Read dhopadhola Yeremia 8 Bible Online

Yeremia 8 - dhopadhola bible

Yeremia 8

¹I hongo no, Rwoth waco, cokin pa kerin ma Yuda, cokin pa jotel, cokin pa jocway ri Were i wi migam, cokin pa jotuci wac Were, cokin pa ji ma bedo Yerusalem ibino golo woko i kaliele pajo.

²Ibino yaro jo i waŋceŋ kodi dwe kodi lwak je ma polo, ma jotieko maro to jotiyo rijo, ma jotieko luwo, ma jotieko penjo jo gir'atima to jolamo. K'ocoki jo kosa k'oyiki jo; jolacale woyo dhiaŋ i wi lowo.

³Ji je ma jodoŋ ma nono marac me jolayenyo tho loyo kwo i kabedo je m'atieko kedh'iye jo, Rwoth pa lwak jolweny waco.

⁴Ibino waco rijo ama, Rwoth waco ama: Ka ji jopodho, jokiay malo kendo? Ka jorwenyo, jokiwire?

⁵Raŋo onyo ji me jowire woko rwenyo cil gi cil. Jotieko timo riyo kec ma twodo, jotieko jokwero dwoko.

⁶Atieko ciko ithan t'awinjo, to jokiluwi g'adieri; ongoye ŋata ŋuto kidakana pere, ka penjere ni, Gimarac aŋo m'atimo? Joje jowire itimo gima jomito, paka kayina pa podho gi wiye kama lweny ogunj'iye.

⁷Kiri obusi ma koyo oŋeyo sawa ma dok; aka akuru, obico, kodi owel jokuro sawa ma dwoko pajo; to ji paran jokuya cik pa Rwoth.

⁸Winyalo nedi waco ni wariek, aka cik pa Rwoth nitie gi wan. Munyo iy'adieri, gi ndiko ma twodo pa jondiko, otieko loko gino twodo?

⁹Ilakwoto wiy jomariek, jolamienere t'imako jo; paka onyo jotieko kwero wac pa Rwoth, rieko aŋo manitie i jo?

¹⁰Riameno alamiyo mon pajo ri joman kodi ndelin pajo ri joma laloyo jo gi meni, rupiri wok i jomathindho tundo i jomadongo kisi dhano je jaworo ri magowa ma k'otire; wok kwoŋ jatuci wac Were tundo kwoŋ jacway ri Were i wi migam kisi dhano timo gikomo.

¹¹Jok'omado adhola pa ji paran maber, ka jowaco ni siem, siem, kucel siem ongoye.

¹²Jotimo giwickwot, jotimo amien; kucel wiy jo k'okwoti kada, jok'oŋeyo nger ma bedo giwickwot. Riameno jolapodho i dier jono ma jopodho. I hongo m'abino miy'iye jo gir'acula, jolakitangatanga, Rwoth waco.

¹³Munyo oyido amito coko jo, Rwoth waco, olemo ongoye i yath vini, nyandere ongoye i wi makuyu; kiri boke je joner, aka atieko yeyo jokicar mayo jo lowo pajo.

¹⁴Raŋo wabedo ma wakikithini? Cokere win kanyacel, weyi wakidhi win i tindin madongo m'ogoy'iye cel to wasika woko kenyo; kole Rwoth Were mawan otieko thumo riwan banja ma tho, aka go otieko miyo wan pi ma kwir amadha, rupiri watieko timo reco kwoŋ Rwoth.

¹⁵Warango siem, to wakinwaŋ bero, hongo ma both, to nitie litho ayino.

¹⁶Ywe pa kayinin pajo winjere wok Dan; i derino ma ywe pa kayinin pajo piny gibe yengere. Jokwor mawan jobino reyo woko piny mawan kodi kisi gimoro je man'iye, tindi mawan madwoŋ kodi ji ma jobed'iye.

¹⁷Neni, acegin dhiro thwole i dier win, uu ma kinyal yiro, aka jolakayo win. Rwoth waco.

¹⁸Kisangala paran orumo, ywak opoŋ kwoŋan, cunyan podho.

¹⁹Eno, ywak pa jocandi wok bor kodi kama lac i piny: “Rwoth ki nitie i zayon? Kere ma Zayon onyo ongoye kenyo?” Raŋo wimiyan nge gi cal mewin, gi lamo werin mewin makicar ma jongoye kony?

²⁰Ji joywak ni, “Keco otieko rumo, milengela otieko tundo i gike, aka fodi wakiboth.”

²¹Ro litho pa ji paran ma jocandi, alimo litho, aywak, aka atieko dhier.

²²Ongoye yath moro i Giliad? Ongoye jamilerwa moro kenyo? Raŋo onyo ji paran ma jocandi fodi jok'olimo both?