Read dhopadhola Yeremia 16 Bible Online

Yeremia 16 - dhopadhola bible

Yeremia 16

¹Wac pa Rwoth obino ran:

²“Ikir'inywom dhako, aka ikir'ibedi gi nyithindho i kabedo me.

³Kole Rwoth waco ama mako kwoŋ nyithindho mayac gi nyir m'inywolo i kabedo me, kodi mako kwoŋ mon gi cwo ma jonywolo jo i piny me:

⁴Jolatho two ma kiwacere. Ongoye ŋata laywako jo, aka ongoye ŋata layiko jo. Jolalokere paka woyo manitie i wi lowo. Jolatho g'abor kodi kec, aka delkwoŋ jolalokere cemo ri winyin ma koyo kodi ri ogwaŋe mager ma piny.”

⁵Kole Rwoth waco ama: Ikir'idonji i ot ma ywak, kosa ikir'ikidhi iywaki, kosa ikir'iywor jo; rupiri atieko kwanyo woko siem paran kwoŋ ji me, Rwoth waco, mar paran makiwire kodi ŋono paran.

⁶Jomadongo gi jomathindho jolatho i piny me; k'oyiki jo, aka ongoye ŋata laywako jo; ongoye ŋata lalielo kosa cido ye wiye rijo.

⁷Ongoye ŋata laturo mugat ri jaywak, ma kweyo cuny jom'okeŋ ji pajo. Ongoye ŋata lamako wor gi dhano m'okeŋ bamere kosa min.

⁸Ikir'idonji i ot ma kalima ma bedo piny gi jo, ma cemo gi jo.

⁹Kole Rwoth pa lwak jolweny, Were pa Isiraili waco ama: “Akidho kwanyo woko wok i piny, i hongo perin kodi ruwaŋin, dwondi jo ma kisangala, dwondi jamweha kodi dwondi mweha.”

¹⁰K'inowaci rijo wac me je, to jopenjin ni, “Raŋo Rwoth oluwo gimarac madwoŋ me je kwoŋ wan? Reco mawan obedo aŋo? Reco aŋo ma watieko timo kwoŋ Rwoth Were mawan?”

¹¹Nyaka ibino dwoko jo ni: Obedo kwoŋbedo kwarere pajo jojwangan Rwoth waco, aka onyo jokadho ri werin man aka jotiyo rijo to jolamo jo, jotieko jwangan aka jok'okuro cik paran.

¹²To win witieko timo marac loyo kiri kwarere mewin. Kisi dhano kwoŋ win wiye tek aka jareco, wikwero winjan.

¹³Riameno alabolo win woko wok i piny me yuthenge ma piny ma win kosa kwarere pajo kuya, aka korago, wilatic ri werin man wor g'odieceŋ, kole ak'onyuthi win ŋono.

¹⁴Riameno, adieri hongo bino, Rwoth waco, ma ji doko jok'okwoŋere kodan paka Were makwo, go m'ofudho ji ma Isiraili woko ma piny ma Misir.

¹⁵To jolakwoŋere kodan paka Were makwo m'ofudho ji ma Isiraili woko ma piny ma yumalo kodi woko ma piny je kam'oyido go okedh'iye jo. Kole aladwoko jo i piny pajo won, piny ma cango amiyo kwarere pajo.

¹⁶Onyo pama adhiro jokitoga paran, Rwoth waco, aka jolamako jo. Rumacen aladhiro jodwar kweth, aka joladwaro jo wok i kisi gote kodi i kisi tendere, kodi i ŋungu telin.

¹⁷Kole acomo waŋan i tim pajo je; jok'opanere kwoŋan, kosa reco pajo k'opanere kwoŋan.

¹⁸Alamiyo jo gir'acula dirio ro reco kodi reco pajo kwoŋbedo jotieko koco piny paran gi cal kodi mulambin pajo, aka jotieko poŋo gir'alunja paran g'amien pajo.

¹⁹Awi Rwoth, meni paran gi cel paran, kapondo paran i hongo ma teko, nonin je jolabino bongin wok i tielo gi tielo ma piny to jowaco ni: Kwarere mawan jok'olunjo gimoro kwanyowoko twodo, gigipiny masisiri m'ongoye iye magowa.

²⁰Ji jonyalo timo werin rijo wegi? Nger gi go jok'obedo werin!

²¹“Riameno adieri akidho fonjo jo, hongo me akidho fonjo jo meni paran gi mwamba paran, aka jolaŋeyo ni nyingan obedo Rwoth.”