Read dhopadhola Yeremia 5 Bible Online

Yeremia 5 - dhopadhola bible

Yeremia 5

¹Ji ma Yerusalem, ŋwec win malo gicen, ŋwec win i royin mewin, aka mondo neni win kor gi korin aka wipar kwoŋe! Woth win i katale mere je winen ka inyalo nwaŋo dhano acel ma timo gim'otire aka dwaro tiro ŋey anyal cwako Yerusalem.

²Kada jowaco ni, “Paka Rwoth kwo.” Kucel jokwoŋere ma twodo.

³Awi Rwoth, waŋin kinen adieri? Itieko rwadho piny jo, to jok'owinjo litho; itieko neko jo, to jok'owinjo fonji. Jotieko loko waŋ jo matek loyo tele; jokwero ŋuto.

⁴Kenyo t'awaco ni, “Me obedo nyaka jocandi, jongoye gi niaŋ; kole jokuya royo pa Rwoth, cik pa Were pajo.

⁵Weyi akidhi ri jomadongo aka aluw gi jo; adieri joŋeyo royo pa Rwoth, cik pa Were pajo.” To jo bende oyido jotieko turo majogi, oyido jotieko yeco woko gima riwo wan.

⁶Riameno simbwor ma wok i lul bino neko jo, arara ma wok i thim bino reyo woko jo. Kwac waya i tindin pajo madongo; kisi ŋat'owok woko moro je ibino yeco mathindho thindho rupiri kibenga pajo thoth, aka jotieko jwango Were pajo dikweth.

⁷Anyalo cwako win nedi? Nyithindho mewin jotieko jwangan, aka jotieko kwoŋere gi nyingi jono ma jok'obedo werin. Munyo apidho jo to joyeŋ, jotimo cot, jokadho i udi pa malayin.

⁸Oyido jocale gi kayinin m'opidhi maber ma jonyacwo, kisi acel nyacwo mako ri cipa nyawote.

⁹Ak'omiy jo gir'acula ri gigipiny me? Rwoth penjo; ak'ocul kwor kwoŋ nger nono me?

¹⁰Woth i bibiro ma ndelo vini pere aka irey woko go, t'ikir'irey woko kicutho; jaki woko jange, rupiri jok'obedo apa Rwoth.

¹¹Kole Joisiraili kodi Joyuda jotieko banere ran swa, Rwoth waco.

¹²Jotieko luwo gima k'obedo adieri kwoŋ Rwoth, aka jotieko waco ni, “Go k'otimi gimoro.” Ongoye gimarac ma lapodho kwoŋ wan, aka wakibino neno litho kosa kec.

¹³Jotuci wac Were jok'obedo gimoro to koyo ayin, rupiri wac ongoye i jo. Ameno apaka ibino timo rijo!

¹⁴Riameno Rwoth Were pa lwak jolweny waco ama: Rupiri jotieko luwo wac me, onyo akidho loko wac ma dhokin wocale mac, t'aloko ji me paka yen, aka mac lareyo woko jo.

¹⁵Akidho kelo kwoŋ win, nono ma wok bor, awi Joisiraili. Obedo nono ma jociro, obedo nono macene, nono ma wikuya dhodhok pajo, ma wikinyal niaŋ gima jowaco.

¹⁶Mikoro pajo cale kaliel m'oŋamere, joje jocale jolweny apondi ma jomeni.

¹⁷Jobino camo ranyak mewin kodi cemo mewin; jolacamo wot win gi nyiki win. Jolacamo mwendi mewin gi dhok mewin; jobino camo olemo mewin kodi nyandere mewin. Jobino reyo g'abor tindin mewin madongo m'ogoy'iye cel ma wigeno.

¹⁸To kada i hongo no, Rwoth waco, “Ak'orey win kicutho.”

¹⁹Ka ji mewin jopenji ni, “Raŋo Rwoth Were mawan otimo gigipiny me je riwan?” Wibino dwoko jo ni, “Paka witieko jwangan to witiyo ri werin makicar i piny mewin, ameno wilatic ri jopath i piny ma k'obedo mewin.”

²⁰Langa gime i ot pa Yakobo, tuci i Yuda:

²¹Mondo winji win gime, awi jomamiŋ ma jokiniaŋ, winitie gi waŋ win, to wikinen, winitie gi ithi win, to wikiwinji wac.

²²Wikilworan? Rwoth penjo. Wikikirin ruwaŋan? Aketho kwoyo paka kew ri nam, rageŋ ma cil gi cil ma go kinyal luwo; kad'asur ma nam tem yengo, kinyal loyo gi meni, kada jomoor, jokinyal ŋado.

²³To ji me wiy gin tek; jonitie g'adundo ma gwenyirok; jotieko wire githenge to jokadho.

²⁴Jokiwaci i cuny jo ni, “Mondo weyi win walwor Rwoth Were mawan, go m'amiyo koth i hongo mere ma ripo, koth ma oro kodi ma cwir, aka kuro riwan i hongo mere ndelin m'oyik ma keco i hongo mere.”

²⁵Reco mewin dhiro gigipiny me gicen, aka reco mewin thwono win gimaber.

²⁶Kole jokidakana jonitie i dier ji paran; jomayo ji gigipiny pajo. Jocale jociko ma jociko bwo; to jomako ji.

²⁷Paka kilara m'opoŋ'iye winyin, ameno apaka udi pajo opoŋ gi gigipiny m'onyaga. Riameno onyo jolokere jomadongo gi joŋaŋo.

²⁸Jocwe aka jofoth. Jodakana ma kiwacere; jokithum banja gi tiro yuthenge pa nyathi kic, wonyali kadho maber, aka jokithiel tiro ma mako joma bukony.

²⁹“Ak'omiy jo gir'acula ri gigipiny me?” Rwoth penjo. “Ak'ocul kwor kwoŋ nono ma cale me?

³⁰Gimarac gi gima kiwacere otieko timirok i piny:

³¹Jotuci wac Were jotuco wac ma twodo, aka jocway ri Were i wi migam joluwo gima jotuci wac Were jowaco rijo. Ji paran jomito wobedi ameno, to winotim nedi ka gike otundo?”