Read dhopadhola Jolevi 7 Bible Online

Jolevi 7 - dhopadhola bible

Jolevi 7

¹Me kwer ma mic ma banja. Obedo maleŋ swa;

²i kabedo m'ithum'iye mic awaŋa, jobino thumo mic ma banja, aka remo mere wokiri i kisi thenge je ma migam.

³Aka bor mere je iripo miyo, yiwe maleny, kodi bor ma umo gigipiny ma iye,

⁴roge ario je kodi bor mere, kodi adec maber loyo ma cuny.

⁵Jacway ri Were i wi migam lawaŋo je i wi migam paka mic m'owaŋ ri Rwoth. Meno obedo mic ma banja.

⁶Cwo je i dier jocway ri Were i wi migam joripo camo i Kabedo Maleŋ. Obedo maleŋ loyo.

⁷Mic ma cwako reco kodi mic ma banja jonitie gi kwer acel, jacway ri Were i wi migam ma timo kwer mere latero.

⁸Aka jacway ri Were i wi migam ma timo kwer ma mic awaŋa pa dhano moro je, ladoŋ gi pien ma mic ma go omiyo.

⁹Mic ma cemo je m'otedi i kendo m'ogeti gi lowo, kodi m'otedi i kendo i sapik, labedo apa jacway ri Were i wi migam ma timo kwer mere.

¹⁰To mic ma cemo manyinge man je, m'onywow gi mo oliv kosa m'othwo, labedo apa wot Aron marom.

¹¹Me kwer ma cowirok ma mic ma siem, ma dhano nyalo miyo Rwoth.

¹²K'imiyo mic ma foyo, ilamiyo gi cowirok ma foyo, mugat ma buthow m'onywow gi mo oliv, mugat manwaŋ ma buthow m'owir'iye mo, kodi mugat m'otimi gi moko m'onuŋere m'obil maber i mo.

¹³Gi cowirok perin ma foyo ma mic ma siem, ilakelo mugat m'otimi gi thow.

¹⁴Ilamiyo mugat acel wok i kisi mic, paka mic pa Rwoth, aka labedo apa jacway ri Were i wi migam ma lakiro remo ma mic ma siem.

¹⁵Aka riŋo ma cowirok ma mic ma siem ma foyo, iripo camo i ndelo no won, kiripi weyo moro wodoŋ tundo odikin.

¹⁶To ka cowirok m'imiyo obedo mic m'iciko kosa ma in won imiyo, ilacamo i ndelo m'itimo cowirok perin, aka m'odoŋ wocam i ndelo ma luwo.

¹⁷To riŋo ma cowirok m'odoŋ kiri i ndelo mar'adek iripo waŋo woko gi mac.

¹⁸Ka riŋo moro je ma cowirok ocam adieri i ndelo mar'adek, kilajolo mic, kosa kilabedo mic pa ŋat'omiyo, labedo amien, aka ŋat'ocam latimo reco.

¹⁹Joma jolony ama jonyalo camo riŋo. Riŋo m'ogey gimakoc je kiripi camo, iripo waŋo woko gi mac.

²⁰To ŋat'ocam riŋo wok i cowirok ma mic ma siem ri Rwoth munyo jokoc, lapokere kwoŋ ji pere.

²¹Aka ŋat'ogey koco pa dhano kosa ogwaŋ makoc, kosa gimakoc moro je ma kelo amien, to camo riŋo wok i cowirok ma mic ma siem ri Rwoth, lapokere kwoŋ ji pere.

²²Rwoth oluwo gi Musa ka waco ama:

²³Luw gi Joisiraili iwaci rijo ni, jokiripi camo bor dhiaŋ, rombo, kosa diel.

²⁴Bor ogwaŋ ma won otho, kosa m'ogwaŋ madudi oneko, inyalo oro ma giman je, to wikiripi camo adieri.

²⁵Ŋat'ocam bor mar'ogwaŋ m'omiyo paka mic m'iwaŋo gi mac ri Rwoth, lapokere kwoŋ ji pere.

²⁶Wikiripi camo remo moro je, mar'ogwaŋ kosa ma winyo, kama winobed'iye je.

²⁷Ŋat'ocam remo moro je, lapokere kwoŋ ji pere.

²⁸Rwoth oluwo gi Musa ka waco ama:

²⁹Luw gi Joisiraili iwaci rijo ni, ŋata timo cowirok ma mic ma siem ri Rwoth, won ripo kelo mic pere wok i cowirok ma mic ma siem.

³⁰Go won lakelo gi cinge mic pa Rwoth m'iwaŋo gi mac, bor kodi ŋakin (thundho) aka ŋey wotiŋ thundho malo paka mic ruwaŋ Rwoth.

³¹Jacway ri Were i wi migam lawaŋo bor i wi migam, aka thundho mere obedo apa Aron kodi wote.

³²Aka eme maracuc ma cowirok ma mic ma siem wilamiyo jacway ri Were i wi migam paka mic.

³³Kwoŋ wot Aron, ŋata miyo remo kodi bor ma mic ma siem, ama latero eme maracuc.

³⁴Kole atieko kwanyo thundho ma mic m'itiŋo malo kodi eme maracuc, wok kwoŋ cowirok ma mic ma siem, ma Joisiraili jomiyo, aka atieko miyo Aron kodi wote, paka mic ma joripo limo wok bongi Joisiraili cil gi cil.

³⁵Me adec pa Aron kodi wote, wok kwoŋ mic m'iwaŋo ri Rwoth gi mac, wok i ndelo ma go oketho jo tic paka jocway ri Were i wi migam pa Rwoth.

³⁶Me gigipiny ma Rwoth omiyo or nike iripo miyo jo, wok i ndelo ma go owiro jo gi mo, paka gima Joisiraili joripo miyo jo cil gi cil i luse pajo je.

³⁷Me kwer ma mic awaŋa, mic ma cemo manyinge, mic ma cwako reco, mic ma banja, mic ma wiro jocway ri Were i wi migam gi mo kodi cowirok ma mic ma siem,

³⁸ma Rwoth omiyo Musa or wi got Sinai, i ndelo ma go omiyo Joisiraili cik kelo mic pajo ri Rwoth i thim ma Sinai.