Read dhopadhola Jolevi 9 Bible Online

Jolevi 9 - dhopadhola bible

Jolevi 9

¹I ndelo mar'aboro ma kwoŋo jo, Musa olwoŋo Aron kodi wote, kodi jodongo ma Isiraili.

²To waco ri Aron ni, “Kwany rwath ma mic ma cwako reco kodi wod rombo ma mic awaŋa, ma jongoye gi ŋolo, aka imiy ruwaŋ Rwoth.

³Aka ri Joisiraili, luw gi jo iwaci ni, ‘Kwany win wod diel ma mic ma cwako reco, rwath kodi nyathi rombo, ma jo oro acel ma jongoye gi ŋolo, ma mic awaŋa.

⁴Megikwe kodi wod rombo ma mic ma siem, ma cowirok ruwaŋ Rwoth; kodi moko m'onywow gi mo oliv, kole konon Rwoth laneno riwin.’”

⁵Jokelo gima Musa omiyo or yuwaŋ Wema ma romo, aka lwak gibe ocore cegin to jocungo liŋ ruwaŋ Rwoth.

⁶Musa owaco ni, “Me wac ma Rwoth omiyo or ni witim, aka dwoŋ pa Rwoth laneno riwin.”

⁷Musa owaco ri Aron ni, “Core cegin gi migam aka itimi cowirok perin ma mic ma cwako reco kodi mic awaŋa perin, aka itimi cowirok ma cwako reco perin kodi apa ji. Tim cowirok ma mic pa ji, aka itimi cowirok ma cwako reco pajo, paka Rwoth owaco.”

⁸Aron ocore cegin gi migam, aka othumo rwath ma mic ma cwako reco, m'oyido obedo apere.

⁹Wot Aron jomiyo go remo, aka oluth'iye lwet cinge to wiro i tunge migam. Remo m'odoŋ go okonjo woko i tiendi migam.

¹⁰To bor, roge ario, kodi adec maber loyo ma cuny, go owaŋo i wi migam, paka Rwoth omiyo Musa or.

¹¹Riŋo kodi pien mere go owaŋo gi mac woko ma kambi.

¹²Aron othumo mic awaŋa, aka wote jokelo rigo remo, to go kiro thoko migam.

¹³Jokelo rigo mic awaŋa kodi adec je, kodi wic, aka go owaŋo i wi migam.

¹⁴Aron olwoko gigipiny ma iye kodi olenge, aka owaŋo, kanyacel gi mic awaŋa, i wi migam.

¹⁵Aron okelo mic pa ji, okwanyo diel ma mic ma cwako reco pa ji, othumo, aka omiyo ma cwako reco, paka marapena.

¹⁶Go okelo mic awaŋa, aka otimo cowirok mere cungo kwoŋ kwer mere.

¹⁷Go okelo mic ma cemo manyinge, ojowo masi cinge, aka owaŋo i wi migam, medo i wi mic awaŋa m'odikin.

¹⁸Go othumo megikwe kodi wod rombo ma cowirok ma mic ma siem, m'oyido obedo apa ji, aka wot Aron jokelo rigo remo mere, to kiro thoko migam.

¹⁹Aka bor ma megikwe kodi wod rombo, yiw rombo maleny, bor ma umo gigipiny ma iye kodi roge je, adec maber loyo ma cuny,

²⁰joketho i wi thundho, aka go owaŋo bor i wi migam.

²¹Aka thundho kodi eme maracuc Aron otiŋo malo ri mic m'otiŋ malo ruwaŋ Rwoth, paka Musa omiyo or.

²²Aron otiŋo cinge malo yubongi ji aka omiyo jo silwany. Aka go oloro piny munyo otieko timo cowirok ma mic ma cwako reco, mic awaŋa, kodi mic ma siem.

²³Musa kodi Aron jodonjo i Wema ma romo, aka jowok to jomiyo ji silwany aka dwoŋ pa Rwoth oneno ri ji je.

²⁴Mac owok ruwaŋ Rwoth aka oumo migam ma mic awaŋa kodi bor; aka ji je joneno, jokoko, to jopodho piny gi nyim jo.