithindho pere ri Molek, to jobedo ma jok'oneko go,

⁵nyaka t'acomo waŋan kwoŋ ŋato gi kwoŋ peco pere t'akedho jo woko kwoŋ dier ji pajo, go kodi jono je ma joluw go i tim pere ma kidakana ma jolamo gine Molek.

⁶Aka ŋat'okidhi rango rieko wok bongi jwogi pa jom'otho, kodi joma jonitie gi ndijo ma ŋeyo gim'opanere, alacomo waŋan kwoŋ ŋato t'apoko go kwoŋ ji pere.

⁷Riameno lokere win maleŋ, aka wibedi maleŋ; rupiri An abedo Rwoth Were mewin.

⁸Kur win cik paran aka witim jo: An abedo Rwoth, m'oketho win gicen.

⁹Ka dhano moro je olamo bamere kosa min iripo neko go adieri, go otieko lamo bamere kosa min, aka won okelo tho pere.

¹⁰Jacwo m'otimi cot gi cipa nyawote, joje iripo neko jo adieri.

¹¹Jacwo m'onindi gi cipa bamere, meno oyawo kinyoro pa bamere, joje iripo neko jo adieri, remo pajo doŋ i wi jo.

¹²Ka jacwo moro onindo gi ciwode, iripo neko joje adieri; jokelo luswa aka remo pajo doŋ i wi jo.

¹³Ka jacwo onindo gi jacwo nyawote paka nindo gi dhako, meno jotieko timo gimienirok madwoŋ, joje iripo neko jo adieri, aka remo pajo ladoŋ i wi jo.

¹⁴Ka jacwo moro onywomo dhako kodi nyare je, meno obedo kidakana, wowaŋ jo gi mac, jalo kodi mon ario no je ŋey wongoye kidakana moro je i dier win.

¹⁵Ka jacwo moro onindo gi ogwaŋ, iripo neko go adieri, to wineko ogwaŋ no bende.

¹⁶Ka dhako moro ocore bongi ogwaŋ nindo gine, iripo neko adieri dhako no, kodi ogwaŋ; aka remo pajo doŋ i wi jo.

¹⁷Ka jacwo moro onywomo nyamin, nyar bamere kosa nyar min, to yawo kinyoro pa nyamin, aka nyamin bende oyawo kinyoro pere, meno obedo giwickwot, woriem jo woko ruwaŋ ji pajo; go otieko ŋeyo kinyoro pa nyamin, go ripo tiŋo reco pere.

¹⁸Ka jacwo moro onindo gi dhako ma ruko dwe, to yawo kinyoro pere, go otieko thango cwer remo pere aka dheno bende otieko thango cwer remo pere; joje wopok jo woko kwoŋ ji pajo.

¹⁹Ikir'inindi gi nyamin yokin kosa wayin, rupiri meno rom gi thango wat perin won; iripo miyin gir'acula.

²⁰Ka jacwo moro onindo gi cipa ner mere, meno go otieko neno kinyoro pa ner mere; iripo miyo jo gir'acula; jolatho ma jok'onywol.

²¹Ka jacwo moro onywomo cip'omin, meno bedo gikoco, go otieko neno kinyoro p'omin; jok'onywol.

²²Kur win cik kodi or paran je, aka witim jo, ŋey lowo m'ater'iye win bed'iye wokiri woŋoki win woko.

²³Wikiri wiluw kula pa nono m'ariemo woko ruwaŋ win; kole jotimo gigipiny me je, t'adak jo.

²⁴Aka awaco riwin ni: Wilalunjo lowo pajo, alamiyo win wobedi mewin, lowo ma mol gi cak kodi mo kic. An abedo Rwoth Were mewin; atieko ketho win gicen kwoŋ nonin man.

²⁵Onyo riameno wiripo poko i dier ogwaŋ m'olony kodi makoc, kodi i dier winyo makoc kodi m'olony; wikiri wikel mienirok kwoŋ win g'ogwaŋ kosa winyo kosa cwec moro ma lak piny, m'atieko ketho gicen riwin paka koc.

²⁶Wiripo bedo maleŋ ran; rupiri an Rwoth aleŋ, aka atieko ketho win gicen kwoŋ ji man bedo aparan.

²⁷Jacwo kosa dhako moro m'oluw gi jwogi pa jom'otho kosa obedi gi ndijo ma ŋeyo gim'opanere iripo neko adieri; wocadhi jo gi telin, aka remo pajo ladoŋ i wi jo.