Read dhopadhola Yeremia 12 Bible Online

Yeremia 12 - dhopadhola bible

Yeremia 12

¹Itimo gim'otire, awi Rwoth, k'ageŋisa rin; kucel d'aosa banja paran ruwaŋin. Raŋo gima jokidakana jotimo kadho maber? Raŋo jobanirok je jowinjo maber?

²Ipidho jo, to jorwako fuc, jodongo to jonyak olemo, noknok joluwo maber kwoŋin, kucel jokipar kwoŋin.

³To in, awi Rwoth, iŋeyan; inenan aka itemo paro paran ka nitie kwoŋin. Yway jo woko paka rombo m'ikidho thumo, aka ikethi jo gicen ri ndelo m'ilathum'iye jo.

⁴Piny oywaki kiri keraŋo, to lum ma kisi ndelo thwo woko? Ro kidakana pa jono ma jobed'iye ogwaŋe kodi winyin iyweyo woko jo, aka kwoŋbedo ji jowaco ni, “Were kinen gima watimo.”

⁵Rwoth owaco ama: Yeremia, k'itieko ŋwec gi joman to joolin, onyo inopiem nedi gi kayinin? Aka k'inen ipodho piny i piny maber inonyal nedi i lule ma Yordan?

⁶Kole kiri wade perin, joma peco mewin won, jotieko kisita in; joywakin gi pigi waŋ jo; ikir'iyey jo, kada joluwo wac ma nyamere kodin.

⁷Rwoth waco ama: Atieko jwango Isiraili, atieko kijala alunja paran. Atieko miyo ji m'amaro, i cingi jokwor pajo.

⁸Alunja paran jotieko lokere ran, paka simbwor i lule. Otieko tiŋo dwonde kwoŋan, riameno adaki go.

⁹Ji paran m'oyer jocale winyo, m'obuko yath jokwinyo wok i thenge je. Lwoŋ ogwaŋe mager madudi, jobin jowocami jo.

¹⁰Jokwath kweth jotieko reyo woko ndelo vini paran, jotieko nyono piny ndelo paran, jotieko loko ndelo paran maŋon, thim m'ojwangi.

¹¹Jotieko loko go thim, kam'ojwangi, go ywak ran. Piny gipi olokere thim, aka ongoye ŋata dewo.

¹²I wi tendere tendere ma thim je ji jobino kinyaga; kole abor pa Rwoth neko ji wok i gike acel tundo i man; ongoye ŋata laboth.

¹³Jocwoyo ŋano to jokeco kudhin, jotieko olo, to jok'olimo gimoro. Wiy jo lakwot gi ranyak pajo kwoŋbedo nge pa Rwoth maliel.

¹⁴Me apaka Rwoth waco mako kwoŋ joger pa Joisiraili ma jogeyo gir'alunja ma go otieko miyo ji pere Isiraili lunjo: Acegin muko jo woko wok i lowo pajo, aka alamuko woko Joyuda wok i dier jo.

¹⁵Aka k'atieko muko woko jo, alamako wor gi jo kendo, t'akelo jo kendo iy'alunja pajo kodi i piny pajo, kisi dhano kwoŋ jo.

¹⁶Aka nyaka, ka jofonjere tim pa ji paran, kwoŋirok gi nyingan ni, “Paka Rwoth kwo.” Paka jofonjo ji paran kwoŋirok gi Bal, nyaka jobino getere i dier ji paran.

¹⁷To ka nono moro jok'owinji, nyaka abino fudho woko kicutho t'areyo woko, Rwoth waco.