Read dhopadhola Yeremia 21 Bible Online

Yeremia 21 - dhopadhola bible

Yeremia 21

¹Me wac pa Rwoth m'obino ri Yeremia wok bongi Rwoth, munyo kere Zedekia odhiro rigo Pasur wod pa Malikia kodi jacway ri Were i wi migam Zefania wod pa Maseya, ka waco ni,

² “Mondo penji Rwoth riwan, rupiri kere Nebukadineza ma Babilon cano lweny gi wan; kono miti Rwoth otim gir'aura riwan, paka noknok timo, to miyo go gonyere kwoŋ wan.”

³Kenyo Yeremia owaco rijo ni: Wibino waco ri Zefania ama:

⁴Rwoth waco ama, Were pa Isiraili: “Zedekia, akidho kikengila jolweny perin ma jolwenyo kodi kere ma Babilon kodi jolweny pere ma jothoko win woko ma cel. Alakelo jo kanyacel i dier tindi madwoŋ me.

⁵An won gipi alalweny gi win gi cingan m'oyare gi badan ma meni, i nge, aŋedha cuny kodi i keme madwoŋ.

⁶Alaneko woko joma bedo i tindi madwoŋ me, ji kodi ogwaŋe; jolatho i two nundu madwoŋ.

⁷Rumacen mere, Rwoth waco, alamiyo kere Zedekia ma Yuda, gi ŋecin pere, kodi ji ma tindi madwoŋ me, jono ma joboth two nundu, abor kodi kec i cingi kere Nebukadineza ma Babilon, i cingi jokwor pajo, i cingi joma dwaro kwo pajo. Go bino neko jo g'abor mabith; go k'omaki gi jo wor, kosa k'okoy jo, kosa k'omaki wor.”

⁸Kenyo to Rwoth waco ran ni awaci ri ji ni, “E, aketho ruwaŋ win royo ma kwo kodi royo ma tho.

⁹Jono ma jobedo i tindi madwoŋ me jolatho g'abor, kec kodi two nundu; to jono ma jotiŋ cingi jo malo ri Jobabilon ma jothoko win jolakwo aka jolabedo gi kwo pajo paka kemba ma lweny.

¹⁰Kole atieko como waŋan kwoŋ tindi madwoŋ me ro gimarac makiweno ro bero, Rwoth waco. Abino ketho i cingi kere ma Babilon, aka go bino waŋo woko gi mac.”

¹¹Ri ot pa kere ma Yuda wac ni: Winji win wac pa Rwoth,

¹²awi nyikway Daudi! Rwoth waco ama: Tim win tiro odikin, aka wigony i cingi jadic kisi nyatoro m'otiek kwalo gipere, ka k'obedo ameno keme paran bino moko paka mac, to liel, m'ongoye ŋat'oneki, kwoŋbedo tim mewin marac.

¹³Amon kodin, Yerusalem, ma bedo malo i wi milelo, awi paka tele ma kam'obipere, Rwoth waco; in m'ipenjo ni, “Ŋa m'olor piny kwoŋ wan, kosa ŋa manyalo donjo i kabedo mawan ma wapond'iye?”

¹⁴Alamiyo win gir'acula cungo kwoŋ tim mewin, Rwoth waco; alamoko mac i lul mere, aka alareyo woko gimoro je m'othoko go.