Read dhopadhola Yeremia 25 Bible Online

Yeremia 25 - dhopadhola bible

Yeremia 25

¹Me wac m'obino ri Yeremia ma mako kwoŋ ji je ma Yuda, i oro mar'aŋwen apa Kere Yehoyakim wod pa Yosia ma Yuda (meno oyido oro marapena apa Kere Nebukadineza ma Babilon)

²ma jatuci wac Were Yeremia oluw'iye gi ji je ma Yuda kodi ji je ma jobedo i Yerusalem:

³Ma oro piero ario g'adek, wok i oro mar'apar g'adek apa Kere Yosia wod pa Amon ma Yuda, tundo gunyo ni, wac pa Rwoth obino ran, aka atieko luwo g'amen riwin, to wikwero winjo.

⁴Kada nende Rwoth omena dhiro riwin ŋecin pere jotuci wac Were, fodi wikiwinjo kosa ciko ithi win ma winjo

⁵ka jowaco ni, “Wire win, kisi dhano kwoŋ win, i royo mewin marac kodi tim ma kidakana, nyaka to widoŋ i piny ma Rwoth otieko miyo win kodi kwarere mewin macon kodi ma cil gi cil.

⁶Jowaco riwin ni wikiri wikwoŋ to witiyo ri werin man gi bedo ma wikimiyo Rwoth nge gi lamo cal ma witimo. Bedi wiwinji Rwoth, di go k'omiyo win gir'acula.”

⁷Kucel wikwero winjan, Rwoth waco, aka ameno onyo wikwinyo nge paran gi cal mewin ma witimo aka onyo wikelo litho kwoŋ win.

⁸Riameno me apaka Rwoth pa lwak jolweny waco: “Kwoŋbedo winjo wac paran,

⁹akidho dhiro ri nonin je ma yumalo, Rwoth waco, kiri ri Kere Nebukadineza ma Babilon, ŋeca paran, alakelo jo kwoŋ piny me kodi ji ma iye, kodi kwoŋ nonin me thoko; alareyo jo kicutho, t'aloko jo ginyero kodi gidhier, gibwok ma cil gi cil.

¹⁰Alareyo woko kwoŋ jo derino ma siemirok kodi ma kisangala, dwondi jamweha kodi dwondi mweha, derino pa cuma ma rego kodi lero pa tala.

¹¹Piny me gibe lalokere gunda gi kam'ojwangi, aka nonin me jolatic ri kere ma Babilon ma oro piero ario.

¹²Kenyo ka oro piero ario otieko rumo, alamiyo gir'acula ri kere ma Babilon kodi nono no, piny ma Babilon, ro reco pajo, Rwoth waco, k'aloko piny no gunda ma cil gi cil.

¹³Alakelo kwoŋ piny no wac je m'atieko luwo, kisi gimoro je m'ondiki i kitawo me, ma Yeremia otieko luwo kwoŋe kwoŋ nonin je.

¹⁴Kole nonin kweth kodi kerin madongo jolaloko jo ŋecin; aka alaculo jo cungo kwoŋ tim pajo kodi tic ma cingi jo.”

¹⁵Me apaka Rwoth, Were pa Isiraili, owaco ran: “Ee agwata ma vini ma keme paran, aka imiy nonin je m'adhirin bongi jo jowomadhi.

¹⁶Jolamadho to jotangatanga to wiy jo nyekere kwoŋbedo abor m'adhiro i dier jo.”

¹⁷Ameno akwanyo agwata i cingi Rwoth, t'amiyo nonin je ma Rwoth odhiran bongi jo madho.

¹⁸Yerusalem kodi tindin madongo ma Yuda, kerin mere kodi jotel mere, ma loko jo gundin kodi kam'ojwangi, gima miyo dhano dhier kodi kwoŋ, paka jonitie kiri konon.

¹⁹Ee nyingi joman ma jomadho gim'oyido nitie iy'agwata: Farawo kere ma Misir, ŋecin pere, jotel pere, kodi ji pere je;

²⁰ji je m'oruwere; kerin je ma piny ma Uz; kerin je ma piny pa Jofilistia paka tindin madongo ma Asikelon, Gaza, Ekiron, kodi jom'odoŋ ma Asdod;

²¹Edom, Mowab, kodi Joamon;

²²kerin je ma Tire, kerin je ma Sidon, kodi kerin je ma kigodin m'othoko nam;

²³Dedan, Tema, Buzi, kodi ji je ma jolielo wiy jo;

²⁴kerin je mapa Jowarabu kodi kerin pa ji je m'oruwere ma jobedo i thim;

²⁵kerin je ma Zimiri, kerin je ma Elam, kodi kerin je ma Mediya;

²⁶kerin je ma yumalo, ma jowok bor gi cegin, ma joluwere, kodi kerin ma piny ma jonitie. Ka jocowo, kere ma Babilon bino madho.

²⁷Kenyo to Rwoth waco ran ama: Waci ri ji ni Rwoth pa lwak jolweny, Were pa Isiraili waco ama: Medhi win, mer win to wiŋok. Podhi win piny to meni loyo win ma ay, kwoŋbedo abor m'adhiro i dier win.

²⁸To ka jokwer jolo agwata wok i cingin ma madho gima iye, kenyo ibino waco rijo ama: Rwoth pa lwak jolweny waco ama: Wiripo madho!

²⁹Kole acako kelo rerok kwoŋ tindi paran madwoŋ, aka winonyali geŋo nedi gir'acula? Ak'owey m'akimiyo win gir'acula, kwoŋbedo alwoŋo abor kwoŋ ji je ma jobedo i piny, Rwoth pa lwak jolweny waco.

³⁰In Yeremia, iripo tuco rijo kisi gimoro je m'atieko waco. Iripo waco rijo ama: Rwoth lakiuja wok i polo, kodi wok i kabedo pere maleŋ to jero; go lakiuja gi meni kwoŋ ji pere, to koko paka jono ma jodhiŋo olemo, kwoŋ ji je ma jobedo i piny.

³¹Derino lawinjere i tielo je ma piny, rupiri Rwoth nitie gi banja kwoŋ nonin; go donjo i thumo banja ri ji je, aka joma jotimo banja, go laneko jo, Rwoth waco.

³²Rwoth pa lwak jolweny waco ama: Eno teko bino wok i nono tundo i nono, aka koyo madwoŋ cokere wok i witum ma piny.

³³I ndelo no del pa jono ma Rwoth oneko laywore wok i tielo gi tielo ma piny. Ongoye ŋata laywako jo, k'ocoki jo, aka k'oyiki jo. Jolabedo i wi lowo paka woyo.

³⁴Ywak win, win jokwath pa ji, aka wigoy ndur; ŋindere win i buru, win rwodhe pa mwendi. Kole ndelo ma neko win otundo kodi kedhirok mewin, aka wilagore piny paka atawo maŋon.

³⁵Gima jokwath joori ma kwalok ladhiero jo, aka langoye nger ma kwalok ri rwodhe pa mwendi.

³⁶Winji ywak pa jokwath, kodi ywak pa rwodhe pa mwendi! Kole Rwoth reyo woko lum pajo,

³⁷aka mwendi ma jobedo i siem jokedhere kwoŋbedo nge pa Rwoth maliel.

³⁸Paka simbwor ma weyo ŋungu pere, Rwoth ojwango ji pere, kole piny olokere gunda, kwoŋbedo abor pa Rwoth mager, gi kwoŋbedo nge pere maliel.