Read dhopadhola Yeremia 41 Bible Online

Yeremia 41 - dhopadhola bible

Yeremia 41

¹I dwe mar'abirio, Isimayil wod pa Nethania wod pa Mikaya, anywola ma peco pa kere, acel kwoŋ jotel pa jolweny pa kere, obino gi cwo apar bongi Gedalia wod pa Ahikam i Mizipa. Munyo oyido jocamo mugat kanyacel kenyo i Mizipa,

²Isimayil wod pa Nethania kodi cwo apar m'oyido jonitie gi go joay malo to joneko Gedalia wod pa Ahikam wod pa Safan g'abor, kwoŋbedo kere ma Babilon oyido oketho go bedo gavana ma piny.

³Isimayil bende oneko Joyuda je m'oyido jonitie gi Gedalia i Mizipa, kodi jolweny ma Babilon m'oyido jonitie kenyo.

⁴I ndelo ma yawo ndelo m'oneki iye Gedalia, mafodi ongoye ŋat'oŋeyo kwoŋe,

⁵cwo piero aboro jotundo wok i Sekem kodi Silo kodi Samaria, gi ye tik jo m'oliel kodi nangin pajo m'oyec, gi delkwoŋ jo m'ogwer, bino kelo mic pajo ma cemo kodi buban i Ot pa Rwoth.

⁶Isimayil wod pa Nethania owok i Mizipa romo gi jo, kareno ywak ka bino. Munyo oromo gi jo, owaco rijo ni, “Biye win bongi Gedalia wod pa Ahikam.”

⁷Munyo jotundo i dier tindi madwoŋ, Isimayil wod pa Nethania kodi cwo m'oyido jonitie gi go jothumo jo to jobolo jo i waŋ pi.

⁸To oyido nitie cwo apar kwoŋ jo ma jowaco ni, “ikir'ineki wan, kole wanitie gi dero ŋano, bale, mo kodi mo kic m'opanere i ndelin.” Ameno go k'oneko jo kanyacel gi wadi jo.

⁹Onyo waŋ pi ma Isimayil obolo iye delkwoŋ cwo ma go oneko am'obedo madwoŋ loyo ma cango kere Asa ogeto ma kwoŋirok kwoŋ kere Basa ma Isiraili. Isimayil wod pa Nethania opoŋo waŋ pi no gi ji ma go oneko.

¹⁰Kenyo Isimayil otero ji m'odoŋ m'oyido jonitie i Mizipa paka jotwec. Go otero nyir pa kere kodi ji je m'oyido jodoŋ i Mizipa, ma Nebuzaradan, jamituka pa jolweny oyido oketho i cingi Gedalia wod pa Ahikam. Isimayil wod pa Nethania otero jo paka jotwec aka oyikere ŋado kadho bongi Joamon.

¹¹To munyo Yohana wod pa Kareya kodi jotel jolweny je jowinjo kwoŋ neki ma Isimayil wod pa Nethania otimo,

¹²jotero cwo pajo je to jokidho lweny kwoŋ Isimayil wod pa Nethania. Joriko go i kidiwa madwoŋ manitie i Gibeon.

¹³Munyo ji je m'oyido jonitie bongi Isimayil joneno Yohana wod pa Kareya kodi jotel pa jolweny je, josangala.

¹⁴Ameno ji je m'oyido Isimayil otero paka jotwec wok i Mizipa jowire to jogik bongi Yohana wod pa Kareya.

¹⁵To Isimayil wod pa Nethania okwale woko kwoŋ Yohana kanyacel gi cwo aboro to jokadho bongi Joamon.

¹⁶Yohana wod pa Kareya kodi jotel pa jolweny je jotero ji je ma jodoŋ m'oyido Isimayil wod pa Nethania oyido okadho gi jo paka jotwec wok i Mizipa munyo go otieko neko Gedalia wod pa Ahikam. Jolweny, mon, nyithindho kodi cwo m'okol ma Yohana odwoko jo wok i Gibeon.

¹⁷Jowotho, aka jocungo i Geruth Kimham cegin gi Bethelehem, kareno jogendera kadho i Misir,

¹⁸kwoŋbedo oyido jolworo Jobabilon. Kole oyido jonitie gi bwok ri Jobabilon, kwoŋbedo Isimayil wod pa Nethania oyido oneko Gedalia wod pa Ahikam, ma kere ma Babilon oyido oketho paka gavana ma lowo.