Read dhopadhola Yeremia 32 Bible Online

Yeremia 32 - dhopadhola bible

Yeremia 32

¹Me wac m'obino ri Yeremia wok bongi Rwoth i oro mar'apar ma dhum pa Zedekia kere ma Yuda, m'oyido obedo oro mar'apar g'aboro ma dhum pa Nebukadineza.

²I hongo no jolweny pa kere ma Babilon oyido jothoko ma mako Yerusalem, aka oyido ocegi Yeremia i diedipo ma cel pa kere pa kere ma Yuda.

³Kere Zedekia am'oyido ocego go kenyo. Ato Zedekia oyido penjo ni, “Raŋo ituco wac Were k'iwaco ni, Rwoth waco ama: Akidho miyo tindi madwoŋ me i cingi kere ma Babilon, aka go latero.

⁴Kere Zedekia kilakwale wok i cingi Jobabilon, to adieri alamiyo go i cingi kere ma Babilon; aka laluwo gi go awaŋ g'awaŋ to neno go gi waŋe.

⁵Kere ma Babilon latero Zedekia i Babilon, aka go ladoŋ koro cuka atiyo gi go. Makada nende inolweny gi Jobabilon, ikilaloyo?” Rwoth waco.

⁶Yeremia owaco ni, wac pa Rwoth obino ran:

⁷Hanamel wod pa nerin Salum labino bongin ka waco ni, “Nyew ndelo paran manitie i Anathoth, kole in iŋat'iripo nyewo.”

⁸Kenyo Hanamel wod pa nera obino bongan i diedipo ma cel pa kere, cungo kwoŋ wac pa Rwoth to waco ran ni, “Nyew ndelo paran manitie i Anathoth i lowo pa Benyamin, kole in iŋat'iripo nyewo, nyew paka aperin.” Kenyo aŋeyo nike me obedo wac pa Rwoth.

⁹Anyewo ndelo i Anathoth wok bongi Hanamel wod pa nera, aka apima rigo pesa ma romo muma feza apar g'ario.

¹⁰Aketho cingan i cikirok t'amwono, anwaŋo jokony, t'apima pesa i latir.

¹¹Akwanyo cikirok ma nyewirok m'omwon, manitie iye yerok, kodi man ma k'omwon.

¹²Amiyo cikirok ma nyewirok ri Baruk wod pa Neria nyakwar Maseya, ruwaŋ Hanamel wod pa Neria, kodi ruwaŋ jokony ma joketho cingi jo i cikirok, kodi ruwaŋ Joyuda m'oyido jobedo i diedipo ma cel pa kere.

¹³Awodho or ri Baruk ruwaŋ joje k'awaco ama:

¹⁴Rwoth pa lwak jolweny, Were pa Isiraili waco ama: Ter cikirok me, m'omwon kodi ma k'omwon je, ikethi jo iy'agwata ma lowo, ŋey jowobedi ma hongo malac.

¹⁵Kole me apaka Rwoth pa lwak jolweny, Were pa Isiraili waco ama: Kendo ibino nyewo udi kodi ndelin kodi ndelin vini i lowo me.

¹⁶Rumacen munyo atieko miyo Baruk wod pa Neria cikirok, akwayo Rwoth k'awaco ni,

¹⁷Awi Rwoth Were, Obedi in iŋat'icweyo polo kodi piny gi meni perin madwoŋ kodi cingin m'oyare! Ongoye gimatek rin swa.

¹⁸Inyutho luse ganin mar perin makiwire, t'imiyo gir'acula ri nyithindho ro reco pa jonywol pajo. Awi Were Madwoŋ, aka Jameni, nyingin obedo Rwoth pa lwak jolweny.

¹⁹Rieko perin dwoŋ aka tim perin dimeni. Waŋin neno yo pa ji je, aka iculo joje cungo kwoŋ yo pajo kodi tim pajo.

²⁰Inyutho ranyuth kodi gir'aura i piny Misir, aka tundo kiri gunyo ni i Isiraili i dier ji je, aka itieko timo nyingin ma medere tundo kiri gunyo ni.

²¹Iwodho ji perin Isiraili wok i piny Misir gi ranyuth kodi gir'aura, gi cingin matek kodi cingin m'oyare kodi lworo kweth,

²²aka imiyo jo lowo me, ma ikwoŋere ri kwarere pajo miyo jo. Lowo ma mol gi cak kodi mo kic.

²³Jodonjo iye aka jolunjo, to jok'owinjo dwondin luwo cik perin, kwoŋ gim'iwodho or rijo timo je, ongoye ma jotimo. Riameno imiyo teko me je podho kwoŋ jo.

²⁴“Neni, Jobabilon jogeto cel kwoŋ tindi madwoŋ ma mako, tindi madwoŋ ocomere g'abor kodi kec kodi two nundu. Itieko miyo i cingi Jobabilon ma jolwenyo gine. Gima cango iluwo otieko timere, aka in won inyalo neno.

²⁵Kucel in, Awi Rwoth Were, itieko waco ran ni, ‘Nyew ndelo gi pesa aka kethi jokony.’ Makada nende itieko miyo tindi madwoŋ i cingi Jobabilon.”

²⁶Wac pa Rwoth obino ri Yeremia ni:

²⁷Neni, An Abedo Rwoth, Were pa ji je, nitie gimatek swa ran?

²⁸Riameno, Rwoth waco ama: Akidho miyo tindi madwoŋ me i cingi Jobabilon, aka go latero.

²⁹Jobabilon ma jolwenyo gi tindi madwoŋ me jolabino, aka jolacwinyo iye mac, to jowaŋo, kanyacel gi udi ma imiy'iye mic ri Bal aka ikonj'iye cowirok ri werin man, ma kwinyo nge paran.

³⁰Kole ongoye gima ji ma Yuda kodi ji ma Isiraili jotieko timo kwanyowoko reco kende ruwaŋan wok i soye pajo. Ongoye gima jotimo, kwanyowoko kwinyo nge paran gi tic ma cingi jo, Rwoth waco.

³¹Tindi madwoŋ otieko ico nge paran kodi keme paran, wok i ndelo m'ogeti iye tundo gunyo ni; ŋey akwany woko waŋan kwoŋe.

³²Me kwoŋbedo reco je pa ji ma Isiraili kodi ji ma Yuda ma jokwinyo nge paran. Jo kodi kerin pajo kodi jodhum pajo kodi jocway ri Were i wi migam pajo kodi jotuci wac Were pajo, ji ma jobedo i Yuda kodi joma jobedo i Yerusalem.

³³Jotieko wiro ran dieŋey jo, makiweno waŋ jo; makada nende atieko fonjo jo g'amen, jok'onyalo winjo kosa yeyo atir jo.

³⁴Joketho amien pajo i ot m'ilwoŋo gi nyingan, aka jokoco woko.

³⁵Jogeto migame ri Bal i milelo pa wod pa Hinom, ma miyo wot jo kodi nyithindho manyir pajo ri Molek, makada nende akiwodho rijo or timo, kosa k'obedo i paro paran nike joripo timo amien me, miyo Yuda timo reco.

³⁶Onyo riameno, me apaka Rwoth, Were pa Isiraili waco, kwoŋ tindi madwoŋ me ma wiluwo kwoŋe ni, “Imiyo i cingi kere ma Babilon g'abor kodi kec kodi two nundu.”

³⁷Neni, alacoko jo wok i lowo je m'abino kedh'iye jo i nge paran kodi keme paran kodi gero madwoŋ. Aladwoko jo i kabedo me, aka alamiyo jo bedo ka i siem.

³⁸Alabedo Were pajo, aka jolabedo ji paran.

³⁹Alamiyo jo bedo gi cuny acel kodi yo acel, ŋey jowolworan i hongo je, ri bero pajo wegi kodi bero pa nyithindho pajo ma joluw jo

⁴⁰Alatimo gi jo cikirok ma cil gi cil, ma akilaweyo timo rijo bero kendo. Alaketho lworo Were i cuny jo, ŋey jokiri jowowire kwoŋan kendo.

⁴¹Alafore i timo bero rijo, aka alapidho jo i lowo me iy'adieri, gi cunyan je kodi adundo paran je.

⁴²Kole Rwoth waco ama: Paka atieko kelo teko madwoŋ me kwoŋ ji me, ameno alakelo kwoŋ jo bero ma pama aciko jo.

⁴³Ilanyewo ndelin i lowo me, m'iwaco ni ojwangere, m'ongoye ji kosa ogwaŋe, m'otiek ketho i cingi Jobabilon.

⁴⁴Ilanyewo ndelin gi pesa, t'iketho cingi jo i cikirok t'imwono aka jokony jolabedo, i lowo pa Benyamin, i kabedo m'othoko Yerusalem, kodi i tindin ma Yuda, i tindin ma piny matendere, i Sefela kodi yupiny ma Yuda. Aladwoko rijo silwany, Rwoth waco.