Read dhopadhola Yeremia 33 Bible Online

Yeremia 33 - dhopadhola bible

Yeremia 33

¹Wac pa Rwoth obino ri Yeremia madirio, kareno fodi ocegi go i diedipo ma cel pa kere.

²Me apaka Rwoth m'ocweyo piny waco. Rwoth m'otimo piny to ketho i kare, Rwoth obedo nyingi go.

³Lwoŋan aka aladwokin, alawaco rin gigipiny madongo m'opanere ma fodi ikiŋeyo.

⁴Kole me apaka Rwoth, Were pa Isiraili waco, kwoŋ udi ma tindi madwoŋ me kodi udi pa kerin ma Yuda m'otur woko t'igeto kwoŋe cel ma thoko mako kodi monjo g'abor.

⁵Jobabilon jobino lweny kodi poŋo udi gi delkwoŋ jom'otho pa jono m'abino neko i nge paran kodi i keme paran. Kole atieko pano waŋan kwoŋ tindi madwoŋ me kwoŋbedo kidakana pajo je.

⁶To aladwoko jo t'acango jo. Alacango two ma tindi madwoŋ me, alanyutho jo siem, t'akweyo piny rijo.

⁷Aladwoko lim ma Yuda kodi lim ma Isiraili, t'ageto jo kendo paka cango con.

⁸Alacido woko reco pajo je aka alacwako reco pajo gi gwenyirok pajo je kwoŋan.

⁹Tindi madwoŋ me labedo ran nyingi kisangala, pak kodi dwoŋ ruwaŋ nonin je ma i piny, ma jowinji kwoŋ bero je m'atimo rijo. Jolabedo gi lworo to jokirin kwoŋbedo bero je kodi lim m'abino miyo tindi madwoŋ me.

¹⁰Me apaka Rwoth waco: I kabedo me ma wiluwo kwoŋe ni, “Othangere m'ongoye ji kodi ogwaŋe.” I tindin ma Yuda kodi i royin ma Yerusalem m'odoŋ nono, m'ongoye ji ma jobed'iye, ji kosa ogwaŋe, kendo bino winjere,

¹¹dwondi jo ma kisangala kodi forok. Lawinjere dwondi jamweha kodi mweha kodi dwondi ji ma jowero, ka jokelo foyo i Ot pa Rwoth ka jowaco ni, “Miy win Rwoth pa lwak jolweny foyo, kole Rwoth ber, aka mar pere makiwire bedo cil gi cil!” Kole aladwoko lim ma lowo paka marapena, Rwoth waco.

¹²Rwoth pa lwak jolweny waco ama: I kabedo me m'othangere, m'ongoye ji kodi ogwaŋe, kodi i tindin je labedo kendo kakwath ri jokwath rombo ma kwayo mwendi pajo.

¹³I tindin ma piny matendere, ma Sefela kodi i yupiny, i lowo pa Benyamin, i kabedo je thoko Yerusalem kodi i tindin ma Yuda, jokwath rombo kendo jolakwano mwendi pajo, Rwoth waco.

¹⁴Ndelo bino adieri, Rwoth waco, m'abino ketho i kare cikirok m'atimo ri ot pa Isiraili kodi ot pa Yuda.

¹⁵I ndir no kodi i hongo no, alayero kere m'otire ma nyakwar Daudi. Kere no latimo gir'adieri kodi gim'otire i piny.

¹⁶I ndir no, ilabotho Yuda aka siem labedo i Yerusalem. Me a nyinge m'ilalwoŋo gine, “Rwoth, obedo tiro mawan.”

¹⁷Kole Rwoth waco ama: Daudi kilangoye gi ŋata lalunjo kom pere ma dhum i ot pa Isiraili.

¹⁸Jocway ri Were i wi migam ma jobedo Jolevi jokilangoye ruwaŋan gi jacwo ma miyo mic awaŋa, mic ma cemo, kodi timo cowirok ma hongo je.

¹⁹Wac pa Rwoth obino ri Yeremia:

²⁰Me apaka Rwoth waco: Ka moro kwoŋ win oyido nyalo turo cikirok paran gi odieceŋ kodi cikirok paran gi wor, ŋey jokiri jowobin i hongo pajo,

²¹meno nyaka cikirok paran m'atimo gi ŋeca paran Daudi nyalo tur, ŋey go wongoye gi wode manyalo lunjo kom pere ma dhum, kodi cikirok m'atimo gi Jolevi ŋecin paran.

²²Paka kinyal kwano micalin manitie i polo aka kinyal kipima kwoyo ma nam, ameno apaka alamedo nyikway ŋeca paran Daudi, kodi Jolevi ŋecin paran.

²³Wac pa Rwoth obino ri Yeremia:

²⁴Poyi fodi ikikaŋasa maber kite ma ji me jowaco ni, “Pecin ario ma Rwoth oyido oyero go otieko kwero woko.” Kite m'iter'iye ji paran gi cay ma kiter jo paka nono?

²⁵Rwoth waco ama: Kabedi oyido akitimo cikirok paran gi odieceŋ kodi wor kodi cik ma dhumo piny kodi polo,

²⁶dinyo akwero nyikway Yakobo kodi ŋeca paran Daudi m'akiyeyo moro kwoŋ nyikwaye paka jadhum kwoŋ nyikway Abraham, Isaka kodi Yakobo. Kole aladwoko lim pajo, aka alamako wor gi jo.