Read dhopadhola Ywakirok 5 Bible Online

Ywakirok 5 - dhopadhola bible

Ywakirok 5

¹Awi Rwoth, poyi gim'otieko podho kwoŋ wan, ŋiy, aka neni wickwot mawan.

²Lim mawan nitie i cingi jopath, aka jokicar jobedo i pecin mawan.

³Watieko lokirok nyithindho kic, wangoye gi bacere wan, megi wan jocale mon tho.

⁴Waripo kutho miyo cul ri pi ma wamadho, waripo nyewo yen ma tedo.

⁵Iywayo wan gi bieto i ŋuti wan, aka waloc, to kimiy wan ywomirok.

⁶Watieko timo cikirok gi Misir kodi Asiria, limo cemo ma romo.

⁷Kwarere mawan jotimo reco, to jongoye, aka onyo pama watiŋo reco pajo.

⁸Ŋecin jodhumo, aka ongoye ŋat'obothi wan wok i cingi jo.

⁹Walimo cemo gi jwango kwo mawan ri teko, kwoŋbedo jonek jonitie i thim.

¹⁰Pien kwoŋ wan col paka kendo, ro lietho ma ceŋ mager ma kelo kec.

¹¹Inindo gi mon gi mbaka i Zayon, kiri nyir ma fodi jokuya cwo i tindin madongo i Yuda.

¹²Imako jotel mawan t'ideyo jo, jodongo mawan kimiy jo wor.

¹³Iromo yac rego, aka jotangatanga gi tiŋo yen mapek.

¹⁴Jom'oti joweyo bedo i waŋkac, aka yac joweyo wer.

¹⁵Kisangala ma cuny wan orumo, miel mawan onyo olokere ywak.

¹⁶Sangaria opodho woko wok i wiy wan, kidamba riwan, kole watieko timo reco.

¹⁷Cuny wan ramere kwoŋbedo gime, waŋ wan onyo nimnim kwoŋbedo gigipiny me.

¹⁸Kwoŋbedo Got Zayon odoŋ nono, ogwaŋe madudi jowaya i iye.

¹⁹To in, Awi Rwoth, ibedo kere ma cil gi cil, aka dhum perin ongoye gi gike i luse je.

²⁰Raŋo wiyin owil gi wan kicutho? Raŋo itieko jwango wan hongo kweth me je?

²¹Dwoki wan bongin, Awi Rwoth, ŋey wanyal dwoko, loki hongo mawan manyen paka cango con.

²²Kono k'itieko jwango wan kicutho, aka onyo imako gi wan nge ma kiware.