Read dhopadhola Yeremia 27 Bible Online

Yeremia 27 - dhopadhola bible

Yeremia 27

¹I cakirok ma dhum pa Kere Yehoyakim wod pa Yosia ma Yuda, wac me obino ri Yeremia wok bongi Rwoth.

²Rwoth owaco ran ama: Tim majogi ma thondhe kodi ma nyweny rin, aka ikethi i ŋutin.

³Idhiri mikwenda ri kere ma Edom, kere ma Mowab, kere pa Joamon, kere ma Tire, kodi kere ma Sidon k'iluwo gi bongi jomikwenda ma jobino i Yerusalem bongi kere Zedekia ma Yuda.

⁴Miy jo or me ri jodongo pajo: Rwoth pa lwak jolweny, Were pa Isiraili waco ama: Me a gima wilawaco ri jodongo mewin:

⁵Obedo an ma gi meni paran madwoŋ gi badan m'arieyo m'acweyo gine piny, ji kodi ogwaŋe je manitie i piny, t'amiyo ŋat'asangala gine.

⁶Pama atieko ketho piny me i cingi Kere Nebukadineza ma Babilon, ŋeca paran, aka atieko miyo go kiri ogwaŋe mager madudi tiyo rigo.

⁷Nonin je jolatic rigo, ri wote kodi nyikwaye cuka hongo ma ker pere won opodh'iye, nyaka to nonin man kodi kerin madongo joloko go ŋeca pajo.

⁸To ka nono moro kosa ker moro k'otiy ri kere me, Nebukadineza ma Babilon, to ketho ŋute i majogi pa kere ma Babilon, kenyo abino miyo nono no gir'acula g'abor, gi kec kodi two nundu, Rwoth waco, cuka anocow reyo woko gi cingan.

⁹In, riameno, ikiripi winjo jotuci wac Were perin, kosa dhano moro je ma paro ni ongoye gima latimere yuwaŋe, jolek, joma luwo gi cuny jom'otho kodi jomiliel. Jobino waco rin ni, “Ikir'itiy ri kere ma Babilon.”

¹⁰Kole joluwo riwin twodo, aka lamiyo wokwany win t'itero win i piny man mabor. Alariemo win woko, aka wilarere woko.

¹¹To nono moro je m'okel ŋute to rwako i majogi pa kere ma Babilon to tiyo rigo, kenyo abino weyo win wibedi i piny mewin, wifur to wibedo kenyo, Rwoth waco.

¹²Aluwo gi kere Zedekia ma Yuda i nger acel ama: Keli ŋuti win i majogi pa kere ma Babilon, witiy rigo gi ji pere, aka wibino kwo.

¹³Raŋo wiripo tho, win kodi ji mewin g'abor, gi kec kodi two nundu, paka Rwoth otieko luwo ma mako kwoŋ nono moro je ma k'otiy ri kere ma Babilon?

¹⁴Wikiri wiwinji wac pa jotuci wac Were ma jowaco riwin kwero tic ri kere ma Babilon, kole joluwo twodo riwin.

¹⁵Akidhiro jo, Rwoth waco, to joluwo twodo i nyingan, ma lamiyo woriem win woko to wirere, win kodi jotuci wac Were ma joluwo riwin.

¹⁶Kenyo t'aluwo kodi jocway ri Were i wi migam kodi ji me je, k'awaco ni: Rwoth waco ama: Wikiri wiwinji wac pa jotuci wac Were mewin ma joluwo riwin, jowaco ni, “Atewe ma Ot pa Rwoth, icegin dwoko wok Babilon.” Kole jotuco riwin twodo.

¹⁷Wikiri wiwinji jo; tiyi win ri kere ma Babilon aka wilakwo. Raŋo tindi madwoŋ me wolokere gunda?

¹⁸Adieri ka jobedo jotuci wac Were, aka ka wac pa Rwoth nitie gi jo, kenyo weyi jowopidi gi Rwoth pa lwak jolweny, ni atewe m'owey i Ot pa Rwoth, i ot pa kere ma Yuda, kodi i Yerusalem wokiri woter i Babilon.

¹⁹Kole Rwoth pa lwak jolweny waco ama kwoŋ sirin, nam, madalin, kodi atewe man m'odoŋ i tindi madwoŋ me,

²⁰ma Kere Nebukadineza ma Babilon k'okadho gine munyo otero i twec wok Yerusalem kidho Babilon, Kere Yekonia wod pa Yehoyakim ma Yuda, kodi jotel je ma Yuda gi Yerusalem.

²¹Rwoth pa lwak jolweny, Were pa Isiraili, waco ama kwoŋ atewe m'owey i Ot pa Rwoth, i ot pa kere ma Yuda, kodi i Yerusalem:

²²Ilatero Jobabilon, aka jolabedo kenyo cuka tundo ndelo m'anociki ithan rijo, Rwoth waco. Kenyo alakelo jo t'adwoko jo i kabedo me.