Read dhopadhola Yeremia 31 Bible Online

Yeremia 31 - dhopadhola bible

Yeremia 31

¹I hongo no, Rwoth waco, alabedo Were pa pecin je i Isiraili, aka jolabedo ji paran.

²Me apaka Rwoth waco, Ji ma joboth abor, jonwaŋo wor i thim, munyo Isiraili orango ywomirok.

³Rwoth onenere ran wok bor. Atieko marin gi mar ma cil gi cil, riameno amedo timo rin adieri.

⁴Alageto in kendo, aka ilageto in, Awi Isiraili! Ilakwanyo seke perin kendo, aka ilamielo miel pa josiemirok.

⁵Ilapidho ndelo vini kendo, wi got Samaria, jopidho jolapidho, aka jolacamo olemo mere.

⁶Kole ee, hongo bino ma jokur jolalwoŋo, i piny matendere Efrayim. Ay win, weyi wakadhi malo i Zayon, bongi Rwoth, Were mawan.

⁷Kole Rwoth waco ama, wer malo gi kisangala ri Yakobo, aka koki gi kisangala ri Rwoth pa nonin, tuci, miy pako, aka wac ni, “Awi Rwoth, both ji perin, ma joboth i Isiraili.”

⁸Neni, akidho kelo jo wok i lowo ma yumalo, t'acoko jo wok iy'adec mabor ma piny. Jo waŋtho kodi jor'aŋolo jolabino gi jo, mon ma minyur kodi ma ŋedi ramo jo, kanyacel, lwak madwoŋ ladwoko ka.

⁹Joladwoko kareno joywak, aka alatelo jo dwoko k'adiyo cuny jo. Alamiyo jo woth i thengi waŋ pi, i royo m'otire ma jokinyal cer, kwoŋbedo atieko bedo ba Isiraili, Efrayim obedo okayo paran.

¹⁰Winji win wac pa Rwoth, awi nonin, aka tuci win bor i kigodin. Waci win ni, “Ŋat'okedho Isiraili lacoko go, aka lakuro go paka jakwath rombo kuro mwendi.”

¹¹Kole Rwoth otieko botho Yakobo, obotho go wok i cingi ŋatatek loyo go.

¹²Jolabino to jowero wi got Zayon, aka jolakisangala ri gigipiny maber pa Rwoth, ri ŋano kodi vini kodi mo, kodi mwendi kodi dhok. Kwo pajo labedo paka ndelo m'ikonjo iye pi, aka jokilanyapere kendo.

¹³Mon mathindho jolafore i miel, aka yac kodi jodongo jolasiemere. Alaloko ywak pajo kisangala, alayomo cuny jo, t'amiyo jo kisangala i kabedo pa rem.

¹⁴Alamiyo jocway ri Were i wi migam gima jomito, aka ji paran jolayeŋo gi kweth gigipiny paran mabeyo. Rwoth waco.

¹⁵Me apaka Rwoth waco, dwondi winjere i Rama, ywak kodi geregere makec. Laker ywako nyithindho pere, go okwero wokwey cunye ri nyithindho pere, kwoŋbedo jongoye.

¹⁶Me apaka Rwoth waco, Miy dwondin kwoŋ ywak, aka weyi cwero pigi waŋin, kole initie gi kemba ri tic perin. Rwoth waco.

¹⁷Initie gi geno ma yuwaŋe, Rwoth waco. Nyithindho perin joladwoko i piny perin won.

¹⁸Adieri awinjo Efrayim ywakere ama: Ifonjan, aka awinjo fonji, oyido acalo nyathi dhiaŋ ma k'ofonji. Dwokan, aka weyi adwoki, kole in ibedo Rwoth Were paran.

¹⁹Kole munyo atieko wire woko kwoŋin, apusere. Rumacen abino aniaŋ, apayo eman, abedo giwickwot aka adhier, kwoŋbedo oyido anitie giwickwot mareco paran ma soye paran.

²⁰Efrayim obedo wodan ma kacunyan? Go obedo nyathi ma fore gine? Paka aluwo kwoŋ go noknok, fodi apoyo go. Riameno cunyan rembo rigo, alanyutho go ŋono adieri. Rwoth waco.

²¹Pidhi win kipande ma nyutho royo, cer win ranyuth, kethi win cuny win i royo, ma cango wiluwo. Dwoki, Awi Isiraili, dwoki i tindin perin madongo me.

²²Ilawiro paro kiri keraŋo, Awi ji paran ma jongoye g'adieri? Kole Rwoth otieko cweyo gimanyen i piny, go lagwoko go paka dhako gwoko jacwo.

²³Me apaka Rwoth waco pa lwak jolweny, Were pa Isiraili waco ama: Ibino oro kendo wac me i piny Yuda kodi i tindin mere ka adwoko lim pajo. Rwoth womiyin silwany, Awi Kabedo Maleŋ got maleŋ kama go bed'iye.

²⁴Ji jolabedo i Yuda kodi tindin mere kendo; jofur jolabedo kanyacel gi jokwath kodi mwendi pajo.

²⁵Alayeŋo jom'oloc, t'apidho joma kec neko.

²⁶Gikenyo acew t'aŋiyo, aka nindo paran ober ran swa.

²⁷Ndelo bino adieri, Rwoth waco, m'abino cwoyo ot pa Isiraili kodi ot pa Yuda gi kodhi ma ji kodi kodhi ogwaŋe.

²⁸Paka abedo g'atoŋa fudho jo kodi turo jo piny, bolo woko gi reyo kodi kelo raco, ameno apaka alakikwonga jo geto kodi pidho jo, Rwoth waco.

²⁹I hongo no ji jokilawaco kendo ni, “Jonywol pajo jotieko camo olemo mawac, aka lak nyithindho pajo olokere mafol.”

³⁰To kisi dhano won latho ri reco pere, kisi ŋat'ocam olemo mawac lake lalokere mafol.

³¹Ndelo bino, Rwoth waco, m'abino timo cikirok manyen gi ot pa Isiraili kodi ot pa Yuda.

³²Kilabedo paka cikirok ma cango atimo gi kwarere pajo munyo amako cingi jo t'awodho jo wok i piny Misir. Cikirok ma joturo, makada nende oyido abedo cwor jo, Rwoth waco.

³³To me a cikirok m'abino timo gi ot pa Isiraili rumacen ma ndelo no, Rwoth waco. Alandiko cik paran i jo, aka alandiko i cuny jo. Were pajo aka jolabedo ji paran.

³⁴Kendo jokilafonjere kosa waco wegi gi wegi ni, “Ŋey Rwoth.” Kole jolaŋeyan, wok i mathin tundo kwoŋ madwoŋ, Rwoth waco. Alacwako reco pajo, aka akilapoyo kendo.

³⁵Me apaka Rwoth waco: Go ma miyo ceŋ liel odieceŋ, kodi dwe gi micalin liel wor. Go ico nam to miyo mor, Rwoth pa lwak jolweny obedo nyingi go.

³⁶Kabedi can me oyido tundi i gike, ruwaŋan, Rwoth waco, dinyo Isiraili bende otundo i gike, ma bedo nono ruwaŋan cil gi cil.

³⁷Rwoth waco ama, K'inen inyalo kipima polo malo, aka inyalo nwaŋo misingi ma piny, meno alakwero ji ma Isiraili je, kwoŋbedo gima jotieko timo je. Rwoth waco.

³⁸Ndelo bino adieri, Rwoth waco, m'ilageto kendo tindi madwoŋ ri Rwoth wok iy'acurcur ma Hananel tundo i Waŋkac ma Sonda.

³⁹Bol ma kew lamedere wok kenyo yupodho ceŋ tundo i tendere ma Gareb to thoko kiri i Gowa.

⁴⁰Milelo gibe, kam'iyik'iye jom'otho aka ikonj'iye buru, ndelin je tundo kiri i milelo ma Kidron, kiri i sonda ma Waŋkac ma Kayina yuthenge ma yuwok ceŋ labedo maleŋ ri Rwoth. Kilafudho kendo kosa turo piny tindi madwoŋ cil gi cil.