Read dhopadhola Yeremia 43 Bible Online

Yeremia 43 - dhopadhola bible

Yeremia 43

¹Munyo Yeremia otieko luwo ri ji je wac me je ma Rwoth Were pajo ooro Yeremia waco rijo,

²Azaria wod pa Hosaya kodi Yohana wod pa Kareya kodi cwo je ma jocay jowaco ri Yeremia ni, “Iwaco twodo. Rwoth Were mawan k'oorin waco nike wakiri wakidhi i Misir bedo koro.

³Baruk wod pa Neria ama segeya wan bongin, ketho wan i cingi Jobabilon, ŋey jowoneki wan kosa jowoteri wan i twec.”

⁴Ameno Yohana wod pa Kareya kodi jotel pa jolweny je kodi ji je jok'owinjo dwondi Rwoth, ma doŋ i piny ma Yuda.

⁵To Yohana wod pa Kareya kodi jotel pa jolweny je jotero ji ma jodoŋ i Yuda je m'oyido jodwoko bedo i Yuda wok piny man je m'oyido joring'iye,

⁶cwo, mon, nyithindho kodi nyir pa kere, kodi kisi dhano ma Nebuzaradan jamituka pa jolweny oyido oweyo i cingi Gedalia wod pa Ahikam wod pa Safan kanyacel gi Yeremia kodi Baruk wod pa Neria.

⁷Jokidho i piny Misir, kwoŋbedo jok'owinjo dwondi Rwoth, aka jotundo i Tapanihes.

⁸Wac pa Rwoth obino ri Yeremia i Tapanihes ni:

⁹Kwany telin mapando moro i cingin, aka iyiki jo i fereji ma lowo manitie i waŋkac ma peco pa kere i Tapanihes ka Joyuda joneno.

¹⁰Iwaci rijo ni, “Rwoth pa lwak jolweny, Were pa Isiraili waco ama: Akidho oro ŋeca paran kere Nebukadineza ma Babilon, aka go laketho kom pere ma dhum i wi telin m'ayiko me, go layaro wema pere kwoŋ jo.

¹¹Go labino to kengila Misir, aka jomegi jolatho gi two nundu, joman joladoŋ i twec aka joman jolatho g'abor.

¹²Go lacwinyo mac i udi pa werin ma Misir, aka lawaŋo to tero jo paka jotwec. Go layweyo piny Misir paka jakwath rombo dimo onywogo i nanga pere, to weyo kenyo m'olimo teko.

¹³Go lanyeko woko sirin manyakafir i Bethsemes i piny Misir to waŋo woko udi pa werin ma Misir gi mac.”