Read dhopadhola Yeremia 37 Bible Online

Yeremia 37 - dhopadhola bible

Yeremia 37

¹Zedekia wod pa Yosia, ma kere Nebukadineza ma Babilon oketho bedo kere i piny ma Yuda, olunjo Konia wod pa Yehoyakim.

²To go kosa ŋecin pere kosa ji ma Yuda jokwero winjo wac pa Rwoth ma go oluwo luwo kwoŋ Yeremia jatuci wac Were.

³Kere Zedekia ooro Yehukal wod pa Selemia kodi Zefania jacway ri Were i wi migam wod pa Maseya bongi Yeremia ka waco ni, “Mondo kway riwan Rwoth Were mawan.”

⁴Onyo Yeremia oyido fodi wotho i dier ji, kole oyido fodi k'otwey go i katwec.

⁵Kareno jolweny pa Farawo oyido jowok i Misir, aka tekin Jobabilon m'oyido jothoko Yerusalem ma mako jowinjo wac kwoŋ Jomisir, jowire woko ngoye i Yerusalem.

⁶Kenyo wac pa Rwoth obino ri jatuci wac Were Yeremia ni:

⁷Me apaka Rwoth Were pa Isiraili waco ama: Me a wac ma wijario wilawaco ri kere ma Yuda, m'odhiro win penjan. Jolweny pa Farawo, ma jobino konyo win joladok i piny pajo, i Misir.

⁸Jobabilon joladwoko lweny kwoŋ tindi madwoŋ me, jolamako to jowaŋo gi mac.

⁹Me apaka Rwoth waco: Wikiri wiwondere ka wiwaco ni, “Jobabilon jokiladwoko bongi wan adieri.” Kole jokilakadho woko.

¹⁰Makada nende oyido wikengila jolweny gibe ma Babilon ma jolwenyo gi win, to doŋ nyaka cwo ma jolimo litho i wema pajo, jonyalo ay malo kendo to jowaŋo tindi madwoŋ me gi mac.

¹¹Onyo munyo Jobabilon oyido jowire to jongoye i Yerusalem munyo jolweny pa Farawo jobino,

¹²Yeremia owok i Yerusalem kadho i piny pa Benyamin jolo adec ma lim pere wok bongi ji ma kenyo.

¹³Munyo go otundo i Waŋkac pa Benyamin, jatel pa jolweny m'oyido jokuro kenyo, jacwo m'ilwoŋo ni Iriya wod pa Selemia wod pa Hanania omako Yeremia ka waco ni, “Iringo kwoŋ Jobabilon.”

¹⁴Yeremia odwoko ni, “Meno twodo. An akiringi kwoŋ Jobabilon.” To Iriya k'onyalo winjo go, omako go to kelo go bongi jodhum.

¹⁵Jodhum jomako nge swa gi Yeremia, aka jogoyo go to jotweyo go i katwec i ot pa jandiko Yonathan, kwoŋbedo oyido nitie gi katwec.

¹⁶Ameno okethi Yeremia i waŋ pi i katwec ma piny, to doŋ kenyo ma ndelo kweth.

¹⁷Kenyo to Kere Zedekia ooro wokel go, aka ojolo go. Kere openjo go nyaliŋliŋ gi i ot pere, aka owaco ni, “Nitie wac moro wok bongi Rwoth?” Yeremia odwoko ni, “Ey, nitie! Ilakethin i cingi kere ma Babilon.”

¹⁸Yeremia bende openjo kere ni, “Raco aŋo m'atieko timo rin kosa jodhum perin kosa ji me, ma witweyan i katwec?

¹⁹Nikune jotuci wac Were perin ma jotuci wac Were ka jowaco ni, ‘Kere ma Babilon kilabino lweny kodin kodi piny me’?

²⁰Onyo, mondo winjan, Rwoth paran kere, tim maber winjo ywak paran, aka ikir'idwokan i ot pa jandiko Yonathan atho kenyo.”

²¹Kere Zedekia owodho or, aka ocegi Yeremia i diedipo ma cel pa kere, aka go odoŋ kenyo, kareno imiyo go mugat wok i katedo mugat kisi ndelo, cuka mugat je orumo i tindi madwoŋ.