Read dhopadhola Jolevi 27 Bible Online

Jolevi 27 - dhopadhola bible

Jolevi 27

¹Rwoth oluwo gi Musa ka waco ama:

²Luw gi Joisiraili aka iwaci rijo ni: Ka nyatoro otimo cikirok m'oŋeyere ri Rwoth, me rapim m'inyalo kipima gi dhano,

³rapim pa ŋat'obedo jacwo labedo; wok i oro piero ario tundo piero aucel labedo siringi piero abic ma feza pesa ma kamaleŋ.

⁴Ka ŋato obedo dhako, rapim labedo siringi piero adek.

⁵Ka oro obedo wok abic tundo piero ario, rapim mere labedo siringi ario ri jacwo kodi siringi apar ri dhako.

⁶Ka oro obedo dwe acel tundo oro abic, rapim pa jacwo labedo siringi abic ma feza, aka ri dhako rapim labedo siringi adek ma feza.

⁷Aka ka dhano obedo jaoro piero aucel kadho malo, nyaka to rapim pa jacwo labedo siringi apar g'abic, aka apa dhako siringi apar.

⁸Ka nyatoro obedi ma k'onyalo culo rapim, wokel jo ruwaŋ jacway ri Were i wi migam ma lamenyo jo paka gima kisi ŋat'acel acele ma timo cikirok nyalo culo.

⁹Ka mako ogwaŋ m'inyalo kelo paka mic ri Rwoth, nger gino m'inyalo miyo Rwoth bino bedo maleŋ.

¹⁰Wongoye man ma wowile gine kosa wolunji waŋe, obedi maber m'iwilo gi marac; kosa marac kodi maber; aka k'ogwaŋ acel owil gi man, ogwaŋ no kodi m'owil gine je labedo maleŋ.

¹¹K'omako ogwaŋ moro je makoc ma kinyal nyewo paka mic ri Rwoth, ogwaŋ no wokel ruwaŋ jacway ri Were i wi migam.

¹²Jacway ri were i wi migam lamenyo go; obedi ni ber kosa rac, paka menyo pa jacway ri Were i migam obedi, apaka bey mere labedo.

¹³To ka ŋat'acel no omiti nyewo kendo, go ripo medo acel wiy abic kwoŋ pesa macon.

¹⁴Ka nyatoro oloko ot maleŋ ri Rwoth, jacway ri Were i wi migam bino menyo bey mere: Obedi maber kosa marac, paka jacway ri Were i wi migam omeny bey, ladoŋ ameno.

¹⁵To ka ŋata loko ot maleŋ mito nyewo kendo, go lamedo acel wiy abic kwoŋ bey m'oridhi, to gik ri won mere macon kendo.

¹⁶Ka nyatoro oloko maleŋ lowo moro m'oluwo ri Rwoth, bey mere m'omeny bino bedo marom gi kodhi m'inyalo cwoy'iye: Siringi piero abic ma feza marom kodi kilo miya acel ma bale.

¹⁷Ka nyatoro oloko maleŋ ndelo paka oro ma piero abic, bey gipi bino cungo.

¹⁸To ka oloki ndelo maleŋ ka oro piero abic orumo, jacway ri Were i wi migam bino timo kwan ma bey mere paka oro m'odoŋ cuka tundo oro piero abic, t'imoja bey.

¹⁹To ka ŋat'oloko ndelo maleŋ mito nyewo kendo, nyaka lamedo acel wiy abic i wi pesa macon, to gik ri won mere macon.

²⁰To ka k'onyew ndelo kendo, kosa k'otana gi ŋatiman, k'onyal nyewirok kendo.

²¹To ka ogony ndelo i oro ma piero abic, bino bedo maleŋ ri Rwoth paka ndelo m'omiyere; to lokere gipa jocway ri Were i wi migam.

²²Ka nyatoro oloko maleŋ ri Rwoth ndelo m'otiek nyewo, ma k'obedo lowo alunja,

²³jacway ri Were i wi migam latimo kwan ka menyo bey ma ripo gine tundo oro piero abic, aka bey m'omeny iripo culo ndelo no won, mic maleŋ ri Rwoth.

²⁴I oro ma piero abic ndelo lagik ri ŋat'oyido onyew gine, m'obedo won ndelo macon.

²⁵Menyo bey je bino bedo paka pesa ma kamaleŋ nitie.

²⁶Nywol marapena p'ogwaŋe, paka obedo makayo, obedo apa Rwoth, ŋatimoro je kiripi loko maleŋ rigo; obedi merikwa kosa rombo.

²⁷K'obedo ogwaŋ makoc, ogwaŋ m'obedo kayo inyalo nyewo t'idwoko kendo i bey m'omeny, gi medo i wiye acel wiy abic; ka k'onyew t'idwoko, inyalo kitana gi ŋatiman i bey ma ripo.

²⁸Ongoye gim'obedo apa dhano m'otieko miyo ni woneki ri Rwoth, obedi dhano kosa ogwaŋ, kosa lowo alunja, m'inyalo kitana kosa nyewo kendo; kisi gimoro je m'otiek miyo Rwoth leŋ rigo swa.

²⁹Ongoye ji m'otiek yiko neko jo m'inyalo botho; iripo neko jo.

³⁰Acel wiy apar ma lowo, obedi kodhi ma lowo kosa olemo ma yath, obedo apa Rwoth; jobedo gimaleŋ ri Rwoth.

³¹Ka ji jomito nyewo acel wiy apar moro kendo, joripo medo acel wiy abic kwoŋ jo.

³²Acel wiy apar ma dhok kosa mwendi, kisi acel wiy apar ma luwo cingi jakwath rombo, bino bedo maleŋ ri Rwoth.

³³Wongoye ŋata wopenji obedi ni ber kosa rac, kosa wokethi gimoro ma lunjo waŋe; ka dhano okethi gilunjo waŋe, nyaka gigipiny no je kodi gima lunjo waŋe bino bedo maleŋ aka kinyal nyewo t'idwoko.

³⁴Me a or ma Rwoth omiyo Musa wi Got Sinai ri Joisiraili.