Read dhopadhola Yeremia 26 Bible Online

Yeremia 26 - dhopadhola bible

Yeremia 26

¹I cakirok ma dhum pa Kere Yehoyakim wod pa Yosia ma Yuda, wac me obino wok bongi Rwoth:

²Me apaka Rwoth waco: Cungi i kapido ma Ot pa Rwoth, aka iluwi kodi ji ma jowok i tindin madongo ma Yuda ma jobino lamo i Ot pa Rwoth; luw rijo wac je m'aorin; ikir'iwey gimoro kad'acel.

³Kono miti jowinji, joje, to jowire wok i yo pajo marac, ŋey anyal wiro paro paran kwoŋ teko ma mito kelo kwoŋ jo kwoŋbedo tim pajo marac.

⁴Ibino waco rijo ni, Rwoth waco ama: Ka winokwer winjan, ma woro cik paran m'amiyo win,

⁵to wiwinjo wac pa ŋecin paran jotuci wac Were m'adhiro riwin i yoto kada wikwero winjo,

⁶nyaka alaloko ot me paka Silo, aka alaloko tindi madwoŋ me kwoŋ ri nonin je ma i piny.

⁷Jocway ri Were i wi migam kodi jotuci wac Were kodi ji je jowinjo Yeremia luwo wac me i Ot pa Rwoth.

⁸Munyo Yeremia otieko luwo gimoro je ma Rwoth ooro go ni wowaci ri ji je, kenyo to jocway ri Were i wi migam kodi jotuci wac Were kodi ji je jopodho kwoŋe, ka jowaco ni, “Ilatho!”

⁹Raŋo iluwo i nyingi Rwoth, k'iwaco ni, Ot me lacale Silo, aka tindi madwoŋ lajwangere, m'ongoye ji? To ji jocokere thoko Yeremia i Ot pa Rwoth.

¹⁰Munyo jotel ma Yuda jowinjo gime, jobino wok i ot pa kere to jokidho i Ot pa Rwoth to jobedo piny i Waŋkac Manyen pa Rwoth.

¹¹Kenyo to jocway ri Were i wi migam kodi jotuci wac Were jowaco ri jotel kodi ri ji je ni, “Jame mito thumo rigo banja ma tho rupiri go otieko luwo kwoŋ tindi madwoŋ me, paka wiwegi witieko winjo gi ithi win.”

¹²Kenyo to Yeremia oluwo kodi jotel je kodi ji je ka waco ni, “Obedo Rwoth am'ooran ni aluw kwoŋ Ot pa Rwoth me kodi tindi madwoŋ me wac je ma witieko winjo.

¹³Onyo riameno wir win yo mewin kodi tim mewin, aka wiwinji dwondi Rwoth Were mewin, aka Rwoth bino wiro paro pere kwoŋ rerok ma go otieko luwo kwoŋ win.

¹⁴To paka ri an, an ee i cingi win. Tim win kodan gima wiparo ni ber aka otire riwin.

¹⁵Ŋey win nyaka gimoro acel adieri ni, ka winonekan, win kodi ji ma tindi madwoŋ me wilabedo gi banja ma neko dhano m'ongoye gi banja, rupiri obedo Rwoth am'ooran kelo wac me je riwin ni wiwinji.”

¹⁶Kenyo to jotel kodi ji je jowaco ri jocway ri Were i wi migam kodi jotuci wac Were ni, “Jame kiripi kodi banja ma tho, rupiri go otieko luwo kodi wan i nyingi Rwoth Were mawan.”

¹⁷Rumacen to jotel mogo ma piny joay malo to jowaco ri ji m'oyido jocokere ama:

¹⁸ Munyo Hezekia oyido obedo Kere ma Yuda, jatuci wac Were Mika m'owok Moras owaco ri ji je ma Yuda ni Rwoth pa lwak jolweny waco ama: Ilafuro Zayon paka ndelo; Yerusalem lalokere kidhur gunda, aka tendere ma Ot pa Rwoth lalokere lul.

¹⁹Kere Hezekia kodi ji ma Yuda jok'oneko Mika. Kucel, Hezekia omiyo Rwoth dwoŋ aka otemo mito ni Rwoth wonyuthi go ŋono. Rwoth owiro paro pere kwoŋ rerok m'oyido go ociko kelo kwoŋ jo. Onyo wan ee wacegin kelo rerok madwoŋ kwoŋ wan.

²⁰Obedo jal moro man, Uriya wod pa Semaya m'owok Keriath Yirim, m'oluwo i nyingi Rwoth kwoŋ tindi madwoŋ me kodi kwoŋ piny me i nger acel paka Yeremia otimo.

²¹Munyo Kere Yehoyakim, gi jolweny pere kodi jotel pere jowinjo wac pa Uriya, kere otemo mito neko go. To munyo Uriya owinjo kwoŋ gino, lworo omako go to ringo pondo Misir.

²²Kenyo Kere Yehoyakim to dhiro Elinathan wod pa Akibor kodi cwo mogo mako Uriya.

²³Jokelo Uriya bongi Kere Yehoyakim wok Misir, m'oneko go g'abor to bolo delkwoŋe kam'iyik'iye ji ma kisi ndelo.

²⁴To cingi Ahikam wod pa Safan oyido nitie gi Yeremia m'omiyo k'onyal ketho go i cingi ji ma neko go.