Read dhopadhola Ezekiel 10 Bible Online

Ezekiel 10 - dhopadhola bible

Ezekiel 10

¹Aŋiyo, aka neni, pi m'omakere matek m'oyido nitie i wi kerubim, onenere i wi jo gima cale tele ma pilin, paka gima cale kom ma dhum.

²Go owaco ri jacwo m'oyido oruko nanga mafoth ni, “Kadhi i lipangala ma pendi kerubim, aka ipoŋ masi cingin gi cuk mac t'iywoyo kwoŋ tindi madwoŋ.” Go okadho m'aneno ama.

³Onyo kerubim oyido ocungo yuracuc ma ot, aka munyo jacwo no odonjo, pondeponde oumo diedipo ma iye.

⁴Kenyo dwoŋ pa Rwoth oay wok kwoŋ kerubim kadho i thengi ot, pondeponde opoŋo ot, aka diedipo opoŋ gi lero madwoŋ pa Rwoth.

⁵Derino ma bwombi kerubim owinjere i diedipo ma woko, paka dwondi Were Majameni je ka luwo.

⁶Munyo go omiyo jacwo m'oruko nanga mafoth or, kwanyo mac wok i pendi lipangala, wok i dier kerubim, jacwo no odonjo to cungo i thengi lipangala.

⁷Kenyo kerubim acel otelo cinge wok i dier kerubim i mac m'oyido nitie i dier jo, ojowo mac to ketho i masi cingi jacwo m'oyido oruko nanga mafoth, aka ojolo to wok woko.

⁸I pendi kerubim oneno gima cale cingi dhano i pendi bwombi jo.

⁹Aŋiyo, aka neni, oyido nitie lipangala aŋwen i thengi kerubim, acel i thengi kisi kerubim; lipangala me oyido cale tele ma pilin.

¹⁰Lipangala aŋwen je oyido jonitie gi cal acel, paŋini lipangala m'olwow i wi lipangala.

¹¹Ka jodhire, jodhire i thenge aŋwen mogo je ma jokiwire; thenge ma wic acel oŋiyo ama joje jodhir'iye ma jokiwire.

¹²Delkwoŋ jo je, ligongolo pajo, cingi jo, bwombi jo, kodi lipangala, oyido opoŋ waŋ jo thoko, i lipangala aŋwen je.

¹³Paka ri lipangala, olwoŋi jo munyo awinjo gi ithan.

¹⁴Kisi acel oyido nitie gi nyime, nyim marapena oyido obedo nyim kerubim, nyim mar'ario oyido obedo nyim dhano, nyim mar'adek oyido obedo nyim simbwor, aka nyim mar'aŋwen oyido obedo nyim ango.

¹⁵Kerubim joay malo; me obedo cwec m'oyido atieko neno i thengi malawa Kebar.

¹⁶Ka kerubim jodhire, lipangala bende jodhire i thengi jo, ka kerubim joyaro bwombi jo to joay wok i piny, lipangala jokidhire i thengi jo.

¹⁷Ka kerubim jocungo liŋ, lipangala bende jocungo liŋ, ka kerubim joay jo bende joay; kole cuny pa cwec makwo oyido nitie i jo.

¹⁸Kenyo dwoŋ pa Rwoth oay wok i thengi ot, to cungo i wi kerubim.

¹⁹Kerubim joyaro bwombi jo to joay malo wok i piny ruwaŋan munyo jowok gi lipangala i thengi jo. Jocungo yuwaŋ waŋkac ma Ot pa Rwoth yuwok ceŋ, aka dwoŋ pa Were pa Isiraili oyido nitie i wi jo malo.

²⁰Me obedo cwec m'aneno i tiendi Were pa Isiraili i thengi malawa Kebar; aka aŋeyo nike oyido jobedo kerubim.

²¹Kisi acel oyido nitie gi nyime aŋwen, kodi bwombe aŋwen, aka i pendi bwombi jo oyido nitie gima cale cingi dhano.

²²Nyim jo oyido obedo nyim jo acel m'oyido atieko neno i thengi malawa Kebar, cal pajo kodi jo wegi; joje jodhire tirtir.