Read dhopadhola Yeremia 9 Bible Online

Yeremia 9 - dhopadhola bible

Yeremia 9

¹Awi ka bedi wiyan oyido obedo waŋ pi, aka waŋan kama pigi waŋ jo wok'iye, ŋey anyal ywak wor g'odieceŋ ri ji paran ma jocandi m'oneki jo!

²Awi ka bedi oyido anitie gi kabedo i thim kam'anyalo weyo ji paran t'abed'iye! Joje jobedo jobanirok kweth pa jomisegey.

³Jodolo lew gin paka asere; jotieko dongo matek i piny ma twodo, makiweno adieri; kole jomedere wok i gimarac tundo i gimarac, aka jokuya an, Rwoth waco.

⁴Kisi dhano ripo gwokirok kwoŋ nyawote, aka ongoye ŋata nyalo geno omin; kole kisi omin jo obedo jatwodo paka Yakobo, aka kisi dhano waco nyingi nyawote.

⁵Joje jowondo wadi gin, aka ongoye ŋata waco adieri; jotieko fonjo lew jo luwo twodo; jotimo reco aka jolocere swa ma jokinyal ŋuto.

⁶Adica wi adica, twodo wi twodo! Jokwero ŋeyan, Rwoth waco.

⁷Riameno Rwoth pa lwak jolweny waco ama: “Alarudo t'atemo jo, onyo anotim aŋo kendo gi ji paran ma joreco?

⁸Lew jo cale asere ma neko jo; noknok jowaco twodo. Kisi dhano waco wac maber ri nyawote, to iy'adieri ciko bwo rigo”.

⁹“Ak'omiy jo gir'acula ro gigipiny me?” Rwoth penjo; Ak'ocul kwor kwoŋ nono paka me? An Rwoth, atieko luwo.

¹⁰Awaco ni, “Alabiyo pigi waŋan ri gote, kodi ywak ri lum ma thim, rupiri jotieko thwo, aka ongoye ŋata luwo i jo. Ywak pa dhok kiwinjere kendo; winyin kodi ogwaŋe madudi jotieko ringo to jokadho.”

¹¹Me apaka Rwoth waco, “Alaloko Yerusalem gundin m'opanga, kabedo ma kibwe jobed'iye; tindin madongo ma Yuda jolalokere thim, kabedo m'ongoye ŋata bed'iye.”

¹²T'apenjo ni “Ŋa mariek loyo manyalo niaŋ gime? Ŋa ma Rwoth otieko luwo gine manyalo tito? Raŋo piny odoŋ gunda ak'othangere paka thim m'ongoye ŋata luw'iye?”

¹³To Rwoth dwoko ni: “Kwoŋbedo jotieko jwango cik paran m'atieko jengo ruwaŋ jo, aka jokwero winjo dwondan, kosa timo gim'awaco rijo.

¹⁴To kucel gi wictek jotimo gima cuny jo yenyo aka jotieko lamo Bal paka kwarere pajo ofonjo jo.

¹⁵Riameno Rwoth pa lwak jolweny waco ama, Were pa Isiraili: Alapidho ji me gi yath makec kodi pi ma kwir amadha.

¹⁶Alakedho jo i dier nonin ma jo kosa kwarere pajo fodi jokuya; aka aladhiro abor to luwo jo, cuka anorey jo kicutho.”

¹⁷Rwoth pa lwak jolweny waco ama: Par win kwoŋ gima timere, aka wilwoŋ mon ma joywak ajore jowobin; wilwoŋ mon ma jondijo jowobin.

¹⁸Ji jowaco ni, “Weyi jowobin piyo piyo jowoywak ajore riwan, cuka pigi waŋ wan wooy, aka yer ma waŋ wan wodhieki gi ywak.”

¹⁹Kole derino ma ywak winjere wok Zayon: “Walokere gunda! Wiy wan okwot kicutho, rupiri waweyo lowo mawan, kwoŋbedo okedhi woko pecin mawan.”

²⁰Winji win, awi mon, wac pa Rwoth, aka weyi ithi win wojol wac ma dhoke; fonji win nyiki win ywak ajore, aka wifonji wadi win ywak.

²¹“Tho otieko bino i dirisin mawan, otieko donjo i cel mawan, ma neko woko nyithindho wok i royin kodi yac wok i kam'othangere.”

²²Luw! Apaka Rwoth waco ama: Del pa ji m'otho lapodho paka woyo i kisawe paka withi kal yuŋey jakeco, aka ongoye ŋata lacoko jo.

²³ Rwoth waco ama: “Weyi jomariek jokiri jowodele i rieko pajo, wikiri wiyey jomeni jowodele i meni pajo, wikiri wiyey joŋaŋo jowodele i ŋaŋo pajo.

²⁴To weyi jono ma jodele jowodele i gime: Ni jowoniaŋ aka jowoŋeyan, nike Abedo Rwoth. Atiyo gi mar makiwire, tiro, kodi adieri i piny, afore i gigipiny me,” Rwoth waco.

²⁵Hongo bino, Rwoth waco, m'abino tiy'iye gi jono je ma jothumere to jok'okuro cikirok mere.

²⁶Misir, Yuda, Edom, Amon, Mowab, kodi jono je m'oliel wiy gin ma jobedo i thim. Ongoye kwoŋ ji me aka ongoye kwoŋ Joisiraili ma jokuro cikirok paran.