Read dhopadhola Yeremia 2 Bible Online

Yeremia 2 - dhopadhola bible

Yeremia 2

¹Wac pa Rwoth obino ran ka waco ni:

²Kidhi ititi mikwenda me ri kisi dhano ma Yerusalem. Me apaka Rwoth waco: “Apoyo cikirok perin ma mar munyo fodi i soye, mar perin paka mweha, nger m'iluwan iye i thim, i lowo m'oyido fodi k'ocwoy'iye.

³Isiraili oyido obedo gimaleŋ ri Rwoth, ranyak marapena ma keco pere. Jono je ma jocuto go jobedo gi banja; aka teko oyimere kwoŋ jo.”

⁴Winji win mikwenda pa Rwoth, win nyikway Yakobo, kodi pecin je ma ot pa Isiraili.

⁵Me apaka Rwoth waco: “Gimarac aŋo ma kwarere pajo jonwaŋo kwoŋan, ma jokadho bor kwoŋan, to jokidho ri gigipiny ma pilok, to wegi jolokere gipilok?”

⁶Jok'openjere ni, “Nikune Rwoth, m'owodho wan wok i piny Misir, go m'otelo i thim, i piny m'obipere, m'opalipat kodi buce, i piny m'othwo kodi mudho m'opoto, i piny m'ongoye ŋata luw'iye, kam'ongoye ŋata bed'iye?”

⁷Akelo win i piny m'oŋaŋ ni wicam ranyak mere kodi gigipiny mere mabeyo. To munyo widonjo wikoco lowo paran, to wiloko alunja paran gir'amien.

⁸Jocway ri Were i wi migam jok'openjo ni, “Nikune Rwoth?” Jono ma jokuro cik jok'oŋeyan; jokwath jogwenyere kwoŋan; jotuci wac Were joluwo kwoŋ Bal ayino, to jodwaro gigipiny ma bu magowa.

⁹Riameno asegeya win kendo, Rwoth ama luwo, aka asegeya nyikway win.

¹⁰Ŋadi win i thengi nam ma Sipro aka winen. Dhiri win ji i Kedar aka wikaŋasa maber swa; neni win k'inen gima pameno oyido otieko bedo.

¹¹Nono moro otieko wilo werin pere, kada nende bedi ni jok'obedo werin? To ji paran jotieko wilo dwoŋ pajo ri gimoro ma kikel magowa.

¹²Dhier win, awi polo, kwoŋ gime, bwoki, aka wijwangere makicutho, Rwoth waco.

¹³Kole ji paran jotieko timo reco ario: Jojwangan, waŋ pi ma pi ma kwo, to jokunyo kacoko pi rijo wegi, kacoko pi m'obare ma kinyal tiŋo pi.

¹⁴Isiraili obedo ŋeca? Onyo raŋo olokere gim'onyaga?

¹⁵Nyithindhi simbwore jotieko kiuja kwoŋe, jotieko kiuja malo. Jotieko loko lowo pere opalipat, tindin mere madongo olokere gundin, m'ongoye joma bed'iye.

¹⁶Medo kwoŋ meno, ji ma Mefis kodi Tapanihes jotieko turo woko kahanga wiye.

¹⁷Isiraili, iwon ikitieko kelo kwoŋin gime ro jwango Rwoth Were perin, hongo ma go otelin iye i yo?

¹⁸Onyo riameno ilimo magowa aŋo gi kidho i Misir, madho pi ma Nayil? Kosa ilimo magowa aŋo gi kidho Asiria, madho pi ma Yufrete?

¹⁹Kidakana perin lamiyin gir'acula, aka kwedirok perin kwoŋan lathumo rin banja. Ilaŋeyo t'ineno ni obedo gimarac aka kec ri in jwango Rwoth Were perin; ikilworan, Rwoth Were pa lwak jolweny waco.

²⁰Rwoth Were waco ni, “Isiraili, cango con ikwero meni paran t'ikwero woran gi laman t'iwaco ni, ‘Ak'otim, alatimo kibenga ayin’. I wi kisi tendere m'oŋawere je, kodi i tiendi yath manyaboke pendi je, iwaya i iye t'inindo kodin paka malaya.[1]

²¹Kucel apidho in paka yath vini m'ayero wok kwoŋ kodhi maber loyo. To doko iwire nedi t'inyekere t'ilokere yath vini makicar?

²²Kad'ilwokere gi soda t'ioro sabun kweth, cilo mareco perin fodi nitie ruwaŋan,” Rwoth Were waco.

²³Inyalo waco nedi ni, “Fodi akikocere, fodi akikidho ri Bal.” Neni royo perin i milelo; ŋey gim'itieko timo. Icale pa nyathi ŋamia ma nyaka ay ma dwir ma ŋweco malo gicen.

²⁴Icale punda madhako ma mito ringo gi ma wode yuthim, i lietho pere ŋweyo koyo! Ŋa manyalo geŋo awanya pere? Ongoye jono ma jodwaro go ma joripo locirok; jolanwaŋo go i dwe pere.

²⁵Isiraili ikir'imiy par tiendin woyure i kisia mewin kodi dwondin winjo riyo. T'iwaco ni, “Obedo gim'ongoye geno, rupiri atieko mito werin makicar, aka alaluwo jo.”

²⁶Paka jakwo wiye kwot k'omaki, ameno apaka wiy Joisiraili bino kwot. Jo, kerin pajo, jotel pajo, jocway ri Were i wi migam pajo kodi jotuci wac Were pajo,

²⁷ma jowaco ri yath ni, “Ibedo bawan.” Kodi ri tele ni, “Iŋat'inywolan.” Kole jotieko wiro ran ŋey jo, makiweno waŋ jo. To i hongo ma teko pajo jowaco ni, “Biye both wan!”

²⁸To nikune werin mewin ma witimo ma konyo win? Weyi jowobin, ka jonyalo botho win, i hongo mewin ma teko; kole winitie gi werin kweth paka winitie gi tindin madongo, awi Yuda.

²⁹Raŋo wiŋunyaŋunya kodan? Wijoje witieko gwenyere kwoŋan.

³⁰Atieko rwadho nyithindho mewin piny; jokwero winjo fonji. Abor mewin wegi ocamo woko jotuci wac were mewin paka simbwor ma reyo woko jo.

³¹Win, Joisiraili, par win kwoŋ wac pa Rwoth! Oyido abedo thim ri Isiraili, kosa piny ma mudho m'opoto? Raŋo onyo ji paran jowaco ni, “Wanitie gi thwolo, wak'odwoki bongin kendo?”

³²Wiy nyako nyalo wil gi pogo pere, kosa wiy mweha wil gi ruk pere? Kucel wiy ji paran owil kodan, ma hongo malac.

³³Nga wiŋeyo timo can ma dwaro jomitirok mewin! Ameno kiri ri mon ma jodakana witieko fonjo jo kula mewin.

³⁴Bende i wi rinda mewin nitie remo ma kwo pa jocandi ma bukony, kada wimako jo munyo joturo udi. Kucel gi gigipiny me je

³⁵wiwaco ni, “Ongoye gima watimo marac, adieri nge pere owire woko kwoŋan.” Pama onyo akidho thumo riwin banja ma waco ni, “Wakitimo gimarac.”

³⁶Raŋo witero gigipiny gi sewo? Wiwiro kula mewin! Wilakwotere wic gi Misir, paka okwot wiy win gi Asiria.

³⁷Wok kenyo bende wilakadho, i rem madwoŋ; kole An Rwoth otieko kwero woko jono ma wigeno, aka wik'olim gimoro luwo kwoŋ jo.