Read dhopadhola Jolevi 3 Bible Online

Jolevi 3 - dhopadhola bible

Jolevi 3

¹Ka nyatoro miyo mic ma siem, k'obedo dhiaŋ, thwon kosa merikwa, ripo bedo m'ongoye gi ŋolo ruwaŋ Rwoth.

²Ilaketho cingin i wic mic t'ithumo i dhiot ma Wema ma romo. Jocway ri Were i wi migam, wot Aron jolakiro remo thoko migam.

³Aka ilamiyo wok i cowirok ma mic ma siem, paka mic ma siem ri Rwoth, bor je ma umo gigipiny ma iye,

⁴roge ario je kodi bor mere, kodi adec maber loyo ma cuny.

⁵Wot Aron jolawaŋo i wi migam, gi mic awaŋa manitie i wi yen i mac, paka mic m'owaŋ gi mac maŋwe kur mamit ri Rwoth.

⁶Ka mic perin obedo rombo kosa diel paka cowirok ma mic ma siem ri Rwoth, siwen kosa wode, ripo bedo m'ongoye gi ŋolo.

⁷K'ikelo wod rombo paka mic perin, iripo kelo ruwaŋ Rwoth,

⁸t'iketho cingin i wic mere. Ilathumo ruwaŋ Wema ma romo, aka wot Aron jolakiro remo mere thoko migam.

⁹Ilamiyo bor ma cowirok ma mic ma siem, paka mic m'owaŋ ri Rwoth; yiwe maleny gibe, m'ilathumo gi ligongolo, kodi bor ma umo gigipiny ma iye.

¹⁰Roge ario je kodi bor ma umo i kowino, kodi adec mabor m'omakere ma wi cuny kodi i wi roge, go lakwanyo woko.

¹¹Jacway ri Were i wi migam lawaŋo i wi migam paka mic ma cemo manyinge m'owaŋ gi mac ri Rwoth.

¹²Ka mic perin obedo wod diel, ilakelo ruwaŋ Rwoth,

¹³t'iketho cingin i wic mere. Ilathumo ruwaŋ Wema ma romo, aka wot Aron jolakiro remo mere thoko migam.

¹⁴Ilamiyo paka mic perin wok kwoŋe, paka mic ri Rwoth, bor ma umo gigipiny ma iye je,

¹⁵roge ario gi bor ma umo kowino, kodi adec maber loyo ma cuny.

¹⁶Jacway ri Were i wi migam lawaŋo i wi migam paka mic ma cemo manyinge m'owaŋ gi mac maŋwe kur mamit ri Rwoth. Bor je obedo apa Rwoth.

¹⁷Me obedo cik ma cil gi cil i luse mewin je, kama winobed'iye je; wikiripi camo bor je kodi remo je.