Read dhopadhola Jolevi 23 Bible Online

Jolevi 23 - dhopadhola bible

Jolevi 23

¹Rwoth oluwo gi Musa ka waco ama:

²Luw gi Joisiraili iwaci rijo ni: Kwoŋ kalimin pa Rwoth ma wiripo tuco paka cokirok maleŋ, me ama jobedo kalimin paran.

³Ndelo aucel obedo ma timo tic, to ndelo mar'abirio obedo sabato ma ywomirok adieri, cokirok maleŋ; wikiri witim tic moro je. Obedo sabato pa Rwoth kamoro je ma winobed'iye.

⁴Me kalimin pa Rwoth, cokirok maleŋ, ma wiripo timo i hongo mere m'oyik.

⁵I dwe marapena, k'apar g'aŋwen ma dwe, othieno, obedo kalima ma kadho ri Rwoth.

⁶K'apar g'abic ma dwe acel no won obedo kalima ma mugat ma buthow ri Rwoth; ma ndelo abirio wilacamo mugat ma buthow.

⁷I ndelo marapena wibedi gi cokirok maleŋ; wikiri witim tic mewin ma kisi ndelo.

⁸Ma ndelo abirio wikel cowirok awaŋa pa Rwoth. I ndelo mar'abirio cokirok maleŋ wobedi; wikiri witim tic mewin ma kisi ndelo.

⁹Rwoth oluwo gi Musa ka waco ama:

¹⁰Luw gi Joisiraili aka iwaci rijo ni: Ka widonjo i piny m'acegin miyo win to wikeco olemo mere, wiripo kelo withi olemo marapena ma keco mewin ri jacway ri Were i wi migam.

¹¹Go latiŋo malo withi olemo no ruwaŋ Rwoth, ŋey wonyali jolo rin; i ndelo ma luwo sabato jacway ri Were i wi migam wotiŋ malo.

¹²I ndelo ma witiŋ'iye withi olemo, wimiy wod rombo ma jaoro acel, m'ongoye gi ŋolo, paka mic awaŋa ri Rwoth.

¹³Aka mic ma cemo manyinge wobedi kilo ario ma moko m'onuŋere m'onywow gi mo oliv, mic awaŋa ma ŋwece kur mamit ri Rwoth, aka mic ma vini m'ilamiyo gine wobedi lita acel ma vini.

¹⁴Wikiripi camo mugat kosa ŋano m'obul kosa ranyak ma nyaka okec cuka ndelo no won, cuka winotiek kelo mic pa Were mewin. Obedo cik ma cil gi cil i luse mewin je, kama winobed'iye je.

¹⁵Aka wok i ndelo ma luwo sabato, wok i ndelo ma wikel'iye withi olemo ma mic atiŋa malo, wikwan sabato abirio m'ocowere.

¹⁶Wikwan cuka tundo i ndelo ma luwo sabato mar'abirio, ndelo piero abic; nyaka to wikelo mic ma cemo manyinge manyen ri Rwoth.

¹⁷Wikel wok kama wibed'iye muma mugat ario paka mic atiŋa malo, kisi muma acel wobedi ario ma wi apar ma kilo; jowobedi ma moko m'oyer, m'obak gi thow, paka olemo marapena ri Rwoth.

¹⁸Wikel gi mugat no wot rombo abirio ma jo oro acel ma jongoye gi ŋolo, rwath acel, gi wot rombo ario; jolabedo mic awaŋa ri Rwoth, kanyacel gi mic pajo ma cemo kodi mic pajo amadha, mic awaŋa ma ŋwece kur mamit ri Rwoth.

¹⁹Wimiy bende wod diel acel ri mic ma cwako reco, gi wot rombo ario ma jo oro acel paka cowirok ma mic ma siem.

²⁰Jacway ri Were i wi migam latiŋo jo malo gi mugat mar'olemo marapena paka mic atiŋa malo ruwaŋ Rwoth, kanyacel gi nyithindhi rombo ma wote ario; jolabedo maleŋ ri Rwoth ri jacway ri Were i wi migam.

²¹I ndelo acel no won wiripo tuco; wiripo bedo gi cokirok maleŋ aka wikiripi timo tic mewin ma kisi ndelo. Me obedo cik ma cil gi cil kamoro je ma winobed'iye i luse mewin je.

²²Ka wikeco ranyak ma ndelo mewin, wikiri wikec kiri i thengi ndelin mewin, kosa wicoki withi ranyak ma oy; wiripo weyo jo ri jocandi kodi jokicar: An abedo Rwoth Were mewin.

²³Rwoth oluwo gi Musa ka waco ama:

²⁴Luw gi Joisiraili, k'iwaco ama: I dwe mar'abirio, i ndelo marapena ma dwe, wobedi ndelo ma sabato, ma wopoy cokirok maleŋ gi kudho gwarin.

²⁵Wikiri witim tic moro je ma kisi ndelo; to wikel mic awaŋa ri Rwoth.

²⁶Rwoth oluwo gi Musa ka waco ama:

²⁷Pama, k'apar i dwe mar'abirio me obedo ndelo ma cwako reco; wobedi cokirok maleŋ riwin; wilamiyo adundo mewin litho; aka wikel mic awaŋa ri Rwoth.

²⁸Wikiri witim tic moro je i ndelo no gipi; rupiri obedo ndelo ma cwako reco, ma timo cowirok ma cwako reco mewin ruwaŋ Rwoth Were mewin.

²⁹Ŋata won k'ofonjere thwono kwo pere gimoro i hongo ma ndelo no gipi wopok go kwoŋ ji pere.

³⁰Aka ŋatimoro je m'otimi tic moro je i ndelo no gipi, nger ŋato alareyo go woko i dier ji paran.

³¹Wikiri witim tic moro je: Me obedo cik ma cil gi cil i luse mewin je kamoro je ma winobed'iye.

³²Wobedi riwin sabato ma ywomirok kicutho, wimiy adundo mewin litho; aka k'abuŋwen ma dwe no othieno, wok othieno tundo othieno wikuri sabato.

³³Rwoth oluwo gi Musa ka waco ni:

³⁴Luw gi Joisiraili, k'iwaco ama: K'apar g'abic ma dwe mar'abirio, labedo kalima ma kayindi, ma ndelo abirio ri Rwoth.

³⁵I ndelo marapena labedo cokirok maleŋ; wikiri witim tic mewin ma kisi ndelo.

³⁶Ma ndelo abirio wikel ri Rwoth mic awaŋa; i ndelo mar'aboro wikuri cokirok maleŋ aka wikel mic awaŋa ri Rwoth; obedo cokirok maleŋ; wikiri witim tic mewin ma kisi ndelo.

³⁷Me jobedo kalimin pa Rwoth, ma wiripo timo paka hongo ma cokirok maleŋ, ka wimiyo Rwoth mic m'owaŋ gi mac, mic awaŋa, mic ma cemo manyinge, cowirok kodi mic ma vini, kisi moro i ndelo pere ma ripo;

³⁸medo i wi sabato pa Rwoth, kanyacel gi mic mewin, gi mic mewin ma wiciko miyo, gi mic mewin je ma wiwegi wiyeyo miyo, ma wimiyo Rwoth.

³⁹Onyo, k'apar g'abic ma dwe mar'abirio, ka witieko coko olemo ma lowo, wikuri kalima pa Rwoth, ma lacowo ndelo abirio; i ndelo marapena labedo sabato, kodi i ndelo mar'aboro.

⁴⁰I ndelo no wikwany olemo maber loyo ma yen, jangi yen thith, jangi yen ma joboke kweth, kodi ma twi i thengi pi, aka wifore ruwaŋ Rwoth Were mewin ma ndelo abirio.

⁴¹Wikuri paka kalima ri Rwoth ma ndelo abirio kisi oro; wikuri go i dwe mar'abirio paka cik cil gi cil i luse mewin je; wiripo timo i dwe mar'abirio.

⁴²Wilabedo i kayindi ma ndelo abirio; Joisiraili je joripo bedo i kayindi;

⁴³aka ŋey luse mewin jowonyal ŋeyo nike amiyo Joisiraili bedo i kayindi munyo awodho jo wok i piny Misir: An abedo Rwoth Were mewin.

⁴⁴Aka Musa owaco ri Joisiraili kalimin pa Rwoth m'oyikere.