Read dhopadhola Yeremia 24 Bible Online

Yeremia 24 - dhopadhola bible

Yeremia 24

¹Rwoth onyuthan aditin ario ma nyandere m'oketh ruwaŋ Ot pa Rwoth. Me obedo rumacen ma Kere Nebukadineza ma Babilon otieko tero i twec wok i Yerusalem Kere Yekonia wod pa Yehoyakim ma Yuda, kanyacel gi jotel ma Yuda, jopac, kodi jotic ma jondijo.

²Adita marapena otiŋo nyandere maber tektek, nger nyandere ma pen cek; to adita man mere oyido otiŋo nyandere marac tektek, ma k'onyalo camere.

³To Rwoth penjan ni, “Yeremia, ineno aŋo?” Adwoko ni, “Nyanderin, nyanderin mabeyo, jobeyo tektek, nyanderin mareco, jorac tektek, ma kinyal camo.”

⁴Kenyo wac pa Rwoth obino ran.

⁵Me apaka Rwoth, Were pa Isiraili waco ama: Paka nyanderin ma jobeyo me, alatero paka gimaber jotwec ma jowok Yuda, m'atieko riemo jo woko wok i kabedo me kidho i piny ma Babilon.

⁶Alacomo waŋan kwoŋ jo kicutho, aka aladwoko jo i piny me. Alageto jo, aka ak'orey woko jo; alapidho jo, aka k'ofudhi jo.

⁷Alamiyo adundo ma miyo jo ŋeyo ni Abedo Rwoth; jolabedo ji paran t'abedo Were pajo, kwoŋbedo jolagik bongan g'adundin pajo je.

⁸To Rwoth waco ama: “Paka nyanderin mareco tektek ma kinyal camo, ameno apaka alatic kodi Kere Zedekia ma Yuda, jotel pere, ji ma jodoŋ Yerusalem ma jodoŋ i piny me, kodi jono ma jobedo i piny ma Misir.

⁹Alaloko jo ginyero, gimoro marac, ri kerin je ma piny, lifol, gir'awaca, aŋala, t'ioro nyingi jo paka kwoŋ kisi kamoro je m'akedh'iye jo.

¹⁰Alakelo lweny, kec, two nundu kwoŋ jo, cuka jorere woko kicutho wok i piny m'amiyo jo kodi kwarere pajo.”