Read dhopadhola Yeremia 17 Bible Online

Yeremia 17 - dhopadhola bible

Yeremia 17

¹Me apaka Rwoth waco: Ji ma Yuda, reco mewin indiko gi bol pen ma nyweny; ogwor iy'adundin mewin gi tele ma cot mac t'idolo i kona ma migame mewin.

²Ji mewin jolamo i migame kodi i cal m'ogeti ri were madhako Asera i kisi tiendi yath manyaboke pendi, kodi i wi tendere m'oŋawere,

³wi gote i piny m'othangere. Ŋaŋo mewin gi cwe mewin alamiyo paka gim'onyaga; paka cul ri reco mewin iy'adec mewin je parom.

⁴Gi tim mewin won wilakeŋ gir'alunja ma cango amiyo win, aka alamiyo witiy ri jokwor mewin i piny ma wikuya, kole i nge paran mac omoko ma laliel cil gi cil.

⁵Me apaka Rwoth waco: Kwoŋ ri jono ma jogeno nyaka ji to joloko ji meni pajo, joma cuny jo bor gi Rwoth.

⁶Jolacale paka dudi iy'opalipat, aka jok'onen ka bero obin. Jolabedo kam'othwo ma thim, i lowo ma cumbi ma ji kibed'iye.

⁷Jasilwany a ŋata geno Rwoth, ma geno pere nitie i Rwoth.

⁸Go cal yath m'opidhi i thengi pi, ma rwako tiende i pi ma mol. Go kilwor lietho k'obino, aka boke mere doŋ manyaboke pendi. Go kirembi i hongo ma milengela, aka kike nyak olemo.

⁹Ŋa manyalo niaŋ cuny dhano? Ongoye giman ma jatwodo, go two swa ma kinyal botho.

¹⁰An Rwoth, arango cuny ji t'atemo adundin pa ji. Atiyo gi kisi dhano cungo kwoŋ tim pere, cungo kwoŋ gima go timo.

¹¹Paka winyo ma buto to toŋo tonge ma k'onywolo, apaka jono ma jodhuro ŋaŋo i yo m'okom; gi diere kenyo ŋaŋo laweyo jo, aka i gike ma kwo pajo nyaka to nyutho kamaler ni oyido jomiŋ.

¹²Kom madwoŋ ma dhum, m'oŋawere malo wok i cakirok, obedo Kabedo Maleŋ mawan!

¹³Awi geno pa Isiraili! Awi Rwoth! Jono je ma jojwangin ibino ketho jo i wickwot; jono je ma joweyin ilandiko nyingi jo i pendi piny, rupiri jotieko jwango cakirok ma pi ma kwo, in Rwoth.

¹⁴Cangan, awi Rwoth, aka abino cango; bothan, aka abino both; kole ibedo pak paran.

¹⁵Neni paka jopenjan ni, “Nikune wac pa Rwoth? Weyi wobin!”

¹⁶To fodi akiringo t'aweyo bedo jakwath i tic perin, kosa fodi akigomba teko rijo. Iŋeyo gim'owok i dhokan; iŋeyo gim'awaco.

¹⁷Ikir'ilokere ran lworo madwoŋ; ibedo kapondo paran i hongo ma teko.

¹⁸Weyi wiy joma miyan litho wokwoti, to ikir'imiy wiyan wokwoti; weyi wiy jo wokwoti, ikir'imiyan bwok; keli kwoŋ jo ndelo ma teko; aka irey jo kicutho.

¹⁹Rwoth owaco ran ama: Yeremia kidhi icungi i waŋkace pa ji, kama kerin ma Yuda jodonjo gine kodi kama jowok gine, aka i waŋkace je ma Yerusalem,

²⁰aka iwaci rijo ni: Winji win wac pa Rwoth, win kerin ma Yuda, Yuda gibe, kodi ji je ma jobedo i Yerusalem, ma jodonjo gi waŋkace me.

²¹Rwoth waco ama: Ro bero ma kwo mewin, gwokere win ni wikibielo bieto i ndelo ma sabato kosa wirwako gino gi waŋkace ma Yerusalem.

²²Aka wikiri witiŋ bieto wok i udi mewin i sabato kosa witim tic moro je, to kur win sabato paka gimaleŋ, paka aoro kwarere mewin.

²³Kucel jok'owinjo kosa ciko ithi jo; wiy jo olokere matek to jokwero winjo kosa jolo fonji.

²⁴To ka winowinjan, Rwoth waco, to wibedo ma wikikelo bieto moro gi waŋkace ma tindi madwoŋ me i ndelo ma sabato, to wikuro ndelo ma sabato paka gimaleŋ to wibedo ma wikitimo tic i ndelo no,

²⁵kenyo nyaka joladonjo i waŋkace ma tindi madwoŋ me, kerin ma jobedo i wi kom ma dhum pa Daudi, ma jogweyo cawilin kodi kayinin, jo kodi jotel pajo, ji ma Yuda kodi joma bedo i Yerusalem; aka ji jolabedo i tindi madwoŋ me cil gi cil.

²⁶Ji jolabino wok i tindin ma Yuda kodi kabedo ma jothoko Yerusalem, wok i piny pa Benyamin, wok i tiendi gote, wok i piny matendere, kodi wok yupiny, ka jokelo mic awaŋa kodi cowirok, mic ma kodhi kodi buban, gi kelo mic ma foyo i Ot pa Rwoth.

²⁷To ka wik'owinjan, ma kuro ndelo ma sabato paka gimaleŋ, gi tiŋo bieto gi waŋkace ma Yerusalem i ndelo ma sabato, nyaka alamoko mac i waŋkace mere; bino waŋo woko cel ma Yerusalem aka ongoye ŋat'onyal neko.