Read dhopadhola Yeremia 49 Bible Online

Yeremia 49 - dhopadhola bible

Yeremia 49

¹Me apaka Rwoth waco ri Joamon: Joisiraili jongoye gi wot jo? Isiraili ongoye gi musika? Raŋo oyey ji ma jolamo were Molek mako adec pa Gad, aka jobedo i tindin mere.

²Riameno, hongo bino adieri, Rwoth waco, m'abino kudho gwara ma lweny, kwoŋ Raba tindi madwoŋ pa Joamon, lalokere gunda, aka ilawaŋo calin mere gi mac, kenyo Isiraili oriemo woko ji ma joriemo go, Rwoth waco.

³Ywak, awi Hesibon, kole Ay orere woko! Ywak win, awi ji ma Raba! Ruki win kutiya, ywak win, aka wicwadere g'adasa! Kole were mewin Molek lakadho i twec, kanyacel gi jocway ri were i wi migam pere kodi jotic pere.

⁴Raŋo winor i meni mewin? Meni mewin lacere, Awi ji ma Amon, oyido wigeno lim mewin, ka wiwaco ni, “Ŋa ma lamonjo wan?”

⁵Akidho kelo teko kwoŋ win, Rwoth pa lwak jolweny waco, wok bongi joger mewin je, aka ilakedho win, kisi dhano kapere, m'ongoye ŋata lacoko ji ma jokedhere.

⁶To rumacen, aladwoko lim pa Joamon. Rwoth waco.

⁷Me gima Rwoth pa lwak jolweny waco kwoŋ Edom. Rieko ongoye kendo i Teman? Jomic rieko josika woko? Rieko pajo orumo woko?

⁸Ringi win, wire wigik, nywongi win piny, win ji ma wibedo i Dedan! Kole alakelo teko pa Esau kwoŋe, i hongo m'abino miyo go gir'acula.

⁹Ka jofoni nyingi vini jobino bongin, jokiwey ye moro wi yath vini, ka jokwo jobino kwo wor, jokikwal ye nyaka gima jomito?

¹⁰To atieko lunyo Esau kinyoro, atieko yawo kapondo pere, aka go kinyal pondo. Ji pere je orey woko, wade pere, kanyacel gi joger pere, ongoye ŋat'odoŋ.

¹¹Weyi nyithindho kic perin, alakuro jo makwo, aka weyi mon tho perin jowogenan.

¹²Kole Rwoth waco ama: K'inen jono ma jokiripi madho kikopo ma candirok fodi joripo madho, onyo in ama k'omiyin gir'acula? In bende iripo madho kikopo no.

¹³Kole an won atieko kwoŋirok, Rwoth waco, nike Bozra lalokere gibwok aka gi minyom, gunda kodi gi kwoŋ, aka tindi pere je ladoŋ gundin kicutho.

¹⁴Atieko winjo mikwenda wok bongi Rwoth, aka oor jamikwenda i dier nonin. Cokere win kanyacel aka wimonji go, aka ay win ri lweny.

¹⁵Alalokin masisiri i dier nonin, aka ji jolacayin.

¹⁶Teko m'itugila, kodi delok ma cunyin otieko wondin, win ma wibedo wilwindi matendere, aka wibedo malo wi gote. Makada nende wigeto od win malo paka ango, aladwoko win piny wok kenyo. Rwoth waco.

¹⁷Edom lalokere gibwok, aka kisi ŋat'oluwi cegin gine labwok aka lalwiyo kwoŋbedo teko pere je.

¹⁸Paka orey woko Sodom kodi Gomora, Rwoth waco, apaka bende ongoye ŋata labedo i Edom kendo ongoye dhano ma labed'iye.

¹⁹Paka simbwor ma wok i lul m'oyukino i thengi Yordan kadho i kakwath, ameno apaka alariemo woko Joedom wok i kakwath pajo abwap. Kenyo alayero jatel rijo. Onyo ŋa ma cal Rwoth, aka ŋa manyalo comirok kodi go? Jakwath mene manyalo cungo ruwaŋe?

²⁰Riameno winji can ma Rwoth otieko timo kwoŋ Edom kodi atoŋa ma go ocwogo kwoŋ ji ma Teman. Adieri mwendi mathindho mere ilakadho gi jo, aka kisi dhano je ladhier kwoŋ rerok pajo.

²¹Piny lakirin ro derino ma rerok pajo, aka derino ma ywak pajo lawinjere i Nam M'obokere.

²²Neni, dhano laloro piny paka ango, aka go lapie piny to yaro bwombe kwoŋ Bozra. I ndelo no cuny jolweny ma Edom lapodho paka cuny dhako ma ŋedi ramo.

²³Me wac ma mako kwoŋ Damasiko. Ji ma Hamath kodi ji ma Aripad jorembo, kwoŋbedo jowinjo wac marac. Joleny i lworo, jouco paka nam, ma kinyal kwe.

²⁴Ji ma Damasiko jotieko lokere manyap, aka joringo, aka jopapin, jonitie i litho kodi i rembo, paka dhako ma ŋedi ramo.

²⁵I nger aŋo m'ojwangi iye tindi madwoŋ m'oŋeyere, tindi m'opoŋ'iye kisangala!

²⁶Riameno yac pere jolatho i royo ma tindi madwoŋ, aka ilareyo woko jolweny pere i ndelo no, Rwoth pa lwak jolweny waco.

²⁷Alacwinyo mac i kor cel ma Damasiko, aka lawaŋo woko pecin pa kere Benhadad.

²⁸Me wac ma mako kwoŋ Kedar kodi kerin ma Hazor ma kere Nebukadineza okengila. Rwoth waco ama: Ay malo imonji Kedar, reyi woko ji ma yuwok ceŋ!

²⁹Ter wemin pajo kodi mwendi pajo, nangin pajo ma geŋirok kodi gigipiny pajo. Tiŋi win ŋamin pajo widoŋ gine, aka ywak lawinjere malo, “Teko othoko iye je.”

³⁰Ringi win, lera win bor, pondi win milelo, awi ji ma tindi madwoŋ Hazor! Rwoth waco. Ato kere Nebukadineza ma Babilon, otieko timo can kwoŋ win, aka ocwogo atoŋa kwoŋ win.

³¹Ay malo imonji piny moro i yoto, piny ma bedo i siem. Rwoth waco. Kole tindi madwoŋ pajo ongoye gi waŋkace kosa nywenye aka bedo kakende.

³²Ter win ŋamin pajo, kanyacel gi dwol dhok pajo. Alakedho i kisi thenge, jono ma jolielo ye wiy jo macek, aka alakelo teko kwoŋ jo, wok i kisi thenge. Rwoth waco.

³³Hazor lalokere kabedo p'ogwaŋe madudi, aka lalokere gunda kicutho, ongoye ŋata labedo kenyo, aka dhano k'obed'iye kendo.

³⁴Wac pa Rwoth obino ri jatuci wac Yeremia ma mako kwoŋ Elam, i cakirok ma dhum pa kere Zedekia ma Yuda.

³⁵Rwoth pa lwak jolweny waco ama: Akidho turo woko gibayo asere pa Elam je ma miyo go meni.

³⁶Alamiyo koyo ma wok i thenge aŋwen ma piny wokudhi Elam, aka langoye piny ma ji ma Elam jolakidho bed'iye jowiloka.

³⁷Alabwoko ji ma Elam ruwaŋ jokwor pajo, kodi ruwaŋ jono ma jorango neko jo. Alakelo teko kwoŋ jo, nge paran mager, Rwoth waco. Aladhiro abor kwoŋ jo, cuka anotiek reyo jo woko.

³⁸Alaketho kom paran ma dhum i Elam, t'areyo woko kere pajo kodi jotel pajo, Rwoth waco.

³⁹To i ndelo ma rumacen, aladwoko lim pa Elam kendo, Rwoth waco.