Read dhopadhola Yeremia 34 Bible Online

Yeremia 34 - dhopadhola bible

Yeremia 34

¹Wac pa Rwoth obino ri Yeremia, i hongo ma Kere Nebukadineza ma Babilon kanyacel gi jolweny pere je kodi kerin ma piny je kodi nonin je m'oyido go dhumo oyido jolwenyo gi Yerusalem kodi tindin mere je.

²Rwoth waco ama, Were pa Isiraili: Kidhi iluwi gi Kere Zedekia ma Yuda aka iwaci rigo ni, Rwoth waco ama: Akidho ketho tindi madwoŋ me i cingi kere ma Babilon, aka go lawaŋo gi mac.

³In won ikilakwale wok i cinge, t'ilamakin adieri t'ikethin i cingi go. Ilaneno kere ma Babilon gi waŋin, aka ilaluwo gi go awaŋ g'awaŋ, aka ilakidho i Babilon.

⁴Kucel winji wac pa Rwoth, Awi Zedekia kere ma Yuda! Rwoth waco ama kwoŋin: Ikilatho g'abor.

⁵Ilatho i siem, aka paka owaŋ ri kwarere perin buban, kerin ma jotelo dhum rin, apaka bende ilawaŋo rin t'iywakin k'iwaco ni, “Awi kere mawan!” Kole An atieko luwo, Rwoth waco.

⁶Kenyo Yeremia jatuci wac Were oluwo wac no je ri Zedekia kere ma Yuda i Yerusalem,

⁷munyo jolweny pa kere ma Babilon oyido jolwenyo gi Yerusalem kodi tindin madongo je ma Yuda m'oyido jodoŋ, Lakis kodi Azeka. Me kende a tindin madongo m'otinda m'oyido jodoŋ i Yuda.

⁸Wac pa Rwoth obino ri Yeremia, rumacen munyo kere Zedekia otieko timo cikirok gi ji ma Yerusalem, tuco gonyo

⁹ŋecin ma Joyuda ma cwo kodi ma mon, ŋey wongoye ŋata womaki Jaisiraili nyawote paka ŋeca.

¹⁰Joje jowinjo, jodhum je kodi ji je m'oyido jotimo cikirok nike jowogony ŋecin pajo, cwo kodi mon, ŋey wongoye ŋata kendo laketho jo i twec, jogonyo jo.

¹¹To rumacen jowire aka jotero ŋecin ma cwo kodi ma mon m'oyido jotieko gonyo to doko jodwoko jo i twec.

¹²Wac pa Rwoth obino ri Yeremia:

¹³Rwoth, Were pa Isiraili waco ama: An won atimo cikirok gi kwarere mewin munyo awodho jo wok i piny Misir, wok i piny ma twec, k'awaco ni,

¹⁴ “Kisi oro mar'abirio wiripo gonyo Jaebulaniya moro je m'otana riwin kareno jotieko tic ma oro aucel. Wiripo ywomo jo tic.” To kwarere pajo jok'owinjo kosa jok'ociko ithi gin ran.

¹⁵Win bende manyen me, wipusere to witimo gim'otire ruwaŋan gi tuco gonyo wadi win, aka witimo cikirok i ot m'ilwoŋo gi nyingan.

¹⁶To wiwire kendo to wikoco nyingan munyo kisi dhano odwoko ŋecin ma cwo kodi ma mon m'oyido witieko gonyo cungo kwoŋ mito pajo, aka kendo wiloko jo ŋecin mewin.

¹⁷Riameno Rwoth waco ama: Wikiwinjan nyalo gonyo joger kodi merin mewin. Akidho gonyo win, Rwoth waco, ri abor, two nundu kodi kec. Alamiyo win bedo gi bwok ri kerin je ma i piny.

¹⁸Jono ma joturo cikirok paran ma jok'okuro yerok ma cikirok ma jotimo ruwaŋan. Alaloko jome paka nyathi dhiaŋ m'otoŋ i diere dirio t'iluwo i diere.

¹⁹Jotel ma Yuda, jotel ma Yerusalem, cwo ma jolur, jocway ri Were i wi migam kodi ji je ma piny ma joluwo i dier nyathi dhiaŋ m'oyaŋ diere dirio,

²⁰alaketho jo i cingi jokwor pajo kodi jono ma jodwaro kwo pajo. Delkwoŋ jolalokere cemo ri winyin ma koyo kodi ogwaŋe madudi ma piny.

²¹Paka ri Zedekia kere ma Yuda kodi jotel pere, alaketho i cingi jokwor pajo kodi jono ma jodwaro kwo pajo, ri jolweny pa kere ma Babilon, ma joweyo monjo win.

²²Alawodho or, Rwoth waco, aka aladwoko jo i tindi madwoŋ me, jolalweny gine, jolamako to jowaŋo gi mac. Alaloko tindin ma Yuda m'ojwangere m'ongoye dhano ma bed'iye.