Read dhopadhola Jolevi 8 Bible Online

Jolevi 8 - dhopadhola bible

Jolevi 8

¹Rwoth oluwo gi Musa ka waco ni:

²Kwany Aron kodi wote, gi ruk pajo, mo, rwath ma mic ma cwako reco, wot rombo ario, kodi adita ma mugat ma buthow.

³Coki lwak ji i dhiot ma Wema ma romo.

⁴Musa otimo paka Rwoth omiyo go or, aka ocoko lwak ji i dhiot ma Wema ma romo.

⁵Musa owaco ri lwak ji ni, “Me a gima Rwoth omiyan or ni wotim.”

⁶Musa olwoŋo Aron kodi wote yuwiye, aka olwoko jo gi pi.

⁷Musa oruko ri Aron sati, kodi kanzu, to tweyo piere gi del, to ketho law pa jocway ri Were i wi migam kwoŋe, to tweyo.

⁸Musa oketho mugowa ma ketho giŋeyo mito pa Were kwoŋ go, to keth'iye Urim kodi Thumim.

⁹Musa oruko rigo junga i wiye, to ketho thiwino ma zahabu, sangaria maleŋ ruwaŋ junga, paka Rwoth omiyo go or.

¹⁰Musa okwanyo mo, aka owiro Kabedo Maleŋ kodi gigipiny mere je, to loko jo maleŋ.

¹¹Go okiro mo i wi migam dibirio, owiro migam kodi gigipiny mere je gi mo, kalaya kodi pende, loko jo maleŋ.

¹²Musa okonjo mo i wi Aron aka owiro go, loko go maleŋ.

¹³Musa olwoŋo wot Aron, oruko rijo satere, to tweyo rijo del, aka oruko jungin i wi jo paka Rwoth omiyo Musa or.

¹⁴Musa okelo rwath ma mic ma cwako reco, aka Aron kodi wote joketho cingi jo i wic mere ri mic ma cwako reco.

¹⁵Musa othumo, aka okwanyo remo, to ketho i tungi migam thoko gi lwet cinge, loko maleŋ, okonjo remo i tiendi migam, oloko maleŋ, miy'iye cowirok ma cwako reco.

¹⁶Musa okwanyo bor je ma gigipiny ma iye, adec maber loyo ma cuny, roge ario gi bor mere, aka owaŋo i wi migam.

¹⁷To rwath won, pien mere, riŋo mere, kodi woyo mere, go owaŋo woko ma kambi, paka Rwoth omiyo Musa or.

¹⁸Musa okelo wod rombo ma mic awaŋa, aka Aron kodi wote joketho cingi jo i wic mere.

¹⁹Musa othumo, aka okiro remo mere i wi migam thoko.

²⁰Musa oyaŋo mathindho thindho, aka owaŋo wic mere, mumin mere kodi bor.

²¹Go olwoko gigipiny ma iye kodi olenge gi pi, aka Musa owaŋo wod rombo gipi i wi migam. Me oyido obedo mic awaŋa ri ŋwece kur mamit, mic m'owaŋ gi mac ri Rwoth, paka Rwoth omiyo Musa or.

²²Musa okelo wod rombo mar'ario, ma kwoŋo Aron kodi wote, aka joketho cingi jo i wic mere.

²³Musa othumo, aka okwanyo remo to wiro i ithi Aron maracuc, lwet cinge ma thwon maracuc, kodi lwet tiende ma thwon maracuc.

²⁴Musa okelo wot Aron, aka owiro remo i ithi jo maracuc, lwet cingi jo ma thwon maracuc, kodi lwet tiendi jo ma thwon maracuc. Remo m'odoŋ Musa okiro i tiendi migam.

²⁵Musa okwanyo bor, yiwe maleny, bor je ma umo gigipiny ma iye, adec maber loyo ma cuny, roge ario gi bor mere kodi eme maracuc.

²⁶Wok iy'adita m'oyido nitie ruwaŋ Rwoth, Musa okwanyo mugat acel ma buthow, mugat acel m'owir'iye mo, kodi mugat manwaŋ, aka oketho i wi bor kodi eme maracuc.

²⁷Musa oketho i par cingi Aron kodi wote, aka otiŋo malo paka mic m'otiŋ malo ruwaŋ Rwoth.

²⁸Musa okwanyo wok i par cingi jo, aka owaŋo i wi migam gi mic awaŋa. Me obedo mic ma kwoŋo jo, m'owaŋ gi mac ri ŋwece kur mamit ri Rwoth.

²⁹Musa okwanyo thundho aka otiŋo malo paka mic m'itiŋo malo ruwaŋ Rwoth. Me obedo adec pa Musa wok i wod rombo ma kwoŋo jo, paka Rwoth omiyo Musa or.

³⁰Musa okwanyo mo, kodi remo m'oyido nitie i wi migam, aka okiro kwoŋ Aron gi ruk pere, wote gi ruk pajo, aka ameno oloko Aron kodi wote gi ruk pajo maleŋ.

³¹Musa owaco ri Aron kodi wote ni, “Tedi win riŋo i dhiot ma Wema ma romo, aka wicam kenyo gi mugat manitie iy'adita ma mic ma kwoŋo jo, paka Rwoth omiyan or ni, ‘Aron kodi wote jowocami.’”

³²Riŋo kodi mugat m'odoŋ, waŋ win gi mac.

³³Wikiripi eye i dhiot ma Wema ma romo ma ndelo abirio, cuka ndelo mewin ma loko win maleŋ rumo. Kole ma ndelo abirio go lapoŋo cingi win.

³⁴Paka go otimo i ndelo me, Rwoth omiyo or ni wotim, timo cowirok ma cwako reco mewin.

³⁵Wilabedo i dhiot ma Wema ma romo odieceŋ gi wor ma ndelo abirio, kuro cik pa Rwoth, ŋey wikiri witho, kole omiyan or.

³⁶Aron kodi wote jotimo kisi gimoro je paka Rwoth oyido owodho or luwo bongi Musa.