Read dhopadhola Yeremia 35 Bible Online

Yeremia 35 - dhopadhola bible

Yeremia 35

¹Wac pa Rwoth obino ri Yeremia i hongo ma dhum pa kere Yehoyakim wod pa Yosia ma Yuda ka waco ama:

²Kidhi i ot pa nyikway Rekab, aka iluwi gi jo, ikeli jo i Ot pa Rwoth, iy'acel kwoŋ kisikin, kenyo miy jo medho.

³Ameno akwanyo Yasania wod pa Yeremia nyakwar Habazina kodi wutmin go kodi wote je kodi ot pa Rekab gibe.

⁴Akelo jo i Ot pa Rwoth i kisika pa wod pa Hanan nyakwar Igidalia, jacwo pa Were, m'oyido nitie cegin gi kisika pa jodhum, i wi kisika pa Maseya wod pa Salum, jakur ma dhiot.

⁵Kenyo ajengo ruwaŋ nyikway Rekab kikopere kodi agwatin m'opoŋ vini t'awaco rijo ni, “Medhi win.”

⁶To jodwokan ni, “Wan wakimedhi. Kole kwari wan Yonadab wod pa Rekab cango owodho or riwan ni, ‘Wikiripi madho vini, win kosa nyithindho mewin cil gi cil,

⁷kosa wikiri wigeti udi kosa wicwoy kodhi kosa wipidhi ndelo vini kosa wibedi gine, to wiripo bedo i wemin i kwo mewin je, ŋey winyal kwo ma hongo malac i lowo ma wibed'iye.’

⁸Watieko kuro or pa kwari wan Yonadab wod pa Rekab i gima go owodho or riwan timo, bedo ma wakimedhi kwo mawan je, wan wegi, mon mawan, wot wan kodi nyithindho mawan manyir.

⁹Aka wakigeti ot ma bed'iye. Wangoye gi ndelo vini kosa ndelo kosa kodhi.

¹⁰To wabedo i wemin, aka watieko winjo kodi timo kisi gima kwari wan Yonadab owodho riwan or ni tim.

¹¹To munyo kere Nebukadineza ma Babilon obino lweny kwoŋ piny, wawaco ni, ‘Biye win, weyi wakadhi win i Yerusalem ro lworo ri jolweny ma Babilon kodi jolweny ma Siria.’ Meno am'omiyo wabedo i Yerusalem.”

¹²Kenyo wac pa Rwoth obino ri Yeremia:

¹³Rwoth waco ama, Were pa Isiraili: Kidhi iwaci ri ji ma Yuda kodi ji ma jobedo i Yerusalem ni, “Wikinyal fonjirok kodi winjo wac paran?” Rwoth waco.

¹⁴Yonadab owodho or ri nyikway Rekab nike jokiri jowomadhi vini, aka jokimedhi kiri konon me, kwoŋbedo jowinjo or pa kwari jo. To an won atieko luwo gi win mar'amen aka wikiwinjan.

¹⁵Atieko oro riwin ŋecin paran jotuci wac Were mar'amen k'awaco ni, “Wire win kisi dhano kwoŋ yo pere marac, yik win tim mewin, aka wikiri wikwoŋ werin man ka witiyo rijo, ŋey wibedi i piny m'amiyo win kodi kwarere mewin.” To wikiciko ithi win winjan.

¹⁶Nyikway Yonadab wod pa Rekab jotieko kuro or ma kwari jo owodho rijo, to nono me fodi k'owinjan.

¹⁷Riameno, me apaka Rwoth pa lwak jolweny, Were pa Isiraili waco ama: Alakelo ri Yuda kodi ji ma jobedo i Yerusalem je kisi teko m'alwoŋo kwoŋ jo, kwoŋbedo atieko luwo gi jo to jok'owinjan. Atieko lwoŋo jo, to jokiye ran.

¹⁸To ri ot pa Rekab Yeremia owaco ama: Rwoth pa lwak jolweny, Were pa Isiraili waco ma: Kwoŋbedo witieko winjo or pa kwari win Yonadab, aka wikuro cik pere, to witimo or ma go owodho riwin je,

¹⁹riameno me apaka Rwoth pa lwak jolweny, Were pa Isiraili waco ama: Yonadab wod pa Rekab kilangoye gi nyakware majayac ma latic ran noknok.