Read dhopadhola Ywakirok 4 Bible Online

Ywakirok 4 - dhopadhola bible

Ywakirok 4

¹Neni paka zahabu olokere ma nimnim, nger ma zahabu macil owire, telin ma leŋo jokedhere, i kisi gike ma royo.

²Nyithindho ma welo ma Zayon, oyido jorom gi peko ma zahabu macil, onyo itero jo paka degi ma lowo, tic ma cingi jacwec degi.

³Kiri ondiek jomiyo nyithindhi jo dhoth, aka jopidho nyithindhi jo, to ji paran jolokere mager, paka maya ma thim.

⁴Lew nyathi ma dhoth moko, i dande ro riyo, nyithindho jokwayo cemo, to ongoye ŋat'omiy jo gimoro.

⁵Jono m'oyido jocamo gima mit, jojwangere i royin, jono ma jodongo i kwo mayom, onyo jodimere i bur buru.

⁶Kole reco pa ji paran dwoŋ, loyo reco pa Sodom, m'orey woko i yoto, m'ongoye cingi dhano m'ogeyo.

⁷Jodhum mere oyido jocil loyo pe, oyido jotar loyo cak; kwoŋ jo oyido cwe swa, mafoth loyo telin ma welo.

⁸Onyo pama jocol swa, ma jokiŋeyere i royo, pien kwoŋ jo ojony to moko kwoŋ cokin pajo, othwo paka yen m'othwo.

⁹Ji m'oneki jo g'abor, jober loyo joma kec oneko jo, ma kwo pajo orere woko, ro ngoye pa cemo m'omiy jo kwo.

¹⁰Cingi mon m'opoŋ wor, otieko tedo nyithindho pajo wegi, jolokere cemo pajo, i rerok pa ji paran.

¹¹Rwoth ocowo keme pere, aka okonjo nge pere malieth, to cwinyo mac i Zayon, m'oreyo woko misingi mere.

¹²Kerin ma piny jok'oyeyo, kanyacel gi ji ma piny, nike jakwor oyido odonji, i waŋkace ma Yerusalem.

¹³Obedo ro reco pa jotuci wac Were pere, kodi jocway ri Were i wi migam pere, ma ooy remo pa joma timo gim'otire, i dier go.

¹⁴Jolera nya waŋtho i royin, ma jokocere gi remo, ma ongoye ŋat'onyalo, mako law pajo.

¹⁵Kadhi win, wikoci, ji jokoko rijo, kadhi win, wikiri wigeyi wan. Ameno jolera wok piny man kadho i man aka jolera, aka owaci i kisi piny ni, jokilabedo ka.

¹⁶Rwoth won ama okedho jo, go kiladewo kwoŋ jo kendo, k'onyuthi jocway ri Were i wi migam wor, kanyacel gi jodongo.

¹⁷Waŋ wan ool gi ŋiyo, kareno warango kony m'ongoye, oyido wakuro kony, wok bongi nono ma kinyal botho.

¹⁸Jorango tiendi wan, ŋey wakinyalo wotho i royin, gike mawan ocore cegin, ndelo mawan oyido kwanere, kole gike mawan oyido otundo.

¹⁹Joma joriemo wan oyido jodwir, loyo ango ma ay malo i polo, joriemo wan wi gote, aka jokuro wan i thim.

²⁰Ŋat'owir pa Rwoth, luya ma kwo mawan, oter woko i buce, ŋat'oyido wawaco ni, i tipo pere, walakwo i dier nonin.

²¹Siemere, aka sangala, Awi ji ma Edom, win ma wibedo i lowo ma Uz, to teko mewin bende bino, win bende wilamero to wilunyere kinyoro.

²²Zayon otieko limo gir'acula pere aka orumo, Rwoth kilakano win i twec kendo, to Rwoth lamiyo Edom gir'acula ri reco pere, go lathango reco perin.