Read dhopadhola Jolevi 25 Bible Online

Jolevi 25 - dhopadhola bible

Jolevi 25

¹Rwoth oluwo gi Musa wi got Sinai, ka waco ama:

²Luw gi Joisiraili aka iwaci rijo ni: Ka widonjo i lowo m'amiyo win, lowo no ripo kuro sabato pa Rwoth.

³Ma oro aucel wicwoy, aka ma oro aucel wilwer yen vini mewin, to wicoko olemo;

⁴to i oro mar'abirio labedo sabato ma ywomirok adieri ri lowo, sabato ri Rwoth: Wikiri wicwoy kosa wilwer yen vini mewin.

⁵Wikiri wikec gim'onyak rumacen ma keco mewin kosa wicoki olemo ma yath vini ma wikilwero; labedo oro ma ywomirok adieri ri lowo.

⁶Winyalo camo gim'onyak i lowo i hongo ma sabato mere; win, ŋecin mewin ma cwo kodi ma mon, jotic mewin ma wipangisa kodi jokicar ma jobedo gi win,

⁷ri ogwaŋe mewin bende, kodi ogwaŋe madudi i lowo mewin, gima lowo onyak je labedo cemo.

⁸Wilakwano sabiti abirio gicen ma oro, abirio dibirio, ŋey hongo ma sabato abirio ma oro no je wobedi riwin oro piero aŋwen g'abuŋwen.

⁹Aka wilakudho gwara malo; i ndelo mar'apar ma dwe mar'abirio, i ndelo ma cwako reco; wilakudho gwara i lowo mewin je paka rom.

¹⁰Aka wilaketho gicen paka gimaleŋ oro ma piero abic aka wobedi thwolo i lowo paka rom ri ji ma jobed'iye je. Labedo oro ma piero abic riwin: Aka kisi dhano kwoŋ win, lagik i lim pere kodi thugin.

¹¹Meno obedo oro ma piero abic riwin: Wikiri wicwoy, kosa wikec cemo m'onyak rumacen, kosa wifon vini ma wikilwero.

¹²Kole obedo oro piero abic; labedo maleŋ riwin: Wilacamo ranyak ma won otwi i ndelo.

¹³I oro ma piero abic me, wiladok, kisi dhano kwoŋ win, i lim pere won.

¹⁴K'itana gimoro gi nyawotin, kosa inyewo bonge, wikiri widiyere.

¹⁵K'inyewo gimoro wok bongi nyawotin, iculi kende ma oro wok i cakirok ma oro piero abic; ŋata tana womiti cul bongin ma oro ma cemo m'odoŋ kende.

¹⁶Ka oro thoth, imedi welo, aka ka oro nok, idwoki welo cen, rupiri itana in cungo kwoŋ oro ma cemo ocowo.

¹⁷Aka ongoye ŋata wodiy nyawote, to wiripo lworo Were mewin; kole An abedo Rwoth Were mewin.

¹⁸Wiripo timo cik paran to wikuro or paran, kodi timo, ŋey winyal bedo i lowo no maber.

¹⁹Aka lowo lanyak olemo mere, to wicemo to wiyeŋ, to wibed'iye maber.

²⁰To wilapenjo ni, wanocam aŋo i oro mar'abirio ka wakiripi cwoyo kosa coko cemo mawan?

²¹Alamiyo or ri silwany paran riwin i oro mar'aucel, ŋey cemo onyali nyak riwin ma oro adek.

²²Ka winocwoy i oro mar'aboro, lanwaŋo wipidhere gi cemo macon; cuka tundo oro mar'abuŋwen, munyo ranyak mere tundo, wilacamo macon.

²³Wokiri wotana lowo ma swa, kole lowo obedo aparan; aka win wibedo jokicar aka jowoth kodan.

²⁴Lowo je ma wilalimo, wiripo culo gimoro ma botho lowo.

²⁵K'omin in candi omako, to tana adec ma lim pere, wat ma luwo go ripo bino to botho gim'omin go otana.

²⁶Ka dhano ongoye gi ŋata nyalo botho lim pere, to ka go won nitie gi nyalo ma botho,

²⁷go lakwano oro m'otieko kadho wok cuka go tana, to dwoko ri ŋat'oyido onyewo cul mere, to go gik i lim pere.

²⁸To ka go ongoye gi nyalo ma dwoko lowo no, wodoŋ ri ŋat'onyewo cuka tundo oro ma piero abic; i oro ma piero abic wogonyi, t'idwoko rigo.

²⁹Ka nyatoro otana ot m'ibed'iye i tindi madwoŋ m'othok gi cel, wobothi rumacen ma oro acel wok cuka go tana; go nyalo botho rumacen ma oro acel.

³⁰To ka go k'obotho ka oro acel orumo, ot no ladoŋ ri ŋat'onyewo cil gi cil, i luse je; k'onyal gonyo i oro ma piero abic.

³¹To udi ma calin ma cel k'othoko jo jowobedi paka piny m'othangere; inyalo botho jo, t'igonyo jo i oro ma piero abic.

³²Kwanyowoko ri tindin madongo pa Jolevi, Jolevi jolabedo gi meni ma botho udi ma tindin madongo m'obedo apajo i hongo moro je.

³³Aka ka Jalevi k'onyalo botho ot pere, i tindin madongo m'obedo apajo, i oro ma piero abic iripo gonyo; kwoŋbedo udi ma tindin madongo pa Jolevi obedo lim pajo i dier Joisiraili.

³⁴To lowo m'othangere m'othoko tindin madongo wokiri wotana; kwoŋbedo meno obedo lim pajo ma cil gi cil.

³⁵Aka k'omin in candi omako, aka kinyal cowere, thiel go; go labedo kodin paka japath kosa jokicar.

³⁶Ikir'ikwany nusu wi nusu kosa itim magowa kwoŋ go, to lwor Were perin; ŋey omin in onyali bedo bongin.

³⁷Wikiri wikopa jo pesa ka wimito nusu i wi nusu, kosa winwaŋ magowa i cemo ma wimiyo jo.

³⁸An abedo Rwoth Were mewin, m'ofudho win wok i piny Misir, ni amiy win piny ma Kanan, aka ni abedi Were mewin.

³⁹Ka wutmin win ma jobedo gi win candi olaco jo to jotanere riwin, wikiri wirom jo tic paka ŋecin.

⁴⁰To jowodoŋ bongi win paka jogoy fut kosa jotic ma kisi ndelo. Jowotiy riwin cuka tundo i oro ma piero abic.

⁴¹Nyaka gi nyithindho pajo jodok peco pajo, i lim pa kwarere pajo.

⁴²Rupiri jobedo ŋecin paran, m'afudho jo wok i piny Misir; kinyal kitana jo paka itana ŋecin.

⁴³Wikiri widhum jo gi gwayo, to lwor Were mewin.

⁴⁴Paka ri ŋecin ma cwo kodi ma mon ma winyalo bedo gine, wobedi i nonin m'othoko win ama winwaŋ'iye ŋecin ma cwo kodi ma mon.

⁴⁵Winyalo bende nyewo wok kwoŋ jokicar ma jobedo gi win, kodi wok i pecin pajo manitie gi win, ma jonywole i piny mewin; aka jonyalo bedo lim mewin.

⁴⁶Winyalo kuro jo paka gimewin ri nyithindho mewin ma jolunji win, jowolunji jo paka lim. Jolabedo ŋecin mewin kicutho, to paka ri Joisiraili wade mewin, ongoye ŋata wodhum nyawote gi gwayo.

⁴⁷To ka japath kosa jakicar ma jobedo i dier win olokere jaŋaŋo, aka omin candi omako to tanere rijo, kosa ri japeco pa jakicar,

⁴⁸rumacen inyalo botho go, acel kwoŋ wutmin go nyalo botho go,

⁴⁹kosa omin bamere kosa wod omin bamere nyalo botho go, kosa wat moro je ma peco ma k'osunga nyalo botho go; kosa ka go oŋaŋ, nyalo botho kwo pere.

⁵⁰Jolagoyo welo gi ŋata nyewo go wok i oro ma go otaner'iye tundo i oro ma piero abic; welo ma gonyo go lakwanere luwo oro; hongo ma go obed'iye gi ŋat'onyewo go woter paka hongo pa jagoy fut.

⁵¹Ka oro kweth odoŋ cen, go laculo pesa ma both pere wok i pesa m'onyew gine go;

⁵²to ka oro manok odoŋ cuka tundo oro ma piero abic, jolatimo kwan ama: Jolakwanere cungo kwoŋ oro ma go ocowo i tic to doko idwoko rigo pesa ma botho go.

⁵³Paka jagoy fut m'opangisa ma kisi oro acel, go labedo iy'adhum pa jakicar, ma bende kiladhumo go gi gwayo kareno wineno anena.

⁵⁴Aka ka k'obothi go i nger me je, go kodi nyithindho pere ilagonyo jo i oro ma piero abic.

⁵⁵Kole ri an Joisiraili jobedo ŋecin paran; jobedo ŋecin m'awodho jo wok i piny Misir: An abedo Rwoth Were mewin.