Read dhopadhola Yeremia 13 Bible Online

Yeremia 13 - dhopadhola bible

Yeremia 13

¹Rwoth owaco ran ni, “Kidhi inyew pale ma law mafoth, aka iruki, aka ikir'ilwok i pi.”

²Ameno t'anyewo pale cungo kwoŋ wac pa Rwoth, t'aruko.

³To wac pa Rwoth bino ran madirio, ka waco ni,

⁴“Kwany pale m'inyewo m'iruko no, ikidhi i malawa Yufrete aka ikani kenyo i ŋungu tele.”

⁵Ameno akidho t'akano i thengi Yufrete paka Rwoth ooran.

⁶Aka munyo hongo okadho m'oromo, to Rwoth waco ran ni, “Ay malo ikidhi i thengi Yufrete, aka ikwany pale ma ndirino aorin kano kenyo.”

⁷Kenyo t'akadho i thengi Yufrete, akunyo t'akwanyo pale wok kam'oyido akan'iye. To oyido otop m'ongoye kony.

⁸Kenyo wac pa Rwoth obino ran kendo, ka waco ni:

⁹Rwoth waco ama: “Ameno won apaka alareyo woko delok pa Yuda kodi delok madwoŋ pa Yerusalem.

¹⁰Ji mareco me, ma jokwero winjo wac paran, ma gi wictek jotimo gima wegi jomito aka onyo jotieko kidho ri werin man tiyo rijo gi lamo jo, jolacale gi pale me m'ongoye kony.

¹¹Kole paka pale moko i pier jo, ameno apaka amiyo Joisiraili gibe kodi Joyuda gibe cwirok kwoŋan, Rwoth waco, ŋey jowonyal bedo ran ji paran, jowomiy nyingan pak kodi dwoŋ. To jok'onyalo winjo.”

¹²Rwoth oluwo kodan, owaco ni, Yeremia, wac rijo ni Rwoth waco ama, Were pa Isiraili: “Wopoŋ kisi jagi moro je gi vini. Aka jolapenjin ni, ‘Oyido iparo ni wakuya ni kisi jagi moro je iripo poŋo gi vini?’ ”

¹³Kenyo ibino dwoko jo ni: Rwoth waco ama: “Acegin poŋo joma bedo i piny me je, kerin ma jobedo i kom ma dhum pa Daudi, jocway ri Were i wi migam, jotuci wac Were, kodi joma bedo i Yerusalem je gi mero.

¹⁴Aka aladiyo jo acel kwoŋ nyawote, jonywol gi nyithindho kanyacel, Rwoth waco. Ak'omaki wor, ak'okoy kendo aka ak'obedi gi wor k'areyo jo.”

¹⁵Ji ma Isiraili, winji win, aka cik win ithi win, wikiri wibedi jokwoto, kole Rwoth otieko luwo.

¹⁶Miy win Rwoth Were mewin dwoŋ, ka go fodi k'okelo mudho, kendo ka tiendi win fodi k'orwombere, wi gote ka ŋamba riedo; ka wirango lero, go wiro gino i mudho madwoŋ to timo gino mudho m'opoto.

¹⁷To ka wik'owinji, alaywak nyaliŋliŋ ro delok mewin; alaywak gi geregere aka pigi waŋan laoy kwoŋbedo okadhi gi ji pa Rwoth paka jotwec.

¹⁸Rwoth owaco ran ni, Waci ri kere gi nyamicala ama: Bedi win i kom ma piny, rupiri sangaria mewin maŋon, otieko podho piny wok i wiwin.

¹⁹Tindin madongo ma yupiny jocegere m'ongoye ŋat'oyaw jo; Yuda gibe oter jo i piny man, oter joje i piny man.

²⁰Tiŋi waŋin malo akinen, jokwor perin ma jobino wok yumalo. Nikune ji perin m'oyido omiyin, ji perin m'oyido i dele gi jo swa?

²¹Inowaci nedi ka ji m'oyido iparo ni jobedo merin perin jokengila in to jodhumin? Litho k'omakin paka dhako ma nywol?

²²Aka k'ipenjere gi i cunyin ni, “Raŋo gigipiny me jopodho kwoŋan?” Obedo ro reco mewin ma kiwacere m'omiyo otiŋ rinda mewin malo t'inindo gi win gi mbaka.

²³Jaethopiya nyalo wiro rangi ma cal pere kosa kwac nyalo wiro rangi mere m'othon othon? Ka jonyalo, onyo win m'ongoye gima witimo ma wiŋiyo timo reco, winyalo fonjere timo gimaber.

²⁴Alakedho win paka cuŋ ma koyo kudho wok i thim.

²⁵Me a gima latimere riwin, me a adec m'atieko kipima riwin, Rwoth waco, kwoŋbedo wiy win owil kodan to wigeno twodo.

²⁶An won gipi alatiŋo rindin mewin i nyim win t'ineno wickwot mewin.

²⁷Atieko neno amien mewin, cot mewin kodi ywe mewin, kidakana mewin ma malaya mewin i wi tendere i kisawe. Kidamba rin, awi Yerusalem! Latero hongo aŋo mafodi k'olony win?